ବାରିପଦା ଅଫିସ,୫।୯- ସମାଜର ଅବହେଳିତ ଓ ନିଷ୍ପେସିତ ଲୋକଙ୍କୁ ଥଇଥାନ କରିବା ପାଇଁ ସରକାର ବିଭିନ୍ନ ଯୋଜନା ପ୍ରଣୟନ କରିଛନ୍ତି। ସେହିପରି ଅତି ଦୟନୀୟ ଅବସ୍ଥାରେ ଘୁରିବୁଲୁଥିବା ଲୋକଙ୍କ ପାଇଁ ଆଶ୍ରୟସ୍ଥଳୀ ଓ ବୃଦ୍ଧାଶ୍ରମ ରହିଛି। ମାତ୍ର ମୟୂରଭଞ୍ଜ ଜିଲା ବାରିପଦା ସହରରେ ଏହାର ବ୍ୟତିକ୍ରମ ଦେଖିବାକୁ ମିଳିଛି। ଅନେକ ଅସହାୟଙ୍କ ଠିକଣା ପାଲଟିଛି ଫୁଟପାଥ୍। ଭୋକ ଉପାସରେ ସେମାନେ ପଡ଼ିରହି ଲୋକଙ୍କ ହାତଟେକାକୁ ଅନାଇ ରହୁଛନ୍ତି। ଜିଲା ସାମାଜିକ ସୁରକ୍ଷା ବିଭାଗ ପକ୍ଷରୁ ପଦକ୍ଷେପ ଗ୍ରହଣ କରାଯାଉଥିଲେ ମଧ୍ୟ ଏଥିପାଇଁ କାର୍ଯ୍ୟକରୁଥିବା ଏନ୍ଜିଓ ସଂସ୍ଥା ଆଖିବୁଜି ଦେଇଛି। ଫଳରେ ଅସହାୟଙ୍କ ପାଇଁ ସରକାରୀ ଯୋଜନା ସତେ ଯେମିିତି ବାଟବଣା ହୋଇଯାଇଛି।
ବାରିପଦା ସହରର ବସଷ୍ଟାଣ୍ଡ, ଗଛମୂଳ, ହୋଟେଲ ବାରଣ୍ଡା, ରାସ୍ତାକଡ଼ରେ ଘୁରୁବୁଲୁଛନ୍ତି ଅସହାୟ ମହିଳାମାନେ। ଏମାନଙ୍କ ମଧ୍ୟରୁ ଅନେକେ ବୟସର ଅପରାହ୍ନରେ ପହଞ୍ଚିଥିବା ବେଳେ କାହାର ଚାଲିବାକୁ ଅଣ୍ଟାରେ ବଳ ନାହିଁ। ଖରାବର୍ଷାରେ ଘୁରିବୁଲି କ୍ଳାନ୍ତି ମେଣ୍ଟାଇବା ପାଇଁ ରାସ୍ତାକଡ଼ ପାଲଟିଛି ସେମାନଙ୍କର ଆଶ୍ରୟସ୍ଥଳୀ। ସହରର ସତ୍ୟସାଇ ଛକ, ବସଷ୍ଟାଣ୍ଡ, କଚେରୀବଜାର, ଦେଉଳସାହି, ବଡ଼ବଜାର ଆଦି ଅଞ୍ଚଳର ଗଳିକନ୍ଦିରେ ଏହିଭଳି ଅନେକ ବେସାହାରା ଘୁରି ବୁଲୁଛନ୍ତି। ଥଇଥାନ ପାଇଁ ଆବଶ୍ୟକ ପଦକ୍ଷେପ ଗ୍ରହଣ କରାଯାଉ ନ ଥିବାରୁ ସେମାନେ ଭୋକ ଉପାସରେ ଦିନ କାଟୁଛନ୍ତି।
ସୂଚନା ଅନୁଯାୟୀ, ମୟୂରଭଞ୍ଜ ଜିଲାରେ ୧,୧,୧୩୨ଜଣଙ୍କୁ ମଧୁବାବୁ ପେନସନ ଯୋଜାନାରେ ସାମିଲ କରାଯାଇଥିବା ବେଳେ ଜାତୀୟ ବୃଦ୍ଧାବସ୍ଥା ପେନସନ ଯୋଜନାରେ ୭୦,୬୬୦ଜଣଙ୍କୁ ଭତ୍ତା ଯୋଗାଇ ଦିଆଯାଉଛି। ସେହିପରି ଜାତୀୟ ବିଧବା ଭତ୍ତାରେ ୪୩,୭୬୧ ଓ ଜାତୀୟ ଦିବ୍ୟାଙ୍ଗ ଭତ୍ତା ଯୋଜନାରେ ୪,୮୪୩ଜଣଙ୍କୁ ପେନସନ ମିଳୁଛି। ସେହିପରି ଜିଲାରେ ଥିବା ଏକମାତ୍ର ବୃଦ୍ଧାଶ୍ରମ ରୁରାଲ ଡେଭଲପମେଣ୍ଟ ଆକ୍ସନ ସେଲରେ ଅଦ୍ୟାବଧି ୧୨୫ଜଣ ବୃଦ୍ଧାବୃଦ୍ଧଙ୍କୁ ଥଇଥାନ କରାଯାଇଛି। ଅନ୍ୟପକ୍ଷେ ଅସହାୟଙ୍କୁ ଠାବ କରିବା ପାଇଁ ଏକମାତ୍ର ରେସ୍କ୍ୟୁ ଭ୍ୟାନ୍ ରହିଥିବା ବେଳେ ଏନ୍ଜିଓ ସଂସ୍ଥାର କର୍ମଚାରୀମାନେ ଏହା ଦାୟିତ୍ୱରେ ଅଛନ୍ତି ା କରୋନା କଟକଣା ସମୟରେ କେତେକ ସ୍ବେଚ୍ଛାସେବୀ ଅନୁଷ୍ଠାନ ପକ୍ଷରୁ ରନ୍ଧାଖାଦ୍ୟ ବଣ୍ଟନ କରାଯାଇଥିବା ବେଳେ ବର୍ତ୍ତମାନ ସେସବୁ ବନ୍ଦ ହୋଇଯାଇଛି। ସାଧାରଣ ଜନତାଙ୍କୁ ସାମାଜିକ ଓ ଅର୍ଥନୈତିକ ସୁରକ୍ଷା ଯୋଗାଇ ଦେବା ପାଇଁ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ଯୋଜନା କାର୍ଯ୍ୟକାରୀ ହେଉଛି। ମାତ୍ର ବାରିପଦା ସହରରେ ଏହି ଯୋଜାନାର କାର୍ଯ୍ୟକାରିତାକୁ ନେଇ ସହରବାସୀ ଅସନ୍ତୋଷ ପ୍ରକାଶ କରୁଥିବା ମଠ ମନ୍ଦିର ସୁରକ୍ଷା ସମିତିର ସଭାପତି ଭାନୁମିତ୍ର ଆଚାର୍ଯ୍ୟ କହିଛନ୍ତି। ଅବହେଳିତ ଲୋକଙ୍କ ପାଇଁ କୌଣସି ପଦକ୍ଷେପ ଗ୍ରହଣ କରାଯାଉ ନ ଥିବା ବେଳେ କାଗଜକଲମରେ ଯୋଜନା କାର୍ଯ୍ୟକାରୀ ହେଉଥିବା ବରିଷ୍ଠ ନାଗରିକ ଉଦୟ ମହାନ୍ତ ପ୍ରକାଶ କରିଛନ୍ତି। ଏ ସଂକ୍ରାନ୍ତରେ ଜିଲା ସାମାଜିକ ସୁରକ୍ଷା ଅଧିକାରୀ ନାରାୟଣ ବେହେରାଙ୍କୁ ପଚାରିବାରୁ ବିଭାଗ ପକ୍ଷରୁ ଅସହାୟ ଲୋକଙ୍କୁ ଥଇଥାନ କରାଯାଉଛି ା କିଛି ଦିନ ପୂର୍ବେ ୮ଜଣଙ୍କୁ ଥଇଥାନ କରାଯାଇଥିବା ବେଳେ ସହରରେ ବୁଲୁଥିବା ବେସାହାରାଙ୍କୁ ଖୁବଶୀଘ୍ର ଥଇଥାନ କରାଯିବ ବୋଲି ସେ କହିଛନ୍ତି ା