କେନ୍ଦୁଝର,୧୭ା୧୦(ନରେଶ ଚନ୍ଦ୍ର ପଟ୍ଟନାୟକ):କେନ୍ଦୁଝର ବନଖଣ୍ଡର ୭ ରେଞ୍ଜରେ ସୋମବାରଠାରୁ ବାଘ ଗଣନା ଆରମ୍ଭ ହୋଇଛି। ଗଣନା କାର୍ଯ୍ୟ ଅକ୍ଟୋବର ୩୧ ପର୍ଯ୍ୟନ୍ତ ଜାରି ରହିବ। ଗଣନାରେ ରେଞ୍ଜର, ଫରେଷ୍ଟର ଏବଂ ଫରେଷ୍ଟ ଗାର୍ଡଙ୍କ ସମେତ ବନ କର୍ମଚାରୀ ସାମିଲ ହୋଇଛନ୍ତି। ବିଶେଷକରି ବାଘ ରହୁଥିବା ଟେରିଟୋରିରେ ଗଣନାକୁ ଅଧିକ ପ୍ରାଧାନ୍ୟ ଦିଆଯାଇଛି। ପ୍ରଥମ ଦିନ ଗଣନାରେ ଅଟେଇ ଓ କାଳିମାଟି ସଂରକ୍ଷିତ ଜଙ୍ଗଲରେ ବାଘ ପାଦଚିହ୍ନ ଠାବ ହୋଇଥିବା ବିଭାଗ ପକ୍ଷରୁ ସୂଚନା ମିଳିଛି।
ବନ ବିଭାଗ ସୂଚନା ଅନୁଯାୟୀ, ବାଘର ଠିକ୍ ସଂଖ୍ୟା ନିରୂପଣ ପାଇଁ ଚଳିତ ବର୍ଷ ଅଧିକ ସ୍କ୍ବାଡ୍ ଗଠନ କରାଯାଇଛି। ବାଘ ଯାତାୟାତ କରୁଥିବା ଜଙ୍ଗଲରେ ଟ୍ରାପ୍ କ୍ୟାମରା ଲଗାଯାଇଛି। ଏହି ସମୟରେ ନଦୀ, ନାଳ ନିକଟରେ ବାଲି ଥିଲେ ତାହାକୁ ସମତୁଲ କରି ବାଘର ପାଦଚିହ୍ନ(ପଗ୍ ମାର୍କ) ନିଆଯିବ। ଘଟଗାଁ ରେଞ୍ଜ୍ର ୩ଟି ସେକ୍ସନର ୧୩ଟି ବିଟ୍ରେ ବାଘର ଗତିବିଧି ଏବଂ କେଉଁ ପ୍ରଜାତିର କେତେ ବାଘ ଅଛନ୍ତି ତାହା ଜାଣିବା ପାଇଁ ଟ୍ରାପ୍ କ୍ୟାମେରା ଲଗାଯାଇଛି। ମହାବଳ ବାଘ ବିଚରଣ କରୁଥିବା ପାଟଣା, ଘଟଗାଁ ରେଞ୍ଜ୍ରେ କ୍ୟାମେରା ଖଞ୍ଜାଯିବା ସହ ପାଦଚିହ୍ନ ନିଆଯିବ ବୋଲି ଘଟଗାଁ ରେଞ୍ଜ୍ ଦାୟିତ୍ୱରେ ଥିବା ଏସିଏଫ୍ ପ୍ରଭାତ କୁଅଁର ପ୍ରକାଶ କରିଛନ୍ତି। ବାଘ ଗଣନା ପାଇଁ ଗୋଟିଏ ବିଟ୍ରେ ୨୦ଟି ପିଆଇପି ପ୍ରସ୍ତୁତ କରାଯାଇଛି। ଜଙ୍ଗଲ ଭିତରେ ପାଦଚଲା ପାଟ୍ରୋଲିଂ କରି ଓଡ଼ିଶା ଫରେଷ୍ଟ ମନିଟରିଂ ଆପ୍ରେ ଅପଲୋଡ୍ କରାଯିବ। ୫ କିଲୋମିଟର ପାଦଚଲା ପାଟ୍ରୋଲିଂ କରାଯାଇ ବାଘର ପାଦଚିହ୍ନ, ମଳ, ଲୋମ, ମୂତ୍ର ସଂଗ୍ରହ କରାଯାଇ ଓୟୁଏଟି ଦ୍ୱାରା ପରୀକ୍ଷା କରାଯିବ। କେନ୍ଦୁଝର ବନଖଣ୍ଡରେ ଗୋଟିଏ ମହାବଳ ଏବଂ ଗୋଟିଏ କଲରାପତରିଆ ବାଘ ଚିହ୍ନଟ ହୋଇଥିବାବେଳେ ବାଘ ଗଣନା ପରେ କେତେ ସଂଖ୍ୟାରେ, କେଉଁ ପ୍ରଜାତିର ବାଘ ଅଛନ୍ତି ତାହା ଜଣାପଡ଼ିବ। ପ୍ରଥମ ଦିନରେ ଘଟଗାଁ ରେଞ୍ଜ୍ ଘଟଗାଁ ସେକ୍ସନ ବାଇଗଣପାଳ ବିଟ୍ ଅଟେଇ ସଂରକ୍ଷିତ ଜଙ୍ଗଲ ଏବଂ ଢେଙ୍କିକୋଟ ସେକ୍ସନ ବାଲିପୋଖରୀ ବିଟ୍ କାଳିମାଟି ସଂରକ୍ଷିତ ଜଙ୍ଗଲରେ ବାଘର ପାଦଚିହ୍ନ ଠାବ କରାଯାଇଛି। ପାଦଚିହ୍ନ କଲରାପତରିଆ ବାଘର ହୋଇଥିବା ଅନୁମାନ କରାଯାଉଥିବାବେଳେ ପରୀକ୍ଷା ପରେ ତାହା କେଉଁ ପ୍ରଜାତିର ଜଣାପଡ଼ିବ ବୋଲି ଏସିଏଫ୍ ଜିତେନ୍ଦ୍ର ବେହେରା ପ୍ରକାଶ କରିଛନ୍ତି।