ଭୁବନେଶ୍ୱର,୨୫ା୩: ଗତ ଗୋଟିଏ ବର୍ଷ ମଧ୍ୟରେ ପ୍ରଥମ ଥର ଲାଗି ତେଲ ଦର ବୁଧବାର କମିଛି। ପେଟ୍ରୋଲ ଲିଟର ପିଛା ୧୮ ଏବଂ ଡିଜେଲ ୧୭ ପଇସା ଖସିଛି। ଫଳରେ ଭୁବନେଶ୍ୱରରେ ଏହାର ଦର ଯଥାକ୍ରମେ ୯୧.୭୨ ଟଙ୍କା ଏବଂ ୮୮.୬୦ ଟଙ୍କା ରହିଥିବା ରାଷ୍ଟ୍ରାୟତ୍ତ ତୈଳ ବିପଣନ କମ୍ପାନୀଗୁଡିକ ପକ୍ଷରୁ ସୂଚନା ମିଳିଛି। ଅନ୍ତର୍ଜାତୀୟ ବଜାରରେ ତେଲ ଦର ଫେବୃୟାରୀ ପରଠାରୁ ବର୍ତ୍ତମାନ ନିମ୍ନ ସ୍ତରକୁ ଖସିଛି। ଫଳରେ ଇନ୍ଧନ ଦରରେ ଏଭଳି ହ୍ରାସ ପରିଲକ୍ଷିତ ହୋଇଛି।
ନୂଆଦିଲ୍ଲୀରେ ପେଟ୍ରୋଲ ୯୦.୯୯ ଟଙ୍କାକୁ ଖସିଛି। ସେହିଭଳି ଚେନ୍ନାଇରେ ୧୬ ପଇସା ନିମ୍ନରେ ରହି ୯୨.୯୫ ଟଙ୍କା, କୋଲକତା ଏବଂ ମୁମ୍ବାଇରେ ୧୭ ପଇସା ଲେଖାଏ ହ୍ରାସ ହୋଇ ଦର ଯଥାକ୍ରମେ ୯୧.୧୮ ଟଙ୍କା ଓ ୯୭.୪୦ ଟଙ୍କା ରହିଛି। ଗତମାସ ୨୭ ରେ ଶେଷ ଥର ଲାଗି ତେଲ ଦର ବୃଦ୍ଧି ହୋଇଥିଲା। ସେହିଭଳି ଦିଲ୍ଲୀରେ ଡିଜେଲ ଲିଟର ପିଛା ଦର ୧୭ ପଇସା କମି ୮୧.୩୦ ଟଙ୍କା, ମୁମ୍ବାଇରେ ୧୮ ପଇସା ନିମ୍ନରେ ରହି ୮୮.୪୨ ଟଙ୍କା କୋଲକାତାରେ ୮୧.୧୮ ଟଙ୍କା ଏବଂ ଚେନ୍ନାଇରେ ୮୬.୨୯ ଟଙ୍କା ରହିଛି। ରାଜ୍ୟ ସ୍ତରରେ ଭ୍ୟାଟ ଭିନ୍ନ ହୋଇଥିବାରୁ ତେଲ ଦର ହ୍ରାସରେ ଭିନ୍ନତା ଦେଖାଯାଉଛି। ଶେଷ ଥର ପାଇଁ ୨୦୨୦ ମାର୍ଚ୍ଚ ୧୬ରେ ଇନ୍ଧନ ଦର ହ୍ରାସ ହୋଇଥିଲା। କରୋନା ପାଇଁ ଅଶୋଧିତ ତେଲ ରେକର୍ଡ ନିମ୍ନ ସ୍ତରକୁ ଖସିଥିଲେ ମଧ୍ୟ ଗତ ଗୋଟିଏ ବର୍ଷ ମଧ୍ୟରେ ପେଟ୍ରୋଲ ଲିଟର ପିଛା ୨୧.୫୮ ଟଙ୍କା ବୃଦ୍ଧି ପାଇଛି। ସେହିଭଳି ଡିଜେଲ ଦର ଲିଟର ପିଛା ୧୯.୧୮ ଟଙ୍କା ଉର୍ଦ୍ଧ୍ୱରେ ରହିଛି।
ଗତ ମାସରେ ପେଟ୍ରୋଲ ୧୦୦ ଟଙ୍କା ସ୍ତର ଛୁଇଁଥିଲା। ରାଜସ୍ଥାନ, ମହାରାଷ୍ଟ୍ର, ମଧ୍ୟପ୍ରଦେଶ ଭଳି ରାଜ୍ୟଗୁଡିକରେ ଦରରେ ଏଭଳି ରେକର୍ଡ ଦେଖାଯାଇଥିଲା। ସେହିଭଳି ପଶ୍ଚିମବଙ୍ଗ,ତାମିଲନାଡୁ ଏବଂ କେରଳ ଭଳି ରାଜ୍ୟଗୁଡିକରେ ନିର୍ବାଚନ ଯୋଗୁ ତେଲ ଦରରେ କୌଣସି ବୃଦ୍ଧି ହୋଇଥିବା ଦେଖାଯାଇଛି। କରୋନାର ଦ୍ୱିତୀୟ ଲହର ଆସିବା ଯୋଗୁ ଅନ୍ତର୍ଜାତୀୟ ବଜାରେ ଅଶୋଧିତ ତେଲ ଦର ଉପରେ ପ୍ରଭାବ ପରିଲକ୍ଷିତ ହୋଇଛି।