କୋରାପୁଟ,୧୨।୧୨(ସ୍ବ.ପ୍ର.): କୋରାପୁଟ ବନ ବିଭାଗ ପକ୍ଷରୁ ସଦର ବ୍ଲକର ବାରିଗୁଡା ଜଙ୍ଗଲରେ ଚଢାଉ କରାଯାଇ ୨୦ହଜାର ଟଙ୍କାର ଚନ୍ଦନକାଠ ସହ ୨ଜଣ ଚନ୍ଦନ ବେପାରୀଙ୍କୁ ଗିରଫ କରି ସୋମବାର କୋର୍ଟ ଚାଲାଣ କରାଯାଇଛି। କୋରାପୁଟ ରେଞ୍ଜ ଅଧିକାରୀ ରୋହିତ କୁମାର ଏହି ସୂଚନା ଦେଇଛନ୍ତି। ବନବିଭାଗ ସେମାନଙ୍କଠାରୁ ୧୦କେଜି ଓଜନର ଚନ୍ଦନକାଠ ସହ ଏକ ବାଇକ ଓ ଗୋଟିଏ ଦେଶୀ ବନ୍ଧୁକ ଜବତ କରିଛି। କୋରାପୁଟ ରେଞ୍ଜ ଅଧିକାରୀଙ୍କ ସୁଚନା ଅନୁଯାୟୀ, ସୋମବାର କୋରାପୁଟ ବ୍ଲକର ବାରିଗୁଡା ଜଙ୍ଗଲରେ ଚନ୍ଦନ କାଠ ବ୍ୟବସାୟୀ ଜଙ୍ଗଲରୁ ଚନ୍ଦନକାଠ କାଟି ନେଉଥିବା ନେଇ କୌଣସି ସୂତ୍ରରୁ ସୁଚନା ମିଳିଥିଲା। ଏହାପରେ ଅଧିକାରୀ ରୋହିତ କୁମାରଙ୍କ ନେତୃତ୍ୱରେ ବନ ବିଭାଗର ଏକ ଟିମ୍ ସ୍ଥାନୀୟ ବାରିଗୁଡା ଜଙ୍ଗଲରେ ଅତର୍କିତ ଚଢାଉ କରିଥିଲେ। ଚଢ଼ାଉ ସମୟରେ ଦୁଇଟି ବ୍ୟାଗରେ ଥିବା ସମୁଦାୟ ୨୦କେଜି କଟା ଚନ୍ଦନକାଠ, ଏକ ଦେଶୀ ବନ୍ଧୁକ, ଟାଙ୍ଗିଆ ଓ ଅନ୍ୟ ଲୁହା ସାମଗ୍ରୀକୁ ଜବତ କରାଯାଇଥିଲା। ଗିରଫ ଦୁଇ ଚନ୍ଦନକାଠ ବେପାରୀ ହେଲେ କୋରାପୁଟ ସଦର ଥାନା ଅନ୍ତର୍ଗତ ବାରିଗୁଡା ଗ୍ରାମର ବାନ୍ଧୁ ମୁଦୁଲି(୪୬) ଓ ମାଛରା ଗ୍ର୍ରାମର ରଥ ମାଝି(୩୯)। ଏନେଇ ବନ ବିଭାଗ ପକ୍ଷରୁ ଏକ ମାମଲା ରୁଜୁ କରାଯାଇ ଗିରଫ ଦୁଇ ଜଣଙ୍କୁ କୋର୍ଟ ଚାଲାଣ କରାଯାଇଛି।
