ବମ୍ବେ: ଆଗାମୀ ସାଧାରଣ ନିର୍ବାଚନକୁ ନେଇ ଦେଶରେ ରାଜନୈତିକ ପାଣିପାଗ ସରଗରମ। ଗୋଟିଏ ପଟେ ଭାଜପା ପୁଣି ଥରେ ସତ୍ତାକୁ ଫେରିବାକୁ ଚେଷ୍ଟା କରୁଥିବା ବେଳେ ବିରୋଧୀ କଂଗ୍ରେସ ଏପରି ନ ହେବାକୁ ପ୍ରାଣପଣେ ଚେଷ୍ଟା କରୁଛି। ଏଭଳି ସମୟରେ ବଲିଉଡ କଳାକାରମାନଙ୍କ ମଧ୍ୟରୁ କିଛି ମୋଦିଙ୍କୁ ବିରୋଧ କରି କଂଗ୍ରେସ ସପକ୍ଷରେ ବୟାନବାଜି କରୁଥିବା ଦେଖିବାକୁ ମିଳୁଛି। ଏହି କ୍ରମରେ ମହାରାଷ୍ଟ୍ରର ଲାତୁରରେ କଂଗ୍ରେସର ଏକ ରାଲିକୁ ସମ୍ବୋଧିତ କରିବା ସମୟରେ ଅଭିନେତା ରିତେଶ ଦେଶମୁଖ ମୋଦିଙ୍କୁ ନେଇ ଟିପ୍ପଣୀ ଦେଇଛନ୍ତି। ସେ କହିଛନ୍ତି, ପ୍ରଧାନମନ୍ତ୍ରୀ ୫୬ ଇଞ୍ଚର ଛାତି ଥିବା କୁହନ୍ତି, ମାତ୍ର ଏକଦା ପ୍ରିୟଙ୍କା ଗାନ୍ଧୀ କହିଥିଲେ ଦେଶ ଚଳାଇବା ଲାଗି ୫୬ଇଞ୍ଚର ଛାତି ନୁହେଁ ବରଂ ଗୋଟିଏ ଭଲ ହୃଦୟ ଥିବା ଆବଶ୍ୟକ। ୫୬ ଇଞ୍ଚର ଛାତି କିଭଳି ଜଣଙ୍କର ରହିପାରିବ ତାହା ମୋତେ ଆଶ୍ଚର୍ଯ୍ୟ କରିଛି। କାରଣ ଲୋକେ କେବଳ ଏଭଳି ଆଲମାରି କିିଣି ପାରିବେ। ଦେଶରେ ଏହା ପରିବର୍ତ୍ତନ ଆଣିପାରିବ ନାହିଁ ବୋଲି ରିତେଶ କହିଥିଲେ।
କେବଳ ଭାଜପା ବିରୋଧରେ ନୁହେଁ ରିତେଶ ଭାରତକୁ କଂଗ୍ରେସର ଅବଦାନ ବିଷୟରେ କହିଥିଲେ। କଂଗ୍ରେସ ଯୋଗୁ ଭାରତ ଆଜି ସ୍ବାଧୀନ। ଲୋକଙ୍କ ପାଖରେ ମୋବାଇଲ ଫୋନ ରହିଛି। କମ୍ପ୍ୟୁଟର ମଧ୍ୟ କଂଗ୍ରେସର ଅବଦାନ ବୋଲି ସେ କହିଛନ୍ତି।
ରିତେଶଙ୍କ ବାପା ସ୍ବର୍ଗତ ବିଳାଶ ରାଓ ଦେଶମୁଖ ଜଣେ ପ୍ରମୁଖ କଂଗ୍ରେସ ନେତା ଥିଲେ। ଏଣୁ ତାଙ୍କୁ କଂଗ୍ରେସ ପ୍ରଚାର ଦାୟିତ୍ୱ ଦେଇଥିବା କୁହାଯାଉଛି।