ରାଇକିଆ,୨୨ା୨(ପ୍ରଦୀପ ବେହେରା): ଚାରାରୋପଣ ପାଇଁ ବିଭିନ୍ନ ଯୋଜନା କାର୍ଯ୍ୟକାରୀ ହେଉଛି । ଏହାର ସୁରକ୍ଷା ପାଇଁ ଜଙ୍ଗଲ ପରିବେଶ ଓ ଜଳବାୟୁ ପରିବର୍ତ୍ତନ ବିଭାଗ ଲକ୍ଷାଧିକ ଟଙ୍କା ଖର୍ଚ୍ଚ କରୁଛି। ଏଥିପାଇଁ ବିଭିନ୍ନ କାର୍ଯ୍ୟକ୍ରମ ମାଧ୍ୟମରେ ଜନ ସାଧାରଣଙ୍କୁ ସଚେତନ କରାଯାଉଛି। ମାତ୍ର ଏବେ ବନ ବିଭାଗ ଏହି ଦାୟିତ୍ୱରୁ ଦୂରେଇ ଯାଉଥିବା ଲକ୍ଷ୍ୟ କରାଯାଉଛି। କନ୍ଧମାଳ ଜିଲା ରାଇକିଆ ବନାଞ୍ଚଳର କଲେଜ ଛକଠାରୁ ବୀର ଛକ ପର୍ଯ୍ୟନ୍ତ ୧୦ କି.ମି. ବ୍ୟାପୀ ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନା(ଏମ୍ଜିଏନଆରଇଜିଏସ୍)ରେ ୨୦୨୪-୨୦୨୫ ବର୍ଷରେ କରାଯାଇଥିବା ପଥପାର୍ଶ୍ୱ ଚାରାରୋପଣର ଚାରାଗୁଡ଼ିକ ରକ୍ଷଣାବେକ୍ଷଣ ଅଭାବରୁ ନଷ୍ଟ ହୋଇଗଲାଣି । ଚାରାରୋପଣ ପରେ ଠିକ ସମୟରେ ଆବଶ୍ୟକ ଅନୁଯାୟୀ ପାଣି ନ ଦେବାରୁ ତାର ଜାଲି ଭିତରେ ଥିବା ଗଛସବୁ ପାଣି ଅଭାବରୁ ଶୁଖିଗଲାଣି। ସେଠାରେ ଥିବା ଫଳକରେ ମଧ୍ୟ ଚାରା ସଂଖ୍ୟା, ଖର୍ଚ୍ଚ ହୋଇଥିବା ଅର୍ଥ ପରିମାଣ ଉଲ୍ଲେଖ ନାହିଁ। ବର୍ଷ ତମାମ ସଚେତନତା ବାର୍ତ୍ତା ବାଣ୍ଟୁଥିବା ବିଭାଗ ନିଜେ ଏଥିପ୍ରତି ସଚେତନ ନ ରହିବା ନେଇ ପରିବେଶବିତ୍ମାନେ ପ୍ରଶ୍ନ ଉଠାଇଛନ୍ତି। ଏ ନେଇ ରାଇକିଆ ରେଞ୍ଜର ଯୁଧିଷ୍ଠିର ବେହେରାଙ୍କୁ ପଚାରିବାରୁ ସେ କହିଲେ, ଏମ୍ଜିଏନଆରଇଜିଏସ୍ରେ ଚାରାରୋପଣ ଜୁଲାଇରେ କରା ନ ଯାଇ ବିଳମ୍ବରେ କରାଯାଇଥିବାରୁ ଏଭଳି ପରିସ୍ଥିତି ହୋଇଛି । ତୁରନ୍ତ ବୃକ୍ଷରେ ପାଣି ଦେବା ବ୍ୟବସ୍ଥା କରାଯିବ ବୋଲି ସେ କହିଛନ୍ତି ।
