ବରପାଲି,୨୦।୯(ଡି.ଏନ.ଏ.): ବରପାଲି ଏନ୍ଏସି ୱାର୍ଡ ନଂ. ୩ ଅଧୀନ କାଇଁଶିର ରୋଡ୍, ବେହେରାପଡା ଓ ଗୋପାଇପାଲି ମେନ୍ ରୋଡ୍ରେ ବାସ କରୁଥିବା କିଛି ଲୋକ ଜମିପଟ୍ଟା ପାଇନାହାନ୍ତି। ଫଳରେ ସେମାନଙ୍କୁ ଜମିପଟ୍ଟା ପ୍ରଦାନ ଦାବି କରି ସୋମବାର ଉକ୍ତ ଲୋକମାନେ ସ୍ଥାନୀୟ ତହସିଲଦାରଙ୍କୁ ଏକ ଦାବିପତ୍ର ଦେଇଛନ୍ତି।
ବରପାଲି ୱାର୍ଡ ନଂ. ୩ର ପ୍ରାୟ ୪୦ ଜଣ ଭୂମିହୀନ ବସ୍ତିବାସିନ୍ଦା ଓ ଗୋପାଇପାଲି ମେନ ରୋଡ଼ ପାର୍ଶ୍ୱରେ ରହୁଥୁବା ଭୂମିହୀନମାନ ସରକାରଙ୍କ ଜାଗା ମିଶନ ଯୋଜନାରେ ଜମିପଟ୍ଟା ପାଇଁ ଆବେଦନ କରିଥିଲେ। ଡ୍ରୋନ ସହାୟତାରେ ଚିହ୍ନଟ କରି ସେମାନଙ୍କୁ ଉଚିତ ହିତାଧିକାରୀ ବୋଲି ପ୍ରମାଣପତ୍ର ମଧ୍ୟ ପ୍ରଦାନ କରାଯାଇଥିଲା। ସେମାନଙ୍କ ନାମରେ ରାସନ କାର୍ଡ ରହିଛି। ପାଇଖାନା ତିଆରି କରିବା ପାଇଁ ବରପାଲି ଏନ୍ଏସିରୁ ଏହି ବସ୍ତିବାସୀଙ୍କ ନାମରେ ୱାର୍କ ଅର୍ଡର ମଧ୍ୟ ଆସିଛି । କିନ୍ତୁ ବର୍ତ୍ତମାନ ସେମାନଙ୍କୁ ଗ୍ରାମାଞ୍ଚଳର ବାସିନ୍ଦା କହି ପଟ୍ଟାଦେବା ପାଇଁ ମନା କରାଯିବାରୁ ହିତାଧିକାରୀମାନେ ସ୍ଥାନୀୟ ଏନ୍ଏସି ଅଧିକାରୀଙ୍କୁ ଏ ସମ୍ପର୍କରେ ଗତ ୧୩ତାରିଖରେ ଲିଖିତ ଅଭିଯୋଗ କରିଥିଲେ। ସେହିପରି ପୂର୍ବରୁ ଗୋପାଇପାଲି ରାସ୍ତା କଡରେ ବସବାସ କରୁଥିବା ଲୋକଙ୍କୁ ସ୍ଥାୟୀ ପଟ୍ଟା ଦିଆଯିବ ବୋଲି ପ୍ରତିଶ୍ରୁତି ଦିଆଯାଇଥିଲେ ମଧ୍ୟ ତାର କୋଣସି ସମାଧାନ ହୋଇନାହିଁ। ଫଳରେ ଜିଲା ଯୁବ କଂଗ୍ରେସ ସଭାପତି ଅଭିଷେକ ସେଠଙ୍କ ନେତୃତ୍ୱରେ ସମସ୍ତ ହିତାଧିକାରୀ ତହସିଲଦାରଙ୍କୁ ଭେଟି ଜମିପଟ୍ଟା ପ୍ରଦାନ ପାଇଁ ଦାବି କରିଛନ୍ତି। ଏ ସମ୍ପର୍କରେ ତହସିଲଦାର ଅକ୍ଷୟ କୁମାର ବାଘଙ୍କୁ ପଚାରିବାରୁ ବସ୍ତିବାସୀଙ୍କ ଦାବି ନେଇ ଜିଲାପାଳ ଓ ଏନ୍ଏସି କାର୍ଯ୍ୟନିବାହୀ ଅଧିକାରୀଙ୍କୁ ଜଣାଇବି ଏବଂ ଯେତେ ଶୀଘ୍ର ହେବ ତାର ସମାଧାନ କରିବି ବୋଲି ପ୍ରତିଶ୍ରୁତି ଦେଇଥିଲେ।
ତହସିଲଦାରଙ୍କୁ ଦାବିପତ୍ର ଦେବାକୁ ଆସିଥିବା ହିତାଧିକାରୀବୃନ୍ଦ।