ନୂଆଦିଲ୍ଲୀ,୧।୧୨: କେନ୍ଦ୍ର ସରକାରଙ୍କ କୃଷି ଆଇନ ନେଇ ଦେଶବ୍ୟାପୀ ଅନ୍ନଦାତାମାନେ ଆନ୍ଦୋଳନ ଜାରି ରଖିଛନ୍ତି। ଏହି ଆନ୍ଦୋଳନକୁ ସର୍ବଭାରତୀୟ ଟ୍ୟାକ୍ସି ମହାସଂଘ ପକ୍ଷରୁ ସମର୍ଥନ କରାଯାଇଛି। ଆସନ୍ତା ୨ ଦୁଇଦିନ ମଧ୍ୟରେ କେନ୍ଦ୍ର ସରକାର କୌଣସି ନିଷ୍ପତ୍ତି ଗ୍ରହଣ ନ କଲେ ଡିସେମ୍ବର ୩ରେ ଟ୍ୟାକ୍ସି ମହାସଂଘ ପକ୍ଷରୁ ‘ଦିଲ୍ଲୀ ଚଲୋ’ ଡ଼ାକରା ଦିଆଯାଇଛି। ଏନେଇ ମହାସଂଘର ସଭାପତି ବଲଓ୍ବନ୍ତ ସିଂ ଭୁଲ୍ଲର ସୂଚନା ଦେଇଛନ୍ତି। କର୍ପୋରେଟ ସେକ୍ଟର ଆମକୁ ନଷ୍ଟ କରି ଚାଲିଛି ବୋଲି ସେ କହିଛନ୍ତି। କୃଷି ଆଇନକୁ ଫେରାଇ ନେବାକୁ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହା ଏବଂ କୃଷି ମନ୍ତ୍ରୀ ନରେନ୍ଦ୍ର ସିଂ ତୋମାରଙ୍କୁ ଅନୁରୋଧ କରିଛନ୍ତି। ଦେଶରେ କରୋନା ମହାମାରୀ ସଂକ୍ରମଣ ଜାରି ରହିଛି। ଏପରିସ୍ଥଳେ ଖୋଲା ଆକାଶ ତଳେ ଭୋକ ଉପାସରେ ଚାଷୀମାନେ ପଡ଼ି ରହିଛନ୍ତି। ସେମାନଙ୍କ ଦାବିକୁ କେନ୍ଦ୍ର ସରକାର ଗ୍ରହଣ କରିବା ଆବଶ୍ୟକ। ନଚେତ ଟ୍ୟାକ୍ସି ମହାସଂଘ ମଧ୍ୟ ଧାରଣା ଦେବ ବୋଲି ଭଲ୍ଲର କହିଛନ୍ତି।
