ରାଜନୈତିକ ସ୍ବାର୍ଥ ପାଇଁ ଭାରତ ଯୋଡ ଯାତ୍ରାରେ ଛୋଟପିଲା ସାମିଲ, ଏନସିପିସିଆର ପକ୍ଷରୁ କାର୍ଯ୍ୟାନୁଷ୍ଠାନ ଦାବି…

ନୂଆଦିଲ୍ଲୀ, ୧୩।୯ : ଜାତୀୟ ଶିଶୁ ସୁରକ୍ଷା ଅଧିକାର ଆୟୋଗ (ଏନସିପିସିଆର) ପକ୍ଷରୁ ନିର୍ବାଚନ ଆୟୋଗଙ୍କ ନକଟରେ କଂଗ୍ରେସ ଏବଂ ରାହୁଲ ଗାନ୍ଧୀଙ୍କ ବିରୋଧରେ ଅଭିଯୋଗ କରିଛି। କଂଗ୍ରେସର ଭାରତ ଯୋଡ ଯାତ୍ରା ସମୟରେ ପିଲାମାନଙ୍କୁ ରାଜନୈତିକ ସ୍ବାର୍ଥ ପାଇଁ ବ୍ୟବହାର କରାଯାଉଥିବା ଅଭିଯୋଗ ହୋଇଛି ବୋଲି ଏନସିପିସିଆର କହିଛି। ଏହି ପ୍ରସଙ୍ଗରେ କଂଗ୍ରେସ ଏବଂ ଏହାର ନେତା ରାହୁଲ ଗାନ୍ଧୀଙ୍କ ବିରୋଧରେ ହୋଇଥିବା ଅଭିଯୋଗ ଉପରେ ଆବଶ୍ୟକ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ଏବଂ ସମଗ୍ର ଘଟଣାର ତଦନ୍ତ କରାଯାଉ ବୋଲି ଏନସିପିସିଆର ଦାବି କରିଛି।

ରାହୁଲ ଗାନ୍ଧୀ ଏବଂ ଜବାହର ବାଲ ମଞ୍ଚ ପିଲାମାନଙ୍କୁ ରାଜନୈତିକ ଉଦ୍ଦେଶ୍ୟରେ ବ୍ୟବହାର କରୁଛନ୍ତି ଏବଂ ସେମାନଙ୍କୁ ରାଜନୈତିକ କାର୍ଯ୍ୟକଳାପରେ ଜଡିତ କରୁଛନ୍ତି ବୋଲି ଏନସିପିସିଆର ଏକ ଅଭିଯୋଗ ଦାଖଲ କରିଛି। ସୋସିଆଲ ମିଡିଆରେ ଚିନ୍ତା ସୃ୍ଯଯି କରୁଥିବା ଏଭଳି ଅନେକ ଫଟୋ ଏବଂ ଭିଡିଓ ରହିଛି। ଯେଉଁଥିରେ ଭାରତ ଯୋଡ ଯାତ୍ରାରେ, ଶିଶୁ ଯୋଡ ସ୍ଲୋଗାନରେ ପିଲାମାନଙ୍କୁ ଯାତ୍ରାରେ ସାମିଲ କରାଯିବାକୁ କୁହାଯାଉଛି।

ଏନସିପିସିଆର ଅଭିଯୋଗ କରିଛି ଯେ ଏହା ନିର୍ବାଚନ ଆୟୋଗଙ୍କ ନିୟମର ଉଲ୍ଲଂଘନ କରୁଛି । ଯେଉଁଥିରେ କେବଳ ବୟସ୍କମାନେ ଏକ ରାଜନୈତିକ ଦଳର ଅଂଶ ହୋଇପାରିବେ ବୋଲି ସୂଚିତ ହୋଇଛି। ଏନସିପିସିଆର ନିର୍ବାଚନ ଆୟୋଗଙ୍କୁ ଲେଖିଥିବା ଏକ ପତ୍ରରେ କହିଛି ଯେ ଏହା ଶିଶୁଙ୍କର ଅଧିକାରର ଉଲ୍ଲଂଘନ। ଏକ ରାଜନୈତିକ ଏଜେଣ୍ଡା ପୂରଣ କରିବା ପାଇଁ ପିଲାମାନଙ୍କର ବ୍ୟବହାର ହେଉଛି ଶିଶୁ ନିର୍ଯାତନା, ଯାହା ସେମାନଙ୍କର ମାନସିକ ସ୍ବାସ୍ଥ୍ୟ ଉପରେ ଦୀର୍ଘକାଳୀନ ପ୍ରଭାବ ପକାଇପାରେ। ଏହା ଭାରତୀୟ ସମ୍ବିଧାନର ଧାରା ୨୧ର ବିରୁଦ୍ଧ ଅଟେ।

ତେଣୁ, ଏହି ଘଟଣାର ପୁଙ୍ଖାନୁପୁଙ୍ଖ ଅନୁସନ୍ଧାନ କରିବା ସହ ଅଭିଯୋଗରେ ଉଲ୍ଲେଖ କରାଯାଇଥିବା ରାଜନୈତିକ ଦଳ ତଥା ଏହାର ସଦସ୍ୟଙ୍କ ବିରୋଧରେ ଆବଶ୍ୟକ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଅନୁରୋଧ କରାଯାଉଛି ବୋଲି ଏନସିପିସିଆର କହିଛି।