ନ୍ୟୁୟର୍କ, ୧୩।୯: ଚତୁର୍ଥ ସିଡ୍ ଜାପାନାର ନାଓମି ଓସାକା ଏଠାରେ ଅନୁଷ୍ଠିତ ୟୁଏସ୍ ଓପନ୍ ଗ୍ରାଣ୍ଡସ୍ଲାମ ପ୍ରତିଯୋଗିତାର ମହିଳା ସିଙ୍ଗଲ୍ସରେ ଚାମ୍ପିୟନ ହୋଇଛନ୍ତି। ଫାଇନାଲରେ ଓସାକା ୧-୬, ୬-୩, ୬-୩ ସେଟ୍ରେ ବିଶ୍ୱର ପୂର୍ବତନ ଏକ ନମ୍ବର ଖେଳାଳି ବେଲାରୁଷର ଭିକ୍ଟୋରିଆ ଆଜାରେଙ୍କାଙ୍କୁ ପରାସ୍ତ କରି ଟାଇଟଲ୍ ଜିତିଥିଲେ। ୨୨ ବର୍ଷୀୟା ଓସାକା ଏହି ମ୍ୟାଚ୍ ଜିତିବାକୁ ଏକ ଘଣ୍ଟା ୫୩ ମିନିଟ୍ ସମୟ ନେଇଥିଲେ। ୧୯୯୪ ପରେ ଏହା ପ୍ରଥମ ଘଟଣା ଯେତେବେଳେ ମହିଳା ସିଙ୍ଗଲ୍ସ ଫାଇନାଲର ପ୍ରଥମ ସେଟ୍ ହାରିବା ପରେ ଜଣେ ଖେଳାଳି ୟୁଏସ୍ ଓପନ୍ ଟାଇଟଲ୍ ଜିତିଛନ୍ତି। ଓସାକା କ୍ୟାରିୟରର ୨ୟ ଥର ଲାଗି ଏହି ସମ୍ମାନଜନକ ଟ୍ରଫି ଜିତିଛନ୍ତି। ଏଥିପୂର୍ବରୁ ସେ ୨୦୧୮ରେ ୟୁଏସ୍ ଓପନ୍ ବିଜୟୀନି ହୋଇଥିଲେ। ଓସାକାଙ୍କ ନାମରେ ମଧ୍ୟ ଅଷ୍ଟ୍ରେଲିଆନ୍ ଓପନ୍ (୨୦୧୯) ଟାଇଟଲ୍ ରହିଛି।