ଢେଙ୍କାନାଳ ଅଫିସ,୭ା୨: ଢେଙ୍କାନାଳ ସହର ମଧ୍ୟଦେଇ ଯାଇଥିବା ପୂର୍ତ୍ତ ବିଭାଗର ପ୍ରମୁଖ ରାସ୍ତାର ସମ୍ପ୍ରସାରଣ କାର୍ଯ୍ୟ ଆରମ୍ଭ ହୋଇଛି। ଢେଙ୍କାନାଳ କଲେଜ ବାଇପାସ ଠାରୁ ସହର ମଧ୍ୟଦେଇ ବସ୍ଷ୍ଟାଣ୍ଡ, ଜିଲା କାର୍ଯ୍ୟାଳୟ ଏବଂ କୈବଲ୍ୟ ବଜାର ରଥଗଡାଠାରୁ ସହର ମଧ୍ୟଦେଇ ବାଜିଚୌକ ପର୍ଯ୍ୟନ୍ତ ରାସ୍ତା ସମ୍ପ୍ରସାରଣ ହେବ। ଏଥିପାଇଁ ଜବର ଦଖଲକୁ ହଟାଯିବ ବୋଲି ନିଷ୍ପତ୍ତି ହୋଇଛି। ଏଥିନିମନ୍ତେ ଏକ କମିଟି ମଧ୍ୟ ଗଠନ କରାଯାଇଛି। କମିଟି ପକ୍ଷରୁ ଏହାକୁ ନିୟମିତ ଭାବେ ସମୀକ୍ଷା କରାଯିବ। ସୋମବାର ସନ୍ଧ୍ୟାରେ ଜିଲାପାଳ ସରୋଜ କୁମାର ସେଠୀ, ଏସ୍ପି ଜ୍ଞାନ ରଞ୍ଜନ ମହାପାତ୍ର, ପୌରାଧ୍ୟକ୍ଷା ଜୟନ୍ତୀ ପାତ୍ର, ଉପାଧ୍ୟକ୍ଷ ପ୍ରକାଶ କୁଅଁର, ଉପଜିଲାପାଳ ସ୍ନିଗ୍ଧାରାଣୀ ଧଳ, ତହସିଲଦାର ସୁଧାଂଶୁ ଶେଖର ସାହୁ, ଜିଲା ମୁଖ୍ୟ ଚିକିତ୍ସାଧିକାରୀ ଡା. ଅଶୋକ କୁମାର ଦାଶ, ପୂର୍ତ୍ତ ବିଭାଗ ଅଧୀକ୍ଷଣ ଯନ୍ତ୍ରୀ ମନୋରଞ୍ଜନ ବିଶ୍ୱାଳ, ୬ନଂ. ୱାର୍ଡ କାଉନସିଲର ସନ୍ଦିପ ଷଡଙ୍ଗୀ, ଗଣେଶ ବଜାର ପୂଜା କମିଟି ସମ୍ପାଦକ ବିଶ୍ୱନାଥ ବେହେରା ପ୍ରମୁଖ ଉପସ୍ଥିତ ଥିଲେ। ଏଥିସହିତ ରାସ୍ତା ଉପରେ ରହିଥିବା ବିଦ୍ୟୁତ୍ ଖୁଣ୍ଟଗୁଡିକ ସ୍ଥାନାନ୍ତର କରାଯିବ। ବସ୍ଷ୍ଟାଣ୍ଡ ଟ୍ରାଫିକ ଛକଠାରେ ଥିବା ମିନି ବିଦ୍ୟୁତ୍ ସବ୍ଷ୍ଟେଶନକୁ ମଧ୍ୟ ଅନ୍ୟତ୍ର ହଟାଯିବ। ଏ ସଂକ୍ରାନ୍ତରେ ଜିଲାପାଳ କହିଛନ୍ତି, ସହରର ପ୍ରମୁଖ ରାସ୍ତାକୁ ସମ୍ପ୍ରସାରଣ କାର୍ଯ୍ୟ ଆରମ୍ଭ ହୋଇଛି। ଗମନା ଗମନର ସୁବିଧା ଓ ଟ୍ରାଫିକ ନିୟନ୍ତ୍ରଣ ପାଇଁ ଏହି କାର୍ଯ୍ୟ କରାଯାଉଛି। ଯେଉଁଠି ଜବରଦଖଲ ହୋଇଥିବ ତାହାକୁ ଉଚ୍ଛେଦ କରାଯିବ। ବିଭିନ୍ନ ସ୍ଥାନରେ ମହାପୁରୁଷମାନଙ୍କ ପ୍ରତିମୂର୍ତ୍ତି ରଖାଯିବ ବୋଲି ଜିଲାପାଳ କହିଛନ୍ତି।