ଭୁବନେଶ୍ୱର, ୭।୧୨ (ବ୍ୟୁରୋ): ରାଜଧାନୀରେ ଜୋର୍ଦାର ସୌନ୍ଦର୍ଯ୍ୟକରଣ କାମ ଚାଲୁ ରହିଛି। ଏହାକୁ ଦୃଷ୍ଟିରେ ରଖି ମଙ୍ଗଳବାର ମଧ୍ୟ ଉଚ୍ଛେଦ କାର୍ଯ୍ୟ ଜାରି ରହିଥିଲା। ବିଡିଏର ଏନ୍ଫୋର୍ସମେଣ୍ଟ ସ୍କ୍ବାଡ୍ ପକ୍ଷରୁ ୪ଟି ସ୍ଥାନରେ ଉଚ୍ଛେଦ କରାଯାଇଥିଲା। ପ୍ରଥମ ଉଚ୍ଛେଦରେ ସ୍କ୍ବାଡ୍ ନମ୍ବର ୧୩, ୧୪, ୧୫ ଓ ୧୬ ସାମିଲ ହୋଇଥିଲେ। ଏହି କ୍ରମରେ ଡୁମୁଡୁମାସ୍ଥିତ ହାଉସିଂ ବୋର୍ଡ କଲୋନୀର ଫେଜ୍-୩ରୁ ପୋଲିସ ଉପସ୍ଥିତିରେ ଜବରଦଖଲ ହଟାଯାଇଥିଲା। ଏଥିରେ ୫ଟି ଆଜବେଷ୍ଟସ ଘର, ଗୋଟିଏ ଟିଣ ଘର, ଦୁଇଟି ଲୁହାଗେଟ, ୮ଟି ବାଉଁଶ ନିର୍ମିତ ଘର, ୨ଟି କ୍ୟାବିନ ଏବଂ ୩୦୦ ଫୁଟର ପାଚେରି ଭଙ୍ଗାଯାଇଥିଲା। ସେହିପରି ଦ୍ୱିତୀୟ ଉଚ୍ଛେଦ ବାଣୀବିହାର ଛକରୁ ଆଚାର୍ଯ୍ୟ ବିହାର ଛକ ପର୍ଯ୍ୟନ୍ତ ହୋଇଥିଲା। ୯, ୧୦, ୧୧ ଓ ୧୨ ନଂ. ସ୍କ୍ବାଡ ପକ୍ଷରୁ ୫୦ ମିଟରର ଲୁହାଜାଲି, ୫ଟି ଛାତ ଘର, ୩ଟି ବିଜ୍ଞାପନ ବୋର୍ଡ ହଟାଯାଇଥିଲା। ଅପରପକ୍ଷେ ମହାରାଜା ସିନେମା ହଲ ନିକଟରେ ଥିବା ଭେଣ୍ଡିଂ ଜୋନ୍ର ବ୍ୟବସାୟୀମାନେ ସମୟ ମାଗିବା ସହିତ ଲିଖିତ ପ୍ରତିଶ୍ରୁତି ଦେଇଥିବାରୁ ଏହାକୁ ଭଙ୍ଗାଯାଇ ନ ଥିଲା। ପ୍ରେସ୍ ଛକରୁ ଏମ୍ସିଏଲ ରୋଡ ଏବଂ କିଟ୍ ଛକରେ ଉଚ୍ଛେଦ ହୋଇଥିଲା। ଜବରଦଖଲକାରୀଙ୍କ ବିରୋଧ ସତ୍ତ୍ବେ ସ୍କ୍ବାଡ୍ ନମ୍ବର ୫, ୬, ୭ ଓ ୮ ଉଚ୍ଛେଦ କାର୍ଯ୍ୟ ଜାରି ରଖିଥିଲେ। ଏହି କ୍ରମରେ ଗୋଟିଏ ଆଜବେଷ୍ଟସ ଘର, ୮ଟି ଟିଣ ଦୋକାନ, ୫ଟି କ୍ୟାବିନ, ଗୋଟିଏ ସିମେଣ୍ଟ ପିଣ୍ଡି ଓ ୨୦ ଫୁଟ ଲମ୍ବର ପାଚେରିକୁ ଭଙ୍ଗାଯାଇଥିଲା। ଏଥିସହ କିଟ୍ ଛକରେ ଥିବା ଗୋଟିଏ ଓମ୍ଫେଡ ବୁଥ ଓ ୩ଟି ଭେଣ୍ଡିଂ ଜୋନକୁ ବେଆଇନ ଜବରଦଖଲ ପାଇଁ ସିଲ୍ କରାଯାଇଥିଲା। ଚାନ୍ଦିନି ଫାଷ୍ଟ ଫୁଡ୍ ଦୋକାନରେ ଖରାପ ପରିମଳ ପାଇଁ ସ୍କ୍ବାଡ ପକ୍ଷରୁ ୫ହଜାର ଟଙ୍କା ଏବଂ ପରିବା ଦୋକାନୀଙ୍କଠାରୁ ୨ହଜାର ଟଙ୍କା ଜରିମାନା ଆଦାୟ କରାଯାଇଥିଲା। ଶେଷରେ ଏମ୍ସ ଛକରୁ ଡିଏନ୍ ରେଗାଲିଆ, ଗୋପବନ୍ଧୁ ଛକରୁ ଡେଲଟା ଏବଂ ଇନ୍ଦ୍ରଧନୁ ମାର୍କେଟସ୍ଥିତ ରାସ୍ତା କଡ଼ରେ ହୋଇଥିବା ବେଆଇନ ନିର୍ମାଣକୁ ଉଚ୍ଛେଦ କରାଯାଇଥିଲା। ସ୍କ୍ବାଡ୍ ନମ୍ବର ୧୩, ୧୪, ୧୫ ଓ ୧୬ ଏଥିରେ ସାମିଲ ହୋଇ ୧୧ଟି ଫଳ ଦୋକାନ, ୫ଟି ଦୋକାନ ଓ ୮ଟି ଟିଫିନ ଷ୍ଟଲକୁ ଉଚ୍ଛେଦ କରିଥିଲେ।