ଫୁଲବାଣୀ ଅଫିସ/ଫିରିଙ୍ଗିଆ, ୪ା୩: କନ୍ଧମାଳ ଜିଲା ଫିରଙ୍ଗିଆ ବ୍ଲକ ଡିଣ୍ଡିରାଗାଁ ପଞ୍ଚାୟତ ଟେଲାପାଲି ଗ୍ରାମବାସୀ ଆଜକୁ ଦୀର୍ଘ ୨୨ ବର୍ଷ ହେବ ନାହିଁ ନ ଥିବା ହଇରାଣ ହରକତ ହେଉଛନ୍ତି। ଆଜି ପର୍ଯ୍ୟନ୍ତ ସେମାନଙ୍କ ଦୁଃଖ ପ୍ରଶାସନ କି ରାଜନେତା ଶୁଣୁନାହାନ୍ତି । ଗ୍ରାମକୁ ସଂଯୋଗ କରୁଥିବା ଗାଟେଣୀ ନାଳ ଉପରେ ପୋଲଟିଏ ପାଇଁ ସେମାନଙ୍କୁ ସତେଯେପରି ଅଗ୍ନି ପରୀକ୍ଷା ଦେବାକୁ ପଡୁଛି । ତଥାପି ସେମାନଙ୍କ ଦୁଃଖର ଅନ୍ତ ଘଟୁନାହିଁ । ପୋଲ ନ ଥିବାରୁ ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି । ବର୍ଷାଦିନେ ଗ୍ରାମବାସୀ ଏକ ପ୍ରକାର ବିଚ୍ଛିନାଞ୍ଚଳ ଭାବେ ଜୀବନ ଅତିବାହିତ କରୁଛନ୍ତି । ନିତ୍ୟ ବ୍ୟବହାର୍ଯ୍ୟ ଜିନିଷ ହେଉ ଅବା ଦୈନନ୍ଦିନ ଜୀବନୀ ଲାଗି ଲୋକେ ନାଳ ପାଣି ଭିତରେ ପସି ଯାତାୟତ କରିବାକୁ ବାଧ୍ୟ ହେଉଛନ୍ତି। ସେହିପରି ଗ୍ରାମକୁ ଭଲ ରାସ୍ତା ନ ଥିବାରୁ ଗ୍ରାମବାସୀ ନିଜ ଉଦ୍ୟମରେ ଗ୍ରାମରେ ରାସ୍ତା ନିର୍ମାଣ କରିଛନ୍ତି । ପୋଲ କେବେ ହେବ ତାହାକୁ ସେମାନେ ଚାହିଁ ବସିଛନ୍ତି ।
ଗ୍ରାମବାସୀ ବାରମ୍ବାର ଏହି ନାଳ ଉପରେ ଏକ ପୋଲ କରିବା ପାଇଁ ଅଭିଯୋଗ କରି ଆସୁଛନ୍ତି । ହେଲେ ଆଜି ପର୍ଯ୍ୟନ୍ତ ପୋଲ ନିର୍ମାଣ ହେଉନି । ୨୦୦୧ରେ ପୋଲ ନିର୍ମାଣ ହୋଇଥିଲା । ଗୋଟିଏ ବର୍ଷ ପରେ ପୋଲ ଭାଙ୍ଗିଗଲା । ବର୍ଷା ଦିନ ଆସିଲେ ଯାତାୟତ ବନ୍ଦ । ଆଉ ଦୁଇ ଦିନ ପରେ ଗ୍ରାମରେ ଅଷ୍ଟପ୍ରହରୀ ନାମ ସଂକୀର୍ତ୍ତନ ହେବ । ସେଥିପାଇଁ ବାଇକ, ଅଟୋ ଯିବା ପାଇଁ ଗ୍ରାମବାସୀ ମିଶି ରାସ୍ତା କାମ କରୁଛନ୍ତି। ରାସ୍ତା ଏବଂ ପୋଲ ପାଇଁ ବିଡିଓ, ଜିଲାପାଳ, ବିଧାୟକଙ୍କ ପାଖରେ ଗ୍ରାମବାସୀ ଅଭିଯୋଗ କରୁଛନ୍ତି। କିନ୍ତୁ ଖାଲି ପ୍ରତିଶ୍ରୁତି ମିଳୁଛି, କାମ ହେଉନାହିଁ ବୋଲି ଗ୍ରାମବାସୀ କହିଛନ୍ତି। ପିଲାମାନେ ୨୨ ବର୍ଷ ହେଲାଣି ପାଠ ପଢ଼ିବାକୁ ଯାଇ ପାରୁନାହାନ୍ତି ବୋଲି ଟେଲାପାଲି ଗ୍ରାମ ସିକୁଳିପଦର ସାହି ୧୦ ନଂ ୱାର୍ଡର ଉଦ୍ଧବ କହଁର, ପ୍ରଦୀପ ସାହାଣୀ, ବାପିନା କହଁର, ଜିତେନ୍ଦ୍ର କହଁର, ଗୁଟୁ କହଁର, ଅଶୋକ ସାହାଣୀ, ଅଜିତ କହଁର, ପାର୍ଥବ ସାହାଣୀ ପ୍ରମୁଖ ପ୍ରକାଶ କରିଛନ୍ତି। ଏ ନେଇ ବିଡିଓ ରଶ୍ମୀରଞ୍ଜନ ମହନ୍ତଙ୍କୁ ପଚାରିବାରୁ ପୋଲ ନିର୍ମାଣ ପାଇଁ ବିକେଜିୱାଇ(ବିଜୁ କନ୍ଧମାଳ ଗଜପତି) ଯୋଜନାରେ ଟେଣ୍ଡର ହୋଇଛି। ଖୁବ୍ଶୀଘ୍ର ନିର୍ମାଣ କାର୍ଯ୍ୟ ଆରମ୍ଭ ହେବ ବୋଲି ପ୍ରକାଶ କରିଛନ୍ତି ।