ମା’ ନିଜ ସନ୍ତାନକୁ ସୁରକ୍ଷା ଦେବା, ତା’ର ଉପଯୁକ୍ତ ଲାଳନ ପାଳନ କରିବା ପାଇଁ କିଛି ବି କରିପାରେ। ନାନା କଷ୍ଟ ସହିପାରେ। ଅନେକ ସମୟରେ ସେ ଉଭୟ ମା’ ଓ ବାପାର ଭୂମିକା ବି ତୁଲାଇଥାଏ। ତାମିଲନାଡୁ, ଥୁଥୁକୁଡି ଜିଲାସ୍ଥ କଟ୍ଟନାୟକନ ପଟ୍ଟିର ‘ପେଚିୟାମଲ୍ଲ’ ହେଉଛନ୍ତି ସେମିତି ଜଣେ ମା’ ଯେ କି ଏବେ ଚର୍ଚ୍ଚାରେ ଅଛନ୍ତି। ପେଚିୟାମଲ୍ଲ ସ୍ବାମୀଙ୍କୁ ହରାଇବା ପରେ ବାପ ଛେଉଣ୍ଡ ଝିଅକୁ ସମାଜର କୁଦୃଷ୍ଟିରୁ ରକ୍ଷା କରିବା ଲାଗି ପୁରୁଷ ବେଶ ଧାରଣ କରି ମା’ରୁ ବାପା ପାଲଟିଥିଲେ। ତା’ସହ ସମାଜରେ ସ୍ବାମୀ ନ ଥିବା ସ୍ତ୍ରୀ ଉପରେ ବି ସମସ୍ତେ ଖରାପ ନଜର ପକାନ୍ତି। ତେଣୁ ଏସବୁରୁ ନିଜକୁ ରକ୍ଷା ପାଇବା ଲାଗି ସେ ନିଜର ଲମ୍ବା କେଶକୁ କାଟି ପୁରୁଷଙ୍କ ପରି ଛୋଟ ଛୋଟ କରିଥିଲେ। ନାରୀ ସବୁବେଳେ ସଜେଇ ହୋଇ ରହିବାକୁ ପସନ୍ଦ କରେ। ହେଲେ ସେଇ ସଜବାଜକୁ ସେ ସମ୍ପୂର୍ଣ୍ଣ ଭାବେ ପରିତ୍ୟାଗ କଲେ। ଶାଢି ନ ପିନ୍ଧି ପୁରୁଷଙ୍କ ପରି ଲୁଙ୍ଗି, ସାର୍ଟ ପିନ୍ଧିଲେ। କେହି ସନ୍ଦେହ ନ କରିବା ପାଇଁ ପୁରୁଷଙ୍କ ସହ ମିଶି କାମ କରୁଥିଲେ,ବସ୍ରେ ପୁରୁଷଙ୍କ ସିଟ୍ରେ ବସୁଥିଲେ ଓ ପୁରୁଷଙ୍କ ଟୟଲେଟ୍ ବି ବ୍ୟବହାର କରୁଥିଲେ। ଏହିଭଳି ଦୀର୍ଘ ୩୦ ବର୍ଷ ସେ ରହିଲେ। ନିକଟରେ ତାଙ୍କ ଝିଅର ବାହାଘର ହୋଇଛି। ସ୍ବାମୀ ନିକଟରେ ଝିଅ ସୁରକ୍ଷିତ ଥିବା ଜାଣିବା ପରେ ଯାଇ ପେଚିୟାମଲ୍ଲ ସମସ୍ତଙ୍କୁ ନିଜର ଗୋପନ ପରିଚୟ ଜଣାଇଛନ୍ତି। ଆଉ ଖୋଲି କହିଛନ୍ତି ଯେ, ସେ ପ୍ରକୃତରେ ଜଣେ ପୁରୁଷ ନୁହନ୍ତି ବରଂ ଜଣେ ମହିଳା। ୨୦ ବର୍ଷ ବୟସରେ ପେଚିୟାମଲ୍ଲ ବିବାହ କରିଥିଲେ। ହେଲେ ବିବାହର ମାତ୍ର ୧୫ ଦିନ ପରେ ସ୍ବାମୀ ହୃଦ୍ଘାତରେ ମୃତ୍ୟୁବରଣ କଲେ। ଏହାର କିଛିଦିନ ପରେ ହିଁ ପେଚିୟାମଲ୍ଲ ଜାଣିଲେ ସେ ଗର୍ଭବତୀ ଅଛନ୍ତି। ଆଉ ୯ ମାସ ପରେ ସେ ଏକ କନ୍ୟା ସନ୍ତାନକୁ ଜନ୍ମ ଦେଲେ। ଝିଅର ସୁରକ୍ଷା ପେଚିୟାମଲ୍ଲଙ୍କ ଉପରେ ନ୍ୟସ୍ତ ଥିଲା। ତେଣୁ ସେ ଏହି କଠୋର ନିଷ୍ପତ୍ତି ନେଲେ। ଆଉ ପୁରୁଷ ବେଶ ଧାରଣ କରି ଝିଅର ବାପା ସାଜିଲେ। ଯେମିତିକି କେହି ତାଙ୍କ ଝିଅକୁ ନଜର ଉଠେଇ ଚାହିଁବାକୁ ସାହସ କରିବେନି।
