ଦୁନିଆରେ କିଛି ଲୋକ ଅଛନ୍ତି ଯେଉଁମାନଙ୍କର ଗାଡ଼ି କିଣିବାରେ ଭାରି ସଉକ। ଖାଲି ଗାଡ଼ି କିଣିବା ନୁହେଁ, ମନପସନ୍ଦର ନମ୍ବର ପ୍ଲେଟ୍ ଲଗାଇବା ମଧ୍ୟ ଏମାନଙ୍କର ସଉକ। ଏଥିପାଇଁ ଜଣେ ଲୋକ ଲକ୍ଷେ କି ଦୁଇ ଲକ୍ଷ ନୁହେଁ, ଏକାବେଳକେ ୬ ଲକ୍ଷ ଟଙ୍କା ଖର୍ଚ୍ଚ କରିଛନ୍ତି।
ଉତ୍ତରପ୍ରଦେଶର ରାଜଧାନୀ ଲକ୍ଷ୍ନୌରେ ନିଜ ଗାଡ଼ିରେ ଭିଆଇପି ନମ୍ବର ଅର୍ଥାତ୍ ସ୍ପେଶାଲ ନମ୍ବର ଲଗାଇବାରେ ମଧ୍ୟ ସଉକ ରହିଥାଏ। ଏଠାକାର ଜଣେ ବ୍ୟକ୍ତି ନିଜ ଗାଡ଼ି ପାଇଁ ଭିଆଇପି ନମ୍ବର ଆଣିବାକୁ ସମସ୍ତ ରେକର୍ଡ ଭାଙ୍ଗିଛନ୍ତି। ଏହି ପଇସାରେ ଜଣେ ଲୋକ ଆଉ ଏକ କାର୍ ବି କିଣିପାରିଥାନ୍ତେ।
ରାଜଧାନୀ ଲକ୍ଷ୍ନୌରେ ଭିଆଇପି ନମ୍ବର MA0001ପାଇଁ ନିଲାମକାରୀ ୧ ଲକ୍ଷ ଟଙ୍କାରୁ ନିଲାମ ଡାକ ଆରମ୍ଭ କରିଥିଲେ। ଯାହା ଶେଷରେ ୬ ଲକ୍ଷ ଟଙ୍କାରେ ଶେଷ ହୋଇଥିଲା। ପ୍ରବୀଣ ନାମକ ଜଣେ ବ୍ୟକ୍ତି ୧ ହଜାର ଟଙ୍କା ଅଧିକ ଡାକି ନମ୍ବରକୁ ନିଜ ନାମରେ କରି ନେଇଥିଲେ।
ଟ୍ରାନ୍ସପୋର୍ଟ ନଗର ଆରଟିଓଙ୍କ ଅନୁସାରେ, ବର୍ତ୍ତମାନ ସୁଦ୍ଧା ଭିଆଇପି ନମ୍ବର ୪ ଲକ୍ଷ ୧୦ ହଜାରରୁ ଅଧିକ ନିଲାମ ଡକାଯାଇନାହିଁ। ମାତ୍ର ଏହି ଥର ରେକର୍ଡ ଭାଙ୍ଗିଛି। ୨୭ ମାର୍ଚ୍ଚ ୨୦୨୧ରେ ଭିଆଇପି ନମ୍ବର ନିଲାମୀ ଡାକିବା ଆରମ୍ଭ ହୋଇଥିଲା। ନିଲାମୀର ଶେଷ ପର୍ଯ୍ୟାୟରେ ପ୍ରବୀଣ ନାମକ ଜଣେ ବ୍ୟକ୍ତି ୬ ଲକ୍ଷ ଟଙ୍କା ଡାକି ଏହାକୁ କିଣିଛନ୍ତି।
ପ୍ରବୀଣ ଏପର୍ଯ୍ୟନ୍ତ ଗାଡ଼ି କିଣିନାହାନ୍ତି ମାତ୍ର ନମ୍ବର ପ୍ଲେଟ୍ ପାଇଁ ୬ ଲକ୍ଷ ଟଙ୍କା ଖର୍ଚ୍ଚ କରିସାରିଲେଣି। ଯାହା ସମସ୍ତଙ୍କୁ ଚକିତ କରିଛି।