ବରଗଡ଼ ଅଫିସ,୮ା୪: ବରଗଡ଼ ବ୍ଲକ ଅନ୍ତର୍ଗତ କଟାପାଲି ଗ୍ରାମସ୍ଥିତ ଅନୁଭବ ବିହନ ବ୍ୟାଙ୍କକୁ ଶନିବାର ଜଣେ ବିଦେଶୀ ପର୍ଯ୍ୟଟକ ଆସିଥିଲେ। ସେ ହେଲେ ସୁଇଜରଲାଣ୍ଡର ସେଲିନ। ବିହନ ବ୍ୟାଙ୍କ ଉପରେ ପୁସ୍ତକ ଲେଖିବା ପାଇଁ ସେ ଉକ୍ତ ବିହନ ବ୍ୟାଙ୍କକୁ ଆସିଥିଲେ। ବିହନ ବ୍ୟାଙ୍କରେ ରହିଥିବା ପ୍ରାୟ ୧୧୦୦ ପ୍ରକାର ଧାନ ବିହନ ଓ ୭୦ ପ୍ରକାର ଅଣଧାନ ଯଥା ପନିପରିବା, ମାଣ୍ଡିଆ, ଡାଲି ଜାତୀୟ, ତୈଳ ବୀଜ ଆଦି ସେ ଦେଖିବାକୁ ପାଇଥିଲେ। ସେହିପରି ବିଭିନ୍ନ କିସମର ଚାଉଳ ଅର୍ଥାତ୍ ଲାଲ୍, କଳା, ଧଳା, ବାସ୍ନା ଯୁକ୍ତ, ଔଷଧୀୟ ଗୁଣ ସମ୍ପନ୍ନ ଚାଉଳର ବିବିଧତା ଦେଖି ସେ ଖୁସି ଅନୁଭବ କରିଥିଲେ। ଅସମ୍ଭବ ଭଳିଆ ଲାଗୁଛି ବୋଲି କହିଥିଲେ। ସେ ନିଜ ଦେଶ ତଥା ଦେଶ ବାହାରେ ଜିନ୍ ବ୍ୟାଙ୍କ ଦେଖିଥିଲେ। କିନ୍ତୁ ଏହି ବିହନ ବ୍ୟାଙ୍କ ଏକ ଜୀବନ୍ତ ଚଳନ୍ତି ବିହନ ବ୍ୟାଙ୍କ ଅଟେ ବୋଲି ସେ କହିଥିଲେ। ପଶ୍ଚିମ ଓଡ଼ିଶା କୃଷକ ସଂଗଠନର ପ୍ରବକ୍ତା ସରୋଜ ମହାନ୍ତି ଭାଷାନ୍ତରରେ ତାଙ୍କୁ ସହଯୋଗ କରିଥିଲେ।