କେସିଙ୍ଗା,୩୦।୧୨(ତୁମେଶ୍ୱର ସାହୁ): କଳାହାଣ୍ଡି ଜିଲା କେସିଙ୍ଗା ଏନ୍ଏସି ଅଧୀନ ବସ୍ଷ୍ଟାଣ୍ଡ ନିକଟ ଜାତୀୟ ରାଜପଥକୁ ଲାଗି ରହିଥିବା ୧୦ ଏକର ଜମି ଜବରଦଖଲମୁକ୍ତ ହୋଇଛି। ଦୀର୍ଘ ୩୦ ବର୍ଷ ଧରି କୁର୍ଲୁପଡା ଗ୍ରାମର କେତେକ ବ୍ୟକ୍ତି ସମ୍ପୃକ୍ତ ଜମିକୁ ଜବରଦଖଲ କରି ନିଜ ଅକ୍ତିଆରରେ ରଖିଥିଲେ। ଫଳରେ ସମ୍ପୃକ୍ତ ଜମିରେ ଏନ୍ଏସିର ବିଭିନ୍ନ ଉନ୍ନୟନ କାର୍ଯ୍ୟରେ ସମସ୍ୟା ଦେଖାଦେଉଥିଲା।
ଅଧ୍ୟକ୍ଷ ନୃପରାଜ ଯାଦବ, ନିର୍ବାହୀ ଅଧିକାରିଣୀ କିରଣ ବେହେରାଙ୍କ ପ୍ରଚେଷ୍ଟାରେ ଜିଲା ପ୍ରଶାସନ ନିର୍ଦ୍ଦେଶକ୍ରମେ ୧୦ ଏକର ଜମିକୁ ଜବରଦଖଲ ଉଚ୍ଛେଦ କରି ଏନ୍ଏସି ନିଜ ଅଧୀନକୁ ଆଣିଛି। ଏହି କାର୍ଯ୍ୟରେ ସହରବାସୀଙ୍କ ସହ କେସିଙ୍ଗା ତହସିଲଦାର ପ୍ରଶାନ୍ତି ପ୍ରଧାନ, ଆର୍ଆଇ ବଗର୍ତ୍ତୀ ବାବୁ ଓ କେସିଙ୍ଗା ଥାନା ଅଧିକାରୀ ପ୍ରଦ୍ୟୁମ୍ନ ମହାପାତ୍ରଙ୍କ ସହ ପୋଲିସ କର୍ମଚାରୀ ସହଯୋଗ କରିଥିଲେ।
ଜବରଦଖଲମୁକ୍ତ ଏହି ୧୦ ଏକର ଜମିର ଚଉହଦିରେ ଏନ୍ଏସି ପକ୍ଷରୁ ଲାଲଝଣ୍ଡା ଫୋତା ଯାଇଛି। ଜବରଦଖଲ ଉଚ୍ଛେଦ ପରେ ଉକ୍ତ ଜମିରେ କଲ୍ୟାଣ ମଣ୍ଡପ, ଟ୍ରକ ଟର୍ମିନାଲ, ବାସହୀନମାନଙ୍କ ପାଇଁ ଆଶ୍ରୟ ସ୍ଥଳ, ପାର୍କ ଓ ଦୋକାନ ଗୃହ ସହିତ ବିଭିନ୍ନ ଉନ୍ନୟନମୂଳକ କାର୍ଯ୍ୟ କରାଯିବ ବୋଲି ଏନ୍ଏସି ପକ୍ଷରୁ ନିଷ୍ପତ୍ତି ନିଆଯାଇଛି। ଏନ୍ଏସିର ଏହି କାର୍ଯ୍ୟକୁ କେସିଙ୍ଗା ସହରବାସୀଙ୍କ ସହ ବୁଦ୍ଧିଜୀବୀ ମହଲ ପକ୍ଷରୁ ପ୍ରଶଂସା କରାଯାଇଛି।
ଏ ସଂକ୍ରାନ୍ତରେ ଅଧ୍ୟକ୍ଷ ନୃପରାଜ ଯାଦବଙ୍କୁ ପଚାରିବାରୁ କୁର୍ଲୁପଡା ଗ୍ରାମର କେତେକ ଆଦିବାସୀ ସମ୍ପ୍ରଦାୟର ଲୋକେ ସରକାରୀ ଜମିକୁ ଦୀର୍ଘ ୩୦ ବର୍ଷ ହେଲା ଜବରଦଖଲ କରି ରଖିଥିଲେ। ଫଳରେ ଏନ୍ଏସି ପକ୍ଷରୁ ଏଥିରେ କୌଣସି ଉନ୍ନୟନମୂଳକ କାର୍ଯ୍ୟ ହୋଇପାରୁଥିଲା। ସମ୍ପୃକ୍ତ ଜମିରେ ଏଣିକି ଉନ୍ନୟନମୂଳକ କାର୍ଯ୍ୟ କରାଯିବା ପାଇଁ ଆଉ ସମସ୍ୟା ରହିବ ନାହିଁ ବୋଲି ଯାଦବ ପ୍ରକାଶ କିଛନ୍ତି।