ବାଲେଶ୍ୱର,୧୪ା୭(ମାନସ ବିଶ୍ୱାଳ): ବାଲେଶ୍ୱର ସହରର ବ୍ୟସ୍ତବହୁଳ ଫାଣ୍ଡିଛକ ଅଞ୍ଚଳରେ ରାସ୍ତା ଅବରୋଧ ସହ ବ୍ୟବସାୟ ଚଳାଇଥିବା ଦୋକାନୀଙ୍କୁ ଉଚ୍ଛେଦ ଲାଗି ପୌରପାଳିକା ପଦକ୍ଷେପ ଗ୍ରହଣ କରିଛି। ବିଶେଷ ଭାବେ ସେହି ଅଞ୍ଚଳରେ ଯାତାୟତରେ ସର୍ବଦା ବାଧକ ସାଜୁଥିବା ଫଳ ଦୋକାନୀମାନଙ୍କୁ ପ୍ରଶାସନ ପକ୍ଷରୁ ଉଚ୍ଛେଦ କରାଯାଇଛି। ଏ ନେଇ ୧୫ଦିନ ପୂର୍ବେ ଅନ୍ୟତ୍ର ଉଠି ଯିବାକୁ ନୋଟିସ୍ ପ୍ରଦାନ କରାଯାଇଥିଲେ ମଧ୍ୟ ସେମାନେ ବ୍ୟବସାୟ ଜାରି ରଖିଥିଲେ। ତେଣୁ ଜିଲାପାଳଙ୍କ ନିର୍ଦ୍ଦେଶ କ୍ରମେ ଶୁକ୍ରବାର ସମଗ୍ର ଫାଣ୍ଡି ଛକ ଅଞ୍ଚଳରୁ ଦୋକାନୀମାନଙ୍କୁ ଉଚ୍ଛେଦ କରାଯାଇଛି।
ବାଲେଶ୍ୱର ସହରର ପୂରାତନ ଓଭର ବ୍ରିଜ ମରାମତି ସମୟରେ ପୋଲ ତଳୁ ସମସ୍ତ ଦୋକାନୀଙ୍କୁ ଗତ ୨୦୨୧ ଡିସେମ୍ବର ମାସରେ ଉଚ୍ଛେଦ କରାଯାଇଥିଲା। ତେବେ ଓଭରବ୍ରିଜ ମରାମତି ପରେ ସେଠାରେ ଦୋକାନ ଖୋଲିବା ପାଇଁ କୌଣସି ବ୍ୟବସାୟୀଙ୍କୁ ସୁଯୋଗ ଦିଆଯାଇ ନ ଥିଲା। ସମସ୍ତ ଦୋକାନୀ ଅନ୍ୟତ୍ର ନିଜ ନିଜର ବ୍ୟବସ୍ଥା କରିଥିଲେ ମଧ୍ୟ ଫଳ ଦୋକାନୀମାନେ ଧିରେ ଧିରେ ନିଜର ପସରା ମେଲାଇଥିଲେ। ଗୋଟିଏ ପରେ ଗୋଟିଏ ଦୋକାନ ଖୋଲି ବ୍ୟବସାୟ ଚଳାଇବା ସହ ରାସ୍ତା ଅବରୋଧ କରୁଥିଲେ। ଯାତାୟତରେ ସୃଷ୍ଟି ହେଉଥିବା ସମସ୍ୟାକୁ ନେଇ ବାରମ୍ବାର ଅଭିଯୋଗ ପରେ ଫାଣ୍ଡିଛକରେ ଉଚ୍ଛେଦ ପାଇଁ ନିଷ୍ପତ୍ତି ନିଆଯାଇଥିବା ମାଜିଷ୍ଟ୍ରେଟ ଦାୟିତ୍ୱରେ ଥିବା ଅତିରିକ୍ତ ତହସିଲଦାର ଅତନୁ ପ୍ରଧାନ ସୂଚନା ଦେଇଛନ୍ତି। ତେବେ ଉଚ୍ଛେଦ ଦୋକାନୀଙ୍କୁ ଅନ୍ୟତ୍ର ଭେଣ୍ଡିଂ ଜୋନ୍ ମାଧ୍ୟମରେ ଥଇଥାନ କରାଯିବ। ସେହିପରି ଆଗାମୀ ଦିନରେ ଏକ ସ୍କ୍ବାଡ୍ ଗଠନ ସହ ଫାଣ୍ଡି ଛକ ସମେତ ସହରର ଅନ୍ୟାନ୍ୟ ଅଞ୍ଚଳକୁ ଅବରୋଧ ମୁକ୍ତ ରଖିବା ପାଇଁ ଅଭିଯାନ ଆରମ୍ଭ ନିମନ୍ତେ ଜିଲାପାଳ ନିର୍ଦ୍ଦେଶ ଦେଇଥିବା ଅତିରିକ୍ତ ତଦସିଲଦାର ପ୍ରଧାନ ସୂଚନା ଦେଇଥିଲେ। ଏହି ଉଚ୍ଛେଦ ପ୍ରକ୍ରିୟା ସମୟରେ ଶାନ୍ତି ଶୃଙ୍ଖଳା ରକ୍ଷା ପାଇଁ ବ୍ୟାପକ ପୋଲିସ ମୁତୟନ କରାଯାଇଥିଲା। ତେବେ ଉଚ୍ଛେଦ ବେଳେ ବିରୋଧ ନ କରି ଦୋକାନୀମାନେ ସେମାନଙ୍କ ସାମଗ୍ରୀ ଉଠାଇ ନେଇଥିବା ଦେଖିବାକୁ ମିଳିଥିଲା।