ଢାକା,୯ା୧୨(ପି.ଟି.):ବାଂଲାଦେଶରେ ସଂଖ୍ୟାଲଘୁମାନଙ୍କ ନିରାପତ୍ତାକୁ ନେଇ ଭାରତ ସୋମବାର ଚିନ୍ତାବ୍ୟକ୍ତ କରିଛି। ପଡୋଶୀଙ୍କ ସହ ସକାରାତ୍ମକ, ଗଠନମୂଳକ ଏବଂ ପରସ୍ପର ଲାଭକାରୀ ସମ୍ପର୍କ ଭାରତ ଚାହେଁ। ଢାକାରେ ଅନୁଷ୍ଠିତ ଏକ ଉଚ୍ଚସ୍ତରୀୟ ବୈଠକରେ ବହିର୍ବ୍ୟାପାର ସଚିବ ବିକ୍ରମ ମିସ୍ରି ଏହା କହିଛନ୍ତି।
ଅଗଷ୍ଟ ୫ରେ ବାଂଲାଦେଶ ପ୍ରଧାନମନ୍ତ୍ରୀ ଶେଖ୍ ହାସିନା କ୍ଷମତାଚ୍ୟୁତ ହୋଇ ଭାରତ ପଳାଇଆସିବା ପରେ ଏହା ଥିଲା ବାଂଲା ସହ ଭାରତୀୟ ଅଧିକାରୀଙ୍କ ପ୍ରଥମ ଉଚ୍ଚସ୍ତରୀୟ ବୈଠକ। ବାଂଲାଦେଶ ପ୍ରତିପକ୍ଷ ମହମ୍ମଦ ଜଶିମ୍ ଉଦ୍ଦିନଙ୍କ ସହ ଏକ ସ୍ପଷ୍ଟ ତଥା ଗଠନମୂଳକ ମତ ଆଦାନପ୍ରଦାନ ହୋଇଥିବା ବହିର୍ବ୍ୟାପାର ସଚିବ ମିସ୍ରି କହିଛନ୍ତି। ସଂଖ୍ୟାଲଘୁମାନଙ୍କ ସୁରକ୍ଷା ଓ କଲ୍ୟାଣ ସମ୍ପର୍କରେ ଆମେ ଆମର ଉଦ୍ବେଗ ଜଣାଇଦେଇଛୁ। ନିକଟରେ ସାଂସ୍କୃତିକ, ଧର୍ମୀୟ ଏବଂ କୂଟନୈତିକ ସମ୍ପତ୍ତି ଉପରେ ଘଟିଥିବା ଦୁଃଖଦାୟକ ଆକ୍ରମଣ ସମ୍ପର୍କରେ ମଧ୍ୟ ଉଭୟ ପକ୍ଷଙ୍କ ମଧ୍ୟରେ ଆଲୋଚନା ହୋଇଥିଲା। ଦ୍ୱିପାକ୍ଷିକ ସମ୍ପର୍କରେ ସୁଧାର ଆଣିବା ନିମନ୍ତେ ବୈଠକରେ ସହମତି ହୋଇଥିବା ମିସ୍ରି କହିଛନ୍ତି।
ସୂଚନାଯୋଗ୍ୟ, ହାସିନା ସରକାର କ୍ଷମତାଚ୍ୟୁତ ହେବା ପରେ ଭାରତ ଓ ବାଂଲାଦେଶ ମଧ୍ୟରେ ରହିଥିବା ଘନିଷ୍ଠ ସମ୍ପର୍କରେ ତିକ୍ତତା ସୃଷ୍ଟି ହୋଇଛି। ହାସିନା ଭାରତ ପଳାଇଆସିବା ପରେ ମହମ୍ମଦ ୟୁନୁସ୍ଙ୍କ ନେତୃତ୍ୱରେ ସେଠାରେ ଅନ୍ତରୀଣ ସରକାର ଗଠନ ହୋଇଥିଲା। ଗତ କିଛି ସପ୍ତାହ ମଧ୍ୟରେ ହିନ୍ଦୁଙ୍କ ଉପରେ ଆକ୍ରମଣ ଏବଂ ହିନ୍ଦୁ ସନ୍ଥ ଚିନ୍ନୟ କୃଷ୍ଣଦାସଙ୍କୁ ଗିରଫ ଘଟଣା ସମ୍ପର୍କକୁ ଆହୁରି ଖରାପ କରିଦେଇଛି। ହିନ୍ଦୁ ଏବଂ ଅନ୍ୟାନ୍ୟ ସଂଖ୍ୟାଲଘୁଙ୍କ ଉପରେ ହିଂସାକାଣ୍ଡ ବଢ଼ିଚାଲିଛି। ବାଂଲାଦେଶରେ ଥିବା ହିନ୍ଦୁ ମନ୍ଦିରଗୁଡ଼ିକ ଆକ୍ରମଣର ସମ୍ମୁଖୀନ ହୋଇଛନ୍ତି। ଏହାର ପ୍ରତିବାଦରେ ଅଗରତାଲାରେ ଥିବା ବାଂଲାଦେଶ ମିଶନ ଉପରେ ମଧ୍ୟ ଆକ୍ରମଣ ହୋଇଥିଲା।