ବରଗଡ଼,୨୦।୧୦(ପ୍ରେମାନନ୍ଦ ଖମାରୀ): ବରଗଡ଼ ସହର ଉପକଣ୍ଠ ତୋରା ସମବାୟ ଚିନିକଳ ବନ୍ଦ କରିବା ପାଇଁ ରାଜ୍ୟ ସରକାରଙ୍କ ସମବାୟ ସମିତି ସମୂହର ରେଜିଷ୍ଟ୍ରାର ଉଦ୍ଧବ ଚରଣ ମାଝୀ ନିର୍ଦ୍ଦେଶ ଦେଇଛନ୍ତି। ତାଙ୍କ କାର୍ଯ୍ୟାଳୟରୁ ପ୍ରକାଶିତ ନିର୍ଦ୍ଦେଶନାମା ନଂ-୧୮୨୭୩ ତା-୧୬।୧୦।୨୦୨୩ରିଖରେ ବିଭିନ୍ନ କାରଣ ଦର୍ଶାଇ ଉକ୍ତ ଚିନିକଳ ବନ୍ଦ ନିଷ୍ପତ୍ତି ନିଆଯାଇଥିବା ସେ ଉଲ୍ଲେଖ କରିଛନ୍ତି।
ସେଥିରେ ଉଲ୍ଲେଖ ରହିଛି, ୨୦୨୨-୨୩ ଅଡ଼ିଟ୍ ରିପୋର୍ଟ ଅନୁସାରେ ଏହି ଚିନିକଳ ଠିକ୍ ଭାବେ ବ୍ୟବସାୟ କରୁନାହିଁ ଗତ ମାର୍ଚ୍ଚ ୩୧ତାରିଖ ସୁଦ୍ଧା ଚିନିକଳକୁ ୭୨କୋଟି ୫୯ଲକ୍ଷ ଟଙ୍କା କ୍ଷତି ସହିବାକୁ ପଡ଼ିଛି। ସେହିପରି ୧୯୮୯ ଅଗଷ୍ଟ ୨୦ତାରିଖ ପରଠାରୁ ଆଦୌ ବାର୍ଷିକ ସାଧାରଣ ସଭା ଅନୁଷ୍ଠିତ ହୋଇ ନ ଥିବା ୨୦୧୬-୧୭ ଅଡ଼ିଟ୍ ରିପୋର୍ଟରୁ ଜାଣିବାକୁ ମିଳିଛି ବୋଲି ଚିଠିରେ ଉଲ୍ଲେଖ ରହିଛି।
ଏହା ସହିତ ଚିଠିରେ ଆହୁରି ଉଲ୍ଲେଖ ରହିଛି, ଗତ ମେ ୯ତାରିଖରେ ବରଗଡ଼ ସମବାୟ ଚିନିକଳ ପରିଚାଳନା ନିର୍ଦ୍ଦେଶକଙ୍କୁ କାହିଁକି ଏହି ଚିନିକଳକୁ ବନ୍ଦ କରି ଦିଆ ନ ଯିବ, ସେ ନେଇ କାରଣ ଦର୍ଶାଇବା ପାଇଁ ନୋଟିସ୍ ଜାରି କରି ୩୦ଦିନ ମଧ୍ୟରେ ଲିଖିତ ସ୍ପଷ୍ଟିକରଣ ଦେବାକୁ ନିର୍ଦ୍ଦେଶ ଥିଲା। ୨୦୧୬-୧୭ରୁ ଚିନିକଳ ପରିତ୍ୟକ୍ତ ଅବସ୍ଥାରେ ପଡ଼ି ରହିଥିବା, ଚିନିକଳକୁ କ୍ଷତି ସହିବାକୁ ପଡୁଥିବା ଏବଂ ଏହାର ପୁନରୁଦ୍ଧାର ଆଶା କ୍ଷୀଣ ବୋଲି ପରିଚାଳନା ନିର୍ଦ୍ଦେଶକ ସ୍ପଷ୍ଟୀକରଣ ଦେଇଥିଲେ। ସେଭଳି ସ୍ପଷ୍ଟୀକରଣ ମିଳିବା ପରେ ତାକୁ ପରୀକ୍ଷା ନିରୀକ୍ଷା କରାଯାଇଥିଲା। ଏହାପରେ ଚିନିକଳ ପୁନରୁଦ୍ଧାର ଆଶା ସମ୍ଭବ ହେଉ ନ ଥିବା ଯୋଗୁ ବନ୍ଦ ନିଷ୍ପତ୍ତି ନିଆଯାଇଥିବା ଏବଂ ବରଗଡ଼ ଅତିରିକ୍ତ ଜିଲାପାଳ ଲଲାଟ କୁମାର ଲୁହାଙ୍କୁ ପରବର୍ତ୍ତୀ ଆଦେଶ ପର୍ଯ୍ୟନ୍ତ ଚିନିକଳର ଲିକ୍ୟୁଡେଟର ଭାବେ ନିଯୁକ୍ତ କରାଯାଇଥିବା ଚିଠିରେ ଉଲ୍ଲେଖ ରହିଛି ।
ପ୍ରକାଶଥାଉକି, ୧୯୭୪ରେ ତତ୍କାଳୀନ ମୁଖ୍ୟମନ୍ତ୍ରୀ ନନ୍ଦିନୀ ଶତପଥି ବରଗଡ଼ ସମବାୟ ଚିନିକଳକୁ ଉଦ୍ଘାଟନ କରିଥିଲେ। ସେହିଦିନଠାରୁ ଦୀର୍ଘବର୍ଷ ଧରି ଚିନିକଳ ଠିକ୍ଭବେ ଚାଲୁଥିଲା। ଜିଲା ତଥା ଜିଲା ବାହାର ଆଖୁଚାଷୀମାନେ ମଧ୍ୟ ଉକ୍ତ ଚିନିକଳ ଦ୍ୱାରା ଉପକୃତ ହେଉଥିଲେ। ଚିନିକଳ ଅଞ୍ଚଳର ବହୁଲୋକଙ୍କୁ କର୍ମ ଯୋଗାଉଥିଲା। ତେବେ ପରବର୍ତ୍ତୀ ସମୟରେ ଚିନିକଳ ଅକାମୀ ହୋଇ ପଡ଼ିଥିଲା। ଏହାକୁ କାର୍ଯ୍ୟକ୍ଷମ କରିବା ତଥା ବକେୟା ଦରମା ପ୍ରଦାନ ଦାବିରେ କର୍ମଚାରୀମାନେ ଆନ୍ଦୋଳନକୁ ଓହ୍ଲାଇଥିଲେ। ସେହିପରି ମୁଖ୍ୟମନ୍ତ୍ରୀ ଚିନିକଳକୁ ୧୧କୋଟି ଟଙ୍କାର ପ୍ୟାକେଜ ଘୋଷଣା କରିଥିଲେ। କିନ୍ତୁ ତାହା ମଧ୍ୟ ମିଳି ନ ଥିଲା ଏବଂ ଶେଷରେ ଚିନିକଳ ବନ୍ଦ ନିର୍ଦ୍ଦେଶ ଜାଣିବା ପରେ ଅଞ୍ଚଳରେ ଅସନ୍ତୋଷ ପ୍ରକାଶ ବଢ଼ିବାରେ ଲାଗିଛି।