ଯେକୌଣସି ଫିଲ୍ମ ନିର୍ଦ୍ଦେଶକଙ୍କ ପାଇଁ ତାଙ୍କ ଫିଲ୍ମ ଶ୍ରେଷ୍ଠ ପୁରସ୍କାର ଲାଭ କରିବା ନିଶ୍ଚିତ ଖୁସିର କଥା। ମାତ୍ର ଜଣେ ଫିଲ୍ମ ଲାଇନ୍ର ନ ହୋଇ ବି ଶ୍ରେଷ୍ଠ ଫିଲ୍ମ ନିର୍ଦ୍ଦେଶକ ଭାବେ ପୁରସ୍କୃତ ହେବା ସମସ୍ତଙ୍କୁ ଆଶ୍ଚର୍ଯ୍ୟ କରି ଦେଇଥାଏ। ଏମିତି ଘଟିଛି ମଣିପୁରର ରାଜଧାନୀ ଇମ୍ଫାଲ ବାସିନ୍ଦା ଅମର ମାଇବାମଙ୍କ କ୍ଷେତ୍ରରେ। ସେ ଏମିତି ଜଣେ ବ୍ୟକ୍ତି, ଯିଏକି ପ୍ରାୟ ୧୦ ବର୍ଷ ଧରି ବସ୍ କଣ୍ଡକ୍ଟର ଭାବରେ କାର୍ଯ୍ୟ କରିଥିଲେ। ପରେ ୨୦୧୪ରୁ ୨୦୧୮ମଧ୍ୟରେ ୪ ବର୍ଷ ପର୍ଯ୍ୟନ୍ତ ଡ୍ରାଇଭରମାନଙ୍କ ସହିତ ଇମ୍ଫାଲରୁ ମୋରେ ପର୍ଯ୍ୟନ୍ତ ଜାତୀୟ ରାଜପଥରେ ବୁଲି ଭିଡିଓ ଶୁଟ୍ କରୁଥିଲେ।
ପରେ ସେ ସେହି ଭିଡିଓକୁ ଏକ ଡକ୍ୟୁମେଣ୍ଟାରୀରେ ପରିଣତ କରିଥିଲେ। ସେହି ଡକ୍ୟୁମେଣ୍ଟାରୀ ବର୍ତ୍ତମାନ ଅଷ୍ଟମ ଡକ୍ଫେଷ୍ଟ ପୁରସ୍କାର ପାଇଁ ଅନ୍ତର୍ଜାତୀୟ କ୍ଷେତ୍ରରେ ଶ୍ରେଷ୍ଠ ଫିଲ୍ମ ପୁରସ୍କାର ଲାଭ କରିଛି। ଏହି ଫିଲ୍ମର ନାମ ହେଉଛି ‘ହାଇୱେ ଅଫ୍ ଲାଇଫ୍’, ଯାହା ଫିଲ୍ମ ଡିଭିଜନ ଅଫ୍ ଇଣ୍ଡିଆ ବିଜୁ ଦାସଙ୍କ ଦ୍ୱାରା ସମ୍ପାଦିତ ହୋଇଥିଲା।
ସବୁଠାରୁ ଆଶ୍ଚର୍ଯ୍ୟଜନକ କଥା ହେଉଛି ଡକ୍ଫେଷ୍ଟ ପୁରସ୍କାରରେ ୧୨୪ଟି ଦେଶର ୧୭୯୯ଟି ଫିଲ୍ମ ସାମିଲ ହୋଇଥିଲା। ଯେଉଁଥିରେ ଅମର ମାଇବାମଙ୍କ ଫିଲ୍ମ ଶ୍ରେଷ୍ଠ ବିବେଚିତ ହୋଇଥିଲା। ଏହା ଭାରତର ଏକମାତ୍ର ଫିଲ୍ମ, ଯାହାକି ଡକ୍ଫେଷ୍ଟ ଆଓ୍ବାର୍ଡରେ ଅମରଙ୍କ ଦ୍ୱାରା ସାମିଲ ହୋଇପାରିଥିଲା। କେବଳ ଏତିକି ନୁହେଁ, ଅନ୍ତର୍ଜାତୀୟ ଫିଲ୍ମ ମହୋତ୍ସବରେ ଅମରଙ୍କ ଏହି ଫିଲ୍ମ ଶ୍ରେଷ୍ଠ ନନ୍ ଫିଚର୍ ଫିଲ୍ମ, ଶ୍ରେଷ୍ଠ ନିର୍ଦ୍ଦେଶନା, ଶ୍ରେଷ୍ଠ ସିନେମାଟୋଗ୍ରାଫି ଏବଂ ଶ୍ରେଷ୍ଠ ଏଡିଟିଂ ସମେତ ୪ଟି ପୁରସ୍କାର ପାଇଛି।
ଅମରଙ୍କ ଏହି ଡକ୍ୟୁମେଣ୍ଟାରୀ ହେଉଛି ମୋଟ୍ ୫୨ ମିନିଟ୍ର। ଏଥିରେ ଟ୍ରକ ଡ୍ରାଇଭରଙ୍କ ଜୀବନୀ, ସେମାନେ କିପରି ନିଜ ଜୀବନକୁ ବିପଦରେ ପକାଇ ରାଜପଥରେ ଟ୍ରକ୍ ଚଳାଉଛନ୍ତି ତାହା ଦର୍ଶାଯାଇଛି। ଏପରିକି ସେମାନେ ଟ୍ରକ ତଳେ ଶୋଇଥା’ନ୍ତି ଏବଂ ଯାହା ପାଇଲେ ତାହା ଖାଇବା ପରେ ସନ୍ତୁଷ୍ଟ ହୋଇଥାନ୍ତି। ଏସବୁକୁ ନେଇ ଅମର ନିର୍ଦ୍ଦେଶନା ଏହି ଫିଲ୍ମରେ ବେଶ୍ ବଳିଷ୍ଠ।