ଆଙ୍କାରା (ତୁର୍କୀ), ୧୨ା୧୧: ରେଫରିଙ୍କୁ ଆକ୍ରମଣ କରିଥିବା ଅଭିଯୋଗରେ ତୁର୍କୀର ଏକ କୋର୍ଟ ଦେଶର ଜଣେ ଆଗାଧାଡ଼ିର ଫୁଟ୍ବଲ କ୍ଲବ ସଭାପତିଙ୍କୁ ୩ ବର୍ଷ ଓ ୭ ମାସରୁ ଊର୍ଦ୍ଧ୍ୱ ଜେଲଦଣ୍ଡ ଦେଇଛନ୍ତି।
ଗତବର୍ଷ କେକୁର ରିଜେସପୋର୍ ବିପକ୍ଷ ଏକ ସୁପର ଲିଗ୍ ଗେମ୍ ୧-୧ରେ ଡ୍ର’ ପରେ ଫାଇନାଲ ହ୍ବିସିଲ ବାଜିବା ପରେ ଏମ୍କେଇ ଆଙ୍କାରାଗୁସୁ ସଭାପତି ଫାରୁକ୍ କୋକା ରେଫରି ହାଲିଲ ଉମୁତ ମେଲରଙ୍କ ମୁହଁକୁ ଏକ ମୁଥ ମାରିଥିଲେ। ପ୍ରହାରର ତୀବ୍ରତା ଏତେ ଥିଲା ଯେ, ମେଲର ତଳେ ପଡ଼ିଯାଇଥିଲେ। ଏହାକୁ ନେଇ ଦର୍ଶକ ମହଲରେ ପ୍ରବଳ ଉତ୍ତେଜନା ପ୍ରକାଶ ପାଇଥିଲା। ଅନେକ ପଡ଼ିଆ ଭିତରକୁ ଚାଲି ଆସିଥିଲେ। ଏହି ଘଟଣାକୁ ନେଇ ବିଶ୍ୱ ଫୁଟ୍ବଲ ମହଲରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା।
ତୁର୍କୀ ଫୁଟ୍ବଲ ମହାସଂଘ ବାଧ୍ୟ ହୋଇ ସମସ୍ତ ଲିଗ୍ ଗେମ୍ଗୁଡ଼ିକୁ ଅନେକ ସପ୍ତାହ ଧରି ସସ୍ପେଣ୍ଡ କରିଥିଲା। ଆଙ୍କାରା କୋର୍ଟ ତାଙ୍କ ରାୟରେ କହିଥିଲେ, କୋକୋ ନିୟମ ଉଲ୍ଲଂଘନ କରି ଉଦ୍ଦେଶ୍ୟମୂଳକ ଭାବେ ଜଣେ ପବ୍ଲିକ ଅଫିସିଆଲଙ୍କୁ ଆଘାତପ୍ରାପ୍ତ କରିଛନ୍ତି। ରେଫରିଙ୍କୁ ଆକ୍ରମଣ ଘଟଣାରେ ସମ୍ପୃକ୍ତ ଅନ୍ୟ ୩ ଜଣଙ୍କୁ ମଧ୍ୟ କୋର୍ଟ ୧ରୁ ୫ ବର୍ଷ ପର୍ଯ୍ୟନ୍ତ ଜେଲଦଣ୍ଡ କରିଛନ୍ତି। ଘଟଣାପରେ କୋକୋ କ୍ଲବର ସଭାପତି ପଦରୁ ଇସ୍ତଫା ଦେଇଥିଲେ।