ଖୋର୍ଦ୍ଧା ଅଫିସ,୧୭ା୧:ଚିଲିକା ନିର୍ବାଚନମଣ୍ଡଳୀରେ ବିଜେଡିର ଦୁଇ ନେତାଙ୍କ ମଧ୍ୟରେ ଆରୋପ ପ୍ରତ୍ୟାରୋପ ନେଇ ରାଜନୀତି ଜୋର ଧରିଛି। ବିଧାୟକ ପ୍ରଶାନ୍ତ ଜଗଦ୍ଦେବ ମକର ସଂକ୍ରାନ୍ତିରେ ଅଟ୍ରି ହଟ୍ଟକେଶ୍ୱରଙ୍କ ଦର୍ଶନ କରିବାକୁ ଆସିଥିବା ଅବସରରେ ପୂର୍ବତନ ବିଧାୟକ ରଘୁନାଥ ସାହୁଙ୍କ ବିରୋଧରେ ବିଭିନ୍ନ ଅଭିଯୋଗ ଆଣିବା ସହ ସମାଲୋଚନା କରିଥିଲେ। ଏପରି କି ତାଙ୍କୁ ମଦ ଓ କାଠ ମାଫିଆ ବୋଲି କହିଥିଲେ ଜଗଦ୍ଦେବ। ଏହି ଅଭିଯୋଗ ଓ ସମାଲୋଚନା ଉପରେ ପ୍ରତିକ୍ରିୟା ରଖିଛନ୍ତି ପୂର୍ବତନ ବିଧାୟକ ରଘୁନାଥ। ସେ କହିଛନ୍ତି ଯେ, ଜଗଦ୍ଦେବ ମୋ ବିରୋଧରେ ଆଣିଥିବା ଅଭିଯୋଗ ଭିତ୍ତିହୀନ। ସେ ଜଣେ ପେସାଦାର ଅପରାଧୀ। ବାଣପୁରରେ ଲୋକଙ୍କ ଉପରକୁ ଗାଡି ମଡ଼ାଇ ଦେବା ଘଟଣାରେ ସୁପ୍ରିମକୋର୍ଟ ତାଙ୍କୁ ସର୍ତ୍ତମୂଳକ ଜାମିନ ପ୍ରଦାନ କରିଛନ୍ତି। ଜଣେ ପେସାଦାର ଅପରାଧୀ, ସେ କେବେ ନିଜ ଭୁଲ ସ୍ବୀକାର କରେ ନାହିଁ। ଏଭଳି ଜଣେ ରାଜନେତା ସମାଜରେ ବିରଳ। ମୁଖ୍ୟମନ୍ତ୍ରୀ ଦୁର୍ନୀତି, ଅପରାଧୀଙ୍କୁ ପ୍ରଶ୍ରୟ ଦିଅନ୍ତି ନାହିଁ। ତେଣୁ ଦଳରୁ ତାଙ୍କୁ ନିଲମ୍ବିତ କରିଛନ୍ତି।
ପୂର୍ବତନ ବିଧାୟକ ରଘୁନାଥ ଆହୁରି କହିଛନ୍ତି ଯେ, ଖୋର୍ଦ୍ଧା ଜିଲାରେ ଚିଲିକା ନିର୍ବାଚନମଣ୍ଡଳୀର ମର୍ଯ୍ୟାଦା ରହିଛି। ଅତୀତରେ ଯେଉଁମାନେ ଏଠାରୁ ନିର୍ବାଚିତ ହୋଇଛନ୍ତି, ସେମାନେ ନିଜ ପଦ ମର୍ଯ୍ୟାଦା ବଜାୟ ରଖିଛନ୍ତି। କିନ୍ତୁ ଜଗଦ୍ଦେବ ଚିଲିକା ମର୍ଯ୍ୟାଦା ହାନି କରିଛନ୍ତି। ୨୦୧୯ ସାଧାରଣ ନିର୍ବାଚନ ପୂର୍ବରୁ ମୁଁ ରାମ ଓ ସେ ହନୁମାନ ଥିଲେ। ଜିତିବା ପରେ ରାମ ବନବାସ ଚାଲିଗଲେ। ହେଲେ ହନୁମାନ ଅପରାଧୀ ପାଲଟିଗଲେ। ୩ବର୍ଷ ଭିତରେ ଚିଲିକାର ବିକାଶ ଠପ୍ ହୋଇଯାଇଛି। ସମୟ କହିବ, କିଏ ଠିକ୍। ଯାହାକୁ ଦଳ, ସ୍ଥାନୀୟ ନିର୍ବାଚନମଣ୍ଡଳୀ ଲୋକେ ପ୍ରତ୍ୟାଖ୍ୟାନ କରିଛନ୍ତି, ସେ ପୁଣି ଅନ୍ୟ ଉପରକୁ ଅଙ୍ଗୁଳି ଉଠାଉଛି। ଜିଲା ସଭାପତି କାହାକୁ ଦଳର ଦୁର୍ଯ୍ୟୋଧନ ଓ କାହା ପାଇଁ ଯନ୍ତା ପକାଇଛନ୍ତି ସେ ଜାଣିଥିବେ। ଏ ସମ୍ପର୍କରେ କୌଣସି ମନ୍ତବ୍ୟ ଦେବାକୁ ଚାହୁନି ବୋଲି ସାହୁ କହିଥିଲେ। ଅନ୍ୟପକ୍ଷରେ କିଛି ଦିନ ଗଲେ ଦଳରୁ ନିଲମ୍ବନ ଆଦେଶ ଉଠିଯିବ। ମୁଖ୍ୟମନ୍ତ୍ରୀ ଯାହା ନିଷ୍ପତ୍ତି ନେବେ, ତାକୁ ଗ୍ରହଣ କରିବେ ବୋଲି କହିଛନ୍ତି ପ୍ରଶାନ୍ତ। ପ୍ରକାଶ ଯେ, ୨୦୦୯ରେ ଚିଲିକା ନିର୍ବାଚନମଣ୍ଡଳୀରେ ରଘୁନାଥ ସାହୁ ବିଧାୟକ ରହିଥିଲେ। ୨୦୧୪ ନିର୍ବାଚନରେ ହାରିଥିଲେ। ୨୦୧୪ରେ ଜଗଦ୍ଦେବ ବେଗୁନିଆ ନିର୍ବାଚନମଣ୍ଡଳୀରୁ ବିଧାୟକ ରହିଥିବା ବେଳେ ୨୦୧୯ରେ ଚିଲିକାରୁ ବିଜୟୀ ହୋଇଥିଲେ। ଏହା ପରେ ଉଭୟଙ୍କ ମଧ୍ୟରେ ବିବାଦ ବଢ଼ିଥିଲା।