ଖୁଣ୍ଟୁଣୀ,୨୬।୨(ଡି.ଏନ.ଏ.): ଆଠଗଡ଼ ବନାଞ୍ଚଳ ଅଧୀନ ସୁବାସୀ ସଂରକ୍ଷିତ ଜଙ୍ଗଲରେ ଗୁରୁବାର ମଧ୍ୟାହ୍ନରେ ଅଗ୍ନିକାଣ୍ଡ ଘଟିଛି। ଏଥିରେ ପ୍ରାୟ ୪୦ ଏକର ଜଙ୍ଗଲ ପୋଡିଯାଇଥିବା ଜଣାପଡିଛି। ଏହି ଜଙ୍ଗଲ ରମ୍ପେଇ ଗ୍ରାମବାସୀଙ୍କ ଦ୍ବାରା ୧୯୯୫ରୁ ଜଗାରଖା କରାଯାଉଥିଲା। ଗତ ସପ୍ତାହରେ ଏଠାରେ ନିଆଁ ଲାଗି ପ୍ରାୟ ୨୦ ଏକର ଜଙ୍ଗଲ ପୋଡି ଯାଇଥିବାବେଳେ ଗୁରୁବାର ପ୍ରାୟ ୪୦ ଏକର ପୋଡିଯାଇଥିବା ବନସୁରକ୍ଷା ସମିତି କର୍ମକର୍ତ୍ତା ଦିଲୀପ ଶେଠ କହିଛନ୍ତି। ତେବେ ନିଆଁ ଲିଭାଇବା ପାଇଁ ଆଠଗଡ଼ ଅଗ୍ନିଶମ କେନ୍ଦ୍ରକୁ ଖବର ଦିଆଯାଇଥିଲେ ମଧ୍ୟ ସେଠାରେ ସେହି ସମୟରେ ଦମକଳ ଗାଡି ନ ଥିବା ଅଗ୍ନିଶମ ଅଧିକାରୀ ଦୁଷ୍ମନ୍ତ ସ୍ବାଇଁ କହିଛନ୍ତି। ଅପରାହ୍ନ ୩ଟାରେ ବନାଞ୍ଚଳ ଅଧିକାରୀ ଅୟେସା ଅଖ୍ତାର ନିଶାଙ୍କ ଏୟାର ଟ୍ୟାଗ ପଠାଇ ନିଆଁକୁ ଆୟତ୍ତ କରିଥିଲେ। ଅଗ୍ନିକାଣ୍ଡର କାରଣ ଅସ୍ପଷ୍ଟ ରହିଥିବାବେଳେ କେତେଜଣ ପେସାଦାର ଶିକାରୀ, କାଠଚୋର ଓ କାଠ କୋଇଲା ମାଫିଆମାନେ ନିଆଁ ଲଗାଇ ଦେଇଥିବା ବନସୁରକ୍ଷା ସମିତି ପକ୍ଷରୁ ସନ୍ଦେହ କରାଯାଉଛି। ସେମାନଙ୍କୁ ଧରିବା ପାଇଁ ଯୋଜନା କରାଯାଉଥିବା ସମିତି ପକ୍ଷରୁ କୁହାଯାଇଛି। ରିପୋର୍ଟ ଲେଖାଯିବାବେଳକୁ ନିଆଁ ଅନ୍ୟ ଜଙ୍ଗଲକୁ ବ୍ୟାପୁଥିବା ଜଣାପଡିଛି। ଖୁଣ୍ଟୁଣୀ ବନାଞ୍ଚଳକୁ ସୁରକ୍ଷା ପାଇଁ ଖୁଣ୍ଟୁଣୀଠାରେ ଦମକଳ କେନ୍ଦ୍ର ସ୍ଥାପନ କରିବାକୁ ଦାବି ହେଉଛି।
