କଳିଙ୍ଗନଗର,୨୨।୧୨(ଡି.ଏନ୍.ଏ.): ଯାଜପୁର ଜିଲା ଚୋରଦା-ଡୁବୁରୀ ୬ ଚକିଆ ରାସ୍ତା ନିର୍ମାଣ ପାଇଁ ସୋମବାରଠାରୁ ଦାନଗଦୀ ବଜାରରେ ଜବରଦଖଲ ଉଚ୍ଛେଦ ପ୍ରକ୍ରିୟା ସକାଳ ୧୦ଟାରୁ ଆରମ୍ଭ ହୋଇଛି। ପ୍ରଥମେ ମାନପୁର ଓଭର ବ୍ରିଜ ନିକଟରୁ ଗୋଟିଏ ପଟ ଉଚ୍ଛେଦ କରାଯାଇଥିଲା। ସିଙ୍ଗାଗାଡିଆରେ ଦୋକାନ ଘର ଭାଙ୍ଗିବା ପରେ ସୁକିନ୍ଦା ବିଧାୟକ ଇଂ ପ୍ରୀତିରଞ୍ଜନ ଘଡାଇଙ୍କ ଦଳୀୟ କାର୍ଯ୍ୟାଳୟର ମୁଖ୍ୟ ଫାଟକ ସମେତ ଏକ ଛାତ ଘରକୁ ଭଙ୍ଗା ଯାଇଥିଲା। ପରେ ଦାନଗଦୀ ବଜାର ଆଡକୁ ଏହି ଅଭିଯାନ ମାଡି ଚାଲିଥିଲା। ଡ.ହେମନ୍ତ ସାହୁ, ପ୍ରେମ ପଟ୍ଟନାୟକ, ଭରତ ସାମଲଙ୍କ ଘର ଭଙ୍ଗା ଯାଇଥିଲା। ଉଚ୍ଛେଦ ପୂର୍ବରୁ କେତେଜଣ ଦୋକାନୀ ନିଜ ଜିନିଷ ପତ୍ର ବାହାର କରି ନ ଥିବାରୁ ସମୟ ଦେବାକୁ ଦାବି କରିଥିଲେ। ହେଲେ ଉଚ୍ଛେଦ ପ୍ରକ୍ରିୟା ବନ୍ଦ କରା ନ ଯିବାରୁ ସେଠାରେ ଅସନ୍ତୋଷ ପ୍ରକାଶ ପାଇଥିଲା। ତହସିଲଦାର ସେମାନଙ୍କୁ ବୁଝାଶୁଝା କରିବା ପରେ ପରିସ୍ଥିତି ଶାନ୍ତ ପଡିଥିଲା।ମାଜିଷ୍ଟେଟ୍ ଭାବେ ଦାନଗଦୀ ତହସିଲଦାର ନମ୍ରତା ମୋଦି, ଅତିରିକ୍ତ ତହସିଲଦାର ନାରାୟଣ ଚନ୍ଦ୍ର ଦୀକ୍ଷିତ, ଯାଜପୁର ରୋଡ ଥାନା ସବ୍ଇନ୍ପେକ୍ଟର ପବିତ୍ର ମହାରଣା ଓ ମନୋଜ କୁମାର ବାରା,ଏଏସ୍ଆଇ ସୁବାସ ଚନ୍ଦ୍ର ଦାସ, କୋରେଇ ଥାନା ଅଧିକାରୀ ରଞ୍ଜିତ କୁମାର ମହାନ୍ତି, ଦାନଗଦୀ ଫାଣ୍ଡି ଏଏସ୍ଆଇ ମନୋରଞ୍ଜନ ନାୟକଙ୍କ ସମେତ ୧୦ରୁ ଊର୍ଦ୍ଧ୍ୱ ପୋଲିସ ଫୋର୍ସ ମୁତୟନ କରାଯାଇଥିଲା।