ଓ୍ବାଶିଂଟନ,୧୯।୧୧: ଗତ ୧୫ ବର୍ଷ ମଧ୍ୟରେ ପ୍ରଥମ ଥର ପାଇଁ ଆମେରିକାରେ ପଢ଼ୁଥିବା ବିଦେଶୀ ଛାତ୍ରୀଛାତ୍ରଙ୍କ ମଧ୍ୟରେ ଭାରତୀୟଙ୍କ ସଂଖ୍ୟା ସର୍ବାଧିକ। ସୋମବାର ଆମେରିକୀୟ ସଙ୍ଗଠନ ‘ଓପନ ଡୋର୍ସ’ ପକ୍ଷରୁ ପ୍ରକାଶିତ ରିପୋର୍ଟରେ ଏହା ଉଲ୍ଲେଖ କରାଯାଇଛି। ସମ୍ପ୍ରତି ଆମେରିକାରେ ୩.୩ ଲକ୍ଷରୁ ଅଧିକ ଭାରତୀୟ ଛାତ୍ରୀଛାତ୍ର ପଢ଼ୁଛନ୍ତି। ଆମେରିକୀୟ ଶିକ୍ଷାବର୍ଷ ୨୦୨୨-୨୩ ଅନୁଯାୟୀ, ଦେଶରେ ପଢ଼ୁଥିବା ବିଦେଶୀ ଛାତ୍ରୀଛାତ୍ରଙ୍କ ମଧ୍ୟରେ ସର୍ବାଧିକ ଚାଇନାରୁ ଥିଲେ। ସେତେବେଳେ ଉକ୍ତ ତାଲିକାରେ ଭାରତ ଦ୍ୱିତୀୟ ସ୍ଥାନରେ ରହିଥିଲା। ତେବେ ‘ଓପନ ଡୋର୍ସ ରିପୋର୍ଟ ୨୦୨୪’ ଅନୁଯାୟୀ, ଶିକ୍ଷାବର୍ଷ ୨୦୨୩-୨୪ରେ ୩ ଲକ୍ଷ ୩୧ ହଜାର ୬୦୨ ଜଣ ଭାରତୀୟ ଛାତ୍ରୀଛାତ୍ର ଆମେରିକାର ବିଭିନ୍ନ ଶିକ୍ଷାନୁଷ୍ଠାନରେ ପଢ଼ୁଛନ୍ତି। କୌଣସି ମଧ୍ୟ ଶିକ୍ଷାବର୍ଷରେ ଆମେରିକାରେ ପଢ଼ୁଥିବା ଭାରତୀୟ ଛାତ୍ରୀଛାତ୍ରଙ୍କର ଏହା ସର୍ବକାଳୀନ ସର୍ବାଧିକ ସଂଖ୍ୟା ବୋଲି ଉକ୍ତ ରିପୋର୍ଟ କହିଛି। ୨୦୨୨-୨୩ ଶିକ୍ଷାବର୍ଷ ତୁଳନାରେ ୨୩% ଅଧିକ ଭାରତୀୟ ଛାତ୍ରୀଛାତ୍ର ୨୦୨୩-୨୪ ଶିକ୍ଷାବର୍ଷରେ ଆମେରିକାରେ ପଢ଼ୁଥିବା ନେଇ ଏହି ରିପୋର୍ଟ କହିଛି। ୨୦୨୨-୨୩ ଶିକ୍ଷାବର୍ଷରେ ୨ ଲକ୍ଷ ୬୮ ହଜାର ୯୨୩ ଜଣ ଛାତ୍ରୀଛାତ୍ର ଆମେରିକାରେ ପଢ଼ୁଥିଲେ।
ତେବେ ଆମେରିକାରେ ପଢ଼ୁଥିବା ବିଦେଶୀ ଛାତ୍ରୀଛାତ୍ରମାନଙ୍କ ମଧ୍ୟରେ କେବଳ ୨୯% ଭାରତର ହୋଇଥିବା ଉକ୍ତ ରିପୋର୍ଟ କହିଛି। ଏହି ତାଲିକାରେ ୨ ଲକ୍ଷ ୭୭ ହଜାର ୩୭୮ ଜଣ ଛାତ୍ରୀଛାତ୍ରଙ୍କ ସହ ଚାଇନା ଦ୍ୱିତୀୟ ସ୍ଥାନରେ ରହିଥିବାବେଳେ ୪୩ ହଜାର ୧୪୯ ଛାତ୍ରୀଛାତ୍ରଙ୍କ ସହ ଦକ୍ଷିଣ କୋରିଆ ତୃତୀୟ ସ୍ଥାନରେ ରହିଛି। ସେହିପରି ୨୮ ହଜାର ୯୯୮ ଜଣ ଛାତ୍ରୀଛାତ୍ରଙ୍କ ସହ କାନାଡା ଏବଂ ୨୩ ହଜାର ୧୫୭ ଜଣ ଛାତ୍ରୀଛାତ୍ରଙ୍କ ସହ ତାଇଓ୍ବାନ ଏହି ତାଲିକାରେ ଯଥାକ୍ରମେ ଚତୁର୍ଥ ଏବଂ ପଞ୍ଚମ ସ୍ଥାନରେ ରହିଛନ୍ତି। ସେହିପରି ସ୍ନାତକ ଏବଂ ସ୍ନାତକୋତ୍ତର ଶିକ୍ଷା କ୍ଷେତ୍ରରେ ଭାରତ ଲଗାତର ଦ୍ୱିତୀୟ ବର୍ଷ ପାଇଁ ଆମେରିକାରେ ପଢ଼ୁଥିବା ସର୍ବାଧିକ ବିଦେଶୀ ଛାତ୍ରୀଛାତ୍ର ଥିବା ଦେଶ ହୋଇପାରିଛି। ୨୦୨୨-୨୩ ଶିକ୍ଷାବର୍ଷ ତୁଳନାରେ ୨୦୨୩-୨୪ ଶିକ୍ଷାବର୍ଷରେ ଏହି ସଂଖ୍ୟାରେ ୧୯% ବୃଦ୍ଧି ଘଟି ୧ ଲକ୍ଷ ୯୬ ହଜାର ୫୬୭ରେ ପହଞ୍ଚିଛି। ସେହିପରି ଅଣ ସ୍ନାତକ ଶିକ୍ଷା କ୍ଷେତ୍ରରେ ୩୬ ହଜାର ୫୩ ଜଣ ଭାରତୀୟ ଛାତ୍ରୀଛାତ୍ର ଆମେରିକାରେ ପଢ଼ୁଛନ୍ତି। ବର୍ଷକ ମଧ୍ୟରେ ଏହି ସଂଖ୍ୟାରେ ୧୩% ବୃଦ୍ଧି ଘଟିଛି। ପ୍ରକାଶ ଯେ, ଆମେରିକାରେ ସାଧାରଣତଃ ଶିକ୍ଷାବର୍ଷ ସେପ୍ଟେମ୍ବରରୁ ଆରମ୍ଭ ହୋଇ ପରବର୍ତ୍ତୀ ବର୍ଷ ମେ’ ପର୍ଯ୍ୟନ୍ତ ଚାଲିଥାଏ।
