ଭାପୁର,୧୩ା୪(ଡି.ଏନ.ଏ.): ଭାପୁର ବ୍ଲକ ଅନ୍ତର୍ଗତ ଶାଳପଡ଼ା ପଞ୍ଚାୟତରେ ରାଜସ୍ବ ନୀରିକ୍ଷକ ଗୃହ ନିର୍ମାଣ ପାଇଁ ବୁଧବାର ରାଜସ୍ବ ପ୍ରଶାସନିକଙ୍କ ପକ୍ଷରୁ ଜବରଦଖଲ ଉଚ୍ଛେଦ କରାଯାଇଛି। ଶାଳପଡ଼ା ପଞ୍ଚାୟତରେ ଆର୍ଆଇ କାର୍ଯ୍ୟାଳୟ ଖୋଲିବାକୁ ଭାପୁରଠାରୁ ଖଣ୍ଡପଡ଼ା ରାସ୍ତା ଶାଳପଡ଼ା ସ୍କୁଲ ନିକଟସ୍ଥ ସାମ୍ନାରେ ଗୋଚର ଜମି ତହସିଲ ପକ୍ଷରୁ ଚିହ୍ନଟ ହୋଇଥିଲା। ହେଲେ ଶାଳପଡ଼ା ସହର ସାହିର ଆରତ ନାୟକଙ୍କ ପୁଅ ପୂର୍ଣ୍ଣଚନ୍ଦ୍ର ନାୟକ ଦୀର୍ଘଦିନ ଧରି ସେଠାରେ ଏକ କୁଡ଼ିଆ ଘର କରି ଜବରଦଖଲ କରି ରହୁ ଆସୁଥିଲେ। ଗ୍ରାମ ଭିତରେ ତାଙ୍କର ନିଜସ୍ବ ଘର ଥିଲେ ବି କୌଣସି କାରଣରୁ ଘରକୁ ଯାଉଥିଲେ। ସେହି କୁଡ଼ିଆ ଘରେ ତାଙ୍କର ପତ୍ନୀ ସହ ୩ ଝିଅ, ଗୋଟିଏ ପୁଅ ରହୁଥିଲେ। ତହସିଲ ପକ୍ଷରୁ ବାରମ୍ବାର ନୋଟିସ ପାଇବା ପରେ ମଧ୍ୟ ସେ ଜାଗା ଛାଡି ନ ଥିଲେ। ଭାପୁର ତହସିଲଦାର ଲଗ୍ନଜିତ ବେହେରା, ଆର୍ଆଇ ସସ୍ମିତା ସାହୁ ,ସୁପରଭାଇଜର ପ୍ରଫୁଲ୍ଲ କୁମାର ନାହକ, ଫତେଗଡ଼ ଥାନାର ଏସ୍ଆଇ ଏମ୍.ଡି. ଜାଫ୍ରୁଲାଙ୍କ ସହ ଗୋଟିଏ ପ୍ଲାଟୁନ୍ ପୋଲିସ ଫୋର୍ସ ଉପସ୍ଥିତରେ ଜେସିବି ମେଶିନ ସାହାଯ୍ୟରେ ଜବରଦଖଲ ଉଚ୍ଛେଦ କରିଥିଲେ। ଜବରଦଖଲ ହୋଇଥିବା ଗୋଟିଏ ଏକରରୁ ଊଦ୍ଧର୍ବ ଜାଗା ନିଜ ଅକ୍ତିଆରକୁ ଆଣିଥିଲେ। ସେହି ସ୍ଥାନରେ ୪୦ଡିସିମିଲି ଜାଗାରେ ଗୃହ ନିର୍ମାଣ ହେବା ସହ ବାକି ଜାଗାରେ ସୁରକ୍ଷା ପ୍ରାଚୀର କରି ତହସିଲ ଅଧୀନରେ ରହିବ ବୋଲି ସୂଚନା ମିଳିଛି। ଜବରଦଖଲରେ ରହିଥିବା ବ୍ୟକ୍ତି କହିଛନ୍ତିଳ, ମୁଁ କ’ଣ ଏକୁଟିଆ ଭାପୁର ବ୍ଲକରେ ସରକାରୀ ଜାଗା ଜବରଦଖଲରେ ରହିଥିଲି। ଅନ୍ୟମାନଙ୍କୁ କାହିଁକି ଜବରଦଖଲ ଉଚ୍ଛେଦ କରାଯାଉନାହିଁ। ଆଗାମୀଦିନରେ ନ୍ୟାୟ ନ ପାଇଲେ ତହସିଲ କାର୍ଯ୍ୟାଳୟ ସମ୍ମୁଖରେ ଆତ୍ମାହୂତି ଦେବେ ବୋଲି ସୂଚନା ମିଳିଛି। ପ୍ରଶାସନର ଏଭଳି ଜବରଦଖଲ ଉଚ୍ଛେଦକୁ ବୃଦ୍ଧିଜୀବୀମାନେ ପ୍ରଶଂସା କରିଛନ୍ତି।
