![](https://www.dharitri.com/wp-content/uploads/2024/07/1-42.jpg)
ବେଜିଂ,୨୧ା୭: ଚାଇନାର ଜଣେ ନବ ବିବାହିତ ବ୍ୟକ୍ତି ନିଜ ସ୍ତ୍ରୀଙ୍କୁ ଭେଟିବା ପାଇଁ ଦୈନିକ ୩୨୦ କି.ମି. ଯାତ୍ରା କରି ଚର୍ଚ୍ଚାକୁ ଆସିଛନ୍ତି। ସ୍ତ୍ରୀଙ୍କ ପ୍ରତି ଭଲ ପାଇବା ତାଙ୍କୁ ପ୍ରତିଦିନ ଏତେ ବାଟକୁ ଟାଣିନେଉଥିବା ବିଷୟ ସେ ସୋସିଆଲ ମିଡିଆରେ ପୋଷ୍ଟ କରିଛନ୍ତି। ତାଙ୍କ ଷ୍ଟୋରି ଏବେ ଭାଇରାଲ ହେବାରେ ଲାଗିଛି।
ସାଉଥ୍ ଚାଇନା ମର୍ନିଂ ପୋଷ୍ଟ୍ରେ ପ୍ରକାଶିତ ରିପୋର୍ଟ ଅନୁସାରେ ହାଇୟର କମ୍ପାନୀରେ କାର୍ଯ୍ୟରତ ୩୧ ବର୍ଷୀୟ ଲିନ୍ ଶୁ ପୂର୍ବ ଚାଇନାର ଶାନ୍ଡୋଙ୍ଗ୍ସ୍ଥିତ ଓ୍ବେଇଫାଙ୍ଗ୍ରେ ରୁହନ୍ତି। ବିବାହ କରିବା ପରଠୁ ସେ ଭୋର୍ ୫ଟାରେ ଉଠି ୫ଟା ୨୦ରେ ଘର ଛାଡ଼ନ୍ତି। ଗନ୍ତବ୍ୟସ୍ଥଳ କିଙ୍ଗଡାଓ ସହରରେ ପହଞ୍ଚତ୍ବା ପାଇଁ ଟ୍ରେନ୍ ଧରିବା ଲାଗି ସେ ୬ଟା ୧୫ରୁ ଇ-ବାଇକ୍ରେ ୩୦ ମିନିଟ୍ ଯାତ୍ରା କରନ୍ତି। ପରେ ସେ ୧୫ ମିନିଟ ଚାଲି ନିଜ ଅଫିସରେ ପହଞ୍ଚନ୍ତି। ପୂର୍ବାହ୍ନ ୯ଟାରେ କମ୍ପାନୀ କାର୍ଯ୍ୟ ଆରମ୍ଭ ପୂର୍ବରୁ ଜଳଖିଆ ପାଇଁ ତାଙ୍କୁ ପର୍ଯ୍ୟାପ୍ତ ସମୟ ମିଳିଥାଏ। ଅଫିସ କାମ ସରିବା ପରେ ଲିନ୍ଙ୍କୁ ୧୬୦ କି.ମି. ଦୂରରେ ଥିବା ନିଜ ଘରକୁ ଫେରିବା ପାଇଁ ଆହୁରି ୩ରୁ ୪ ଘଣ୍ଟା ଲାଗିଥାଏ। ଲିନ୍ଙ୍କୁ ଏତେ ବାଟ ଯାତ୍ରା ପାଇଁ ମାସକୁ ୧,୬୦୦ ୟୁଆନ୍ ଖର୍ଚ୍ଚ କରିବାକୁ ପଡ଼ିଥାଏ। ଅଫିସ୍ ଥିବା କିଙ୍ଗ୍ଡାଓରେ ଏକ ଓ୍ବାନ୍-ବେଡ୍ରୁମ୍ ଫ୍ଲାଟ୍ ନେବାକୁ ହେଲେ ମାସକୁ ୧,୭୫୨ ୟୁଆନ୍ ଦେବାକୁ ପଡ଼ିବ। ସେହି ଦୃଷ୍ଟିରୁ ଏହି ଯାତ୍ରାରେ ଅପେକ୍ଷାକୃତ କମ୍ ଖର୍ଚ୍ଚ କରିବାକୁ ପଡ଼ୁଛି ବୋଲି ଲିନ୍ କହିଛନ୍ତି।
ଲିନ୍ ଦିନକୁ ଯାତ୍ରାରେ ୬ ଘଣ୍ଟା ବିତାଉଥିବା ଦେଖି ସୋସିଆଲ ମିଡିଆ ୟୁଜର୍ସ ଆଶ୍ଚର୍ଯ୍ୟଚକିତ ହୋଇଯାଇଛନ୍ତି। ତେବେ ଲିନ୍ ଏହାକୁ କେବଳ ପ୍ରେମ ଯୋଗୁ ସମ୍ଭବ ବୋଲି କହିଛନ୍ତି। ଲିନ୍ ଗତ ମେ’ରେ ବିବାହ କରିବା ପୂର୍ବରୁ ୭ ବର୍ଷ ଧରି ପ୍ରେମିକାଙ୍କ ସହ ରିଲେଶନ୍ରେ ଥିଲେ। ତାଙ୍କ ସ୍ତ୍ରୀ ଓ୍ବେଇଫାଙ୍ଗ୍ ବାସିନ୍ଦା ହୋଇଥିବାବେଳେ ଏହି ନବଦମ୍ପତି ଶାନ୍ଡୋଙ୍ଗ୍ ପ୍ରଦେଶରେ ଏକ ଫ୍ଲାଟ୍ କିଣିଛନ୍ତି। ତାଙ୍କ ସ୍ତ୍ରୀ ମଧ୍ୟ କିଙ୍ଗ୍ଡାଓରେ ଚାକିରି ଖୋଜୁଛନ୍ତି। ତାଙ୍କୁ ନିଯୁକ୍ତି ମିଳିଲେ ଉଭୟେ ସେଠାରେ ଏକାଠି ରହିବେ ବୋଲି ଲିନ୍ କହିଛନ୍ତି। ସେ ନିଜ ଦୈନନ୍ଦିନ ଯାତ୍ରାର ଅନେକ ଭିଡିଓ ଚାଇନା ସୋସିଆଲ ମିଡିଆ ପ୍ଳାଟ୍ଫର୍ମ ଡୋଉୟିନ୍ରେ ଶେୟାର କରନ୍ତି। ଲିନ୍ଙ୍କ ଏହି ଲଭ୍ ଷ୍ଟୋରିକୁ ୭ ନିୟୁତରୁ ଅଧିକ ୟୁଜର୍ସ ଦେଖିସାରିଲେଣି।