ଯାଜପୁର ଅଫିସ,୭ା୨:ଦୀର୍ଘ ବର୍ଷ ହେଲା ବ୍ୟାସନଗର ସହରର ବିଭିନ୍ନ ସମସ୍ୟା ଅସମାହିତ ହୋଇରହିଛି। ବାର୍ଷିକ ବିପୁଳ ଟଙ୍କା ବ୍ୟୟବରାଦ ହେଉଥିଲେ ସୁଦ୍ଧା ସହରର ଡ୍ରେନେଜ ବ୍ୟବସ୍ଥା ସୁଧୁରି ପାରିନାହିଁ। ବ୍ୟାସନଗର ପୌରାଞ୍ଚଳର ୩ ନମ୍ବର ୱାର୍ଡ ବଙ୍ଗାଲିସାହି(ରୁଦ୍ରନଗର)ର ମୁଖ୍ୟରାସ୍ତାରେ ଥିବା ସରକାରୀ ଡ୍ରେନକୁ ଏହାର ଉଦାହରଣ ଭାବେ ନିଆଯାଇପାରେ। ଏହି ଡ୍ରେନକୁ ଲାଗି ଥିବା ଏକ ଘରେ ୩୦ରୁ ଊର୍ଦ୍ଧ୍ୱ ପିଲା ତାଲିମ ପାଇଁ ଭଡା ସୂତ୍ରରେ ରହୁଛନ୍ତି। ସେମାନଙ୍କ ଲାଟ୍ରିନ, ଗାଧୁଆ ପାଣି ଅଧାପନ୍ତରିଆ ଡ୍ରେନରେ ଛାଡୁଛନ୍ତି। ସେହି ପାଣି ମୁଖ୍ୟ ରାସ୍ତାରେ ପ୍ରବାହିତ ହୋଇ ଦୁର୍ଗନ୍ଧମୟ ପରିବେଶ ସୃଷ୍ଟି ହେଉଛି। ଏ ସମ୍ପର୍କରେ ବ୍ୟାସନଗର ନିର୍ବାହୀ ଅଧିକାରୀ ଏବଂ ପୌରାଧ୍ୟକ୍ଷାଙ୍କୁ ବାରମ୍ବାର ଲିଖିତ ଅଭିଯୋଗ କରାଯାଇଥିଲେ ସୁଦ୍ଧା କେହି ଶୁଣୁନାହାନ୍ତି। ଡ୍ରେନ୍ କାର୍ଯ୍ୟ ସମ୍ପୂର୍ଣ୍ଣ କରିବା ବଦଳରେ ନୀରବଦ୍ରଷ୍ଟା ସାଜିଛନ୍ତି। ସ୍ବାୟତ୍ତ ଶାସନ ସଂସ୍ଥାର ମୌଳିକ ଦାୟିତ୍ୱ ସହରରେ ସ୍ବଚ୍ଛ ଓ ସୁସ୍ଥ ପରିମଳ ବ୍ୟବସ୍ଥା କରିବା, କିନ୍ତୁ ତାହା ଏଠାରେ ପରାହତ ହେଉଛି।
ଡ୍ରେନେଜ୍ ଓ ପରିମଳ କ୍ଷେତ୍ରରେ ଅବହେଳା ଯୋଗୁ ବ୍ୟାସନଗର ସହରବାସୀ ଦୀର୍ଘଦିନ ହେଲା ରୁନ୍ଧି ହେଉଛନ୍ତି। ମ୍ୟୁନିସିପାଲିଟିର ଏହି ଆଭିମୁଖ୍ୟ ପାଇଁ ସହରର ବାୟୁ ଏବଂ ବିଭିନ୍ନ ନଦୀନାଳ ଜଳ ବିଷାକ୍ତ ହେଉଛି। ଡ୍ରେନେଜ ବ୍ୟବସ୍ଥାରେ ବହିର୍ଗମନ ପଥ ନ ଥିବାରୁ ପ୍ରାୟ ୭୦ ପ୍ରତିଶତ ବିଷାକ୍ତ ଜଳ ସହରର ବିଭିନ୍ନ ସ୍ଥାନ, ପୋଖରୀ ଆଦି ସ୍ଥାନରେ ଜମା ରହୁଛି। ଏପରି କି ପୌରାଣିକ ବ୍ୟାସସରୋବର ସମେତ ସଂଲଗ୍ନ ଜଙ୍ଗଲ ପ୍ରତି ବିପଦ ମାଡ଼ି ଆସିିଛି। ଖାଲି ସେତିକି ନୁହେଁ, ଗଣ୍ଡାନାଳ ପାଣି ବ୍ରାହ୍ମଣୀର ଉପନଦୀ ଖରସ୍ରୋତାରେ ମିଶୁଥିବାରୁ ପାନୀୟ ଏବଂ ଅନ୍ୟାନ୍ୟ କାର୍ଯ୍ୟରେ ବ୍ୟବହାର କରୁଥିବା ନଦୀକୁଳିଆ ଗ୍ରାମାଞ୍ଚଳ ଅଧିବାସୀଙ୍କ ପାଇଁ ଯାଜପୁର ମ୍ୟୁନିସିପାଲିଟି ଅପରାଧୀ ସାଜିଛି। ସମ୍ପ୍ରତି ସହରର ୩ ନମ୍ବର ୱାର୍ଡର ବଙ୍ଗାଲିସାହି ବାସିନ୍ଦାଙ୍କ ପାଇଁ ଏବେ ସୁସ୍ଥ ପରିବେଶ ମିଳିବା ସ୍ବପ୍ନ ହୋଇଛି। ନାରାୟଣ ମଣ୍ଡଳ, ମାନସ କୁମାର ଜେନା, ତପନ ସରକାର ପ୍ରମୁଖ ସାହିବାସିନ୍ଦା କୁହନ୍ତି, ୫ ମାସ ହେଲା ଅଧାପନ୍ତରିଆ ଡ୍ରେନ କାର୍ଯ୍ୟ ସାରିବାକୁ ଏବଂ ରାସ୍ତାରେ ଆବର୍ଜନା ପାଣି ନ ଛାଡ଼ିବାକୁ ପୌର କର୍ତ୍ତୃପକ୍ଷଙ୍କୁ ଅନୁରୋଧ କରାଯାଉଛି। କିନ୍ତୁ କୌଣସି ପଦକ୍ଷେପ ନିଆଯାଉନାହିଁ। ତେଣୁ ବାଧ୍ୟ ହୋଇ ଉକ୍ତ ଡ୍ରେନକୁ ପୋତି ଦିଆଯିବ ଏବଂ ଏଥିପାଇଁ ପୌର କର୍ତ୍ତୃପକ୍ଷ ଦାୟୀ ରହିବେ ବୋଲି ସେମାନେ ଚେତାବନୀ ଦେଇଛନ୍ତି।