କେନ୍ଦୁଝର,୨୭ା୨: କେନ୍ଦୁଝର ଜିଲାର ବିଭିନ୍ନ ଜଙ୍ଗଲରେ ନିଆଁ ଲାଗୁଥିବାରୁ ବନ ବିଭାଗ ପାଇଁ ଚିନ୍ତାର କାରଣ ହୋଇଛି। ନିଆଁ ଲାଗିଲେ ଲିଭାଇବା ପାଇଁ କାୈଣସି ବ୍ୟବସ୍ଥା ଗ୍ରହଣ କରାଯାଉ ନ ଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ଜିଲାର ତେଲକୋଇ, ସଦର, ଭୂୟାଁ ଓ ଜୁଆଙ୍ଗପୀଢ଼, ଘଟଗାଁ, ଦୈତାରୀ, ବଡ଼ବିଲ ଆଦି ବନାଞ୍ଚଳ ଜଙ୍ଗଲରେ ନିଆଁ ଲାଗୁଥିବା ନଜିର ରହିଛି। ଏନେଇ ବନ ବିଭାଗ ପକ୍ଷରୁ ଜନ ସଚେତନତା ସୃଷ୍ଟି କରିବା ସହ ନିଆଁ ଲିଭାଇବା ପାଇଁ ସ୍କ୍ବାଡ୍ ଗଠନ କରାଯାଇଛି। ଏହା ସତ୍ତ୍ୱେ ପ୍ରତ୍ୟେକ ବର୍ଷ ଜିଲାର ବିଭିନ୍ନ ଜଙ୍ଗଲରେ ନିଆଁ ଲାଗୁଥିବାରୁ ବ୍ୟାପକ କ୍ଷୟକ୍ଷତି ଘଟୁଛି। ତେଲକୋଇ ବନାଞ୍ଚଳ ଅନ୍ତର୍ଗତ ଛାମୁଣ୍ଡା ଜଙ୍ଗଲ ଓ ଆଖପାଖ ଚାଷ ଜମିରେ ନିଆଁ ଲାଗିବାରୁ ବ୍ୟାପକ କ୍ଷୟକ୍ଷତି ହୋଇଛି। ହେଲେ ଘଟଣାସ୍ଥଳରେ ଉପସ୍ଥିତ ଥିବା ଜଣେମାତ୍ର କର୍ମଚାରୀ ନିରୁପାୟ ହୋଇ ନିଆଁ ଲିଭିବା ପର୍ଯ୍ୟନ୍ତ ଅପେକ୍ଷା କରିଥିଲେ। ନିଆଁ ବ୍ୟାପି ସମଗ୍ର ଅଞ୍ଚଳ ଧୂଆଁରେ ଆଚ୍ଛାଦିତ ହୋଇଯାଇଥିଲା । ଫଳରେ ତେଲକୋଇ-ଜଗମୋହନପୁର ରାସ୍ତାରେ ଯାତାୟାତ ବାଧାପ୍ରାପ୍ତ ହୋଇଥିଲା।
ପ୍ରକାଶ ଯେ, ଛାମୁଣ୍ଡା, ବିଞ୍ଜବାହାଳ, ଗୋଳାବନ୍ଧ, କାକୁଡିଅମ୍ବା, ଟୁଙ୍ଗୁରୁବାହାଳ, ଦନ୍ଦରଗଣି, ନୂଆଡିହି ଆଦି ଅଞ୍ଚଳରେ ନିଆଁକୁ ରୋକିବା ପାଇଁ ୪ କର୍ମଚାରୀଙ୍କୁ ନିୟୋଜିତ କରାଯାଇଛି। ସେହିପରି ସଦର ରେଞ୍ଜ ଓ ଭୂୟାଁ ଓ ଜୁଆଙ୍ଗ ପୀଢ ରେଞ୍ଜ ଅନ୍ତର୍ଗତ ଜୁଡ଼ିଆ ଓ ସିଦ୍ଧମଠ ଜଙ୍ଗଲରେ ନିଆଁ ଲାଗିଥିବା ଦେଖିବାକୁ ମିଳିଛି। ସେହିପରି ସାହରପଡ଼ା ବ୍ଲକ ଲୁଙ୍ଗା ପଟାସ ଓ ବେଗୁନିଆପସି କାଜୁ ଜଙ୍ଗଲରେ ନିଆଁ ଲାଗିଥିବା ସୂଚନା ମିଳିଛି। କେହି ଦୁର୍ବୃତ୍ତ ନିଆଁ ଳଗାଇ ଦେଇଥିବା କୁହାଯାଉଛି। ଏନେଇ ଡିଏଫଓ ସ୍ବୟମ ମଲ୍ଲିକଙ୍କୁ ପଚାରିବାରୁ ବିଭିନ୍ନ ସ୍ଥାନରେ ନିଆଁ ଲାଗିଥିବା ଖବର ମିଳିଛି । ନିଆଁ ଲିଭାଇବା ପାଇଁ ପଦକ୍ଷେପ ନିଆଯାଉଛି। ପ୍ରାୟ ୧୫୦ ଜଣ କର୍ମଚାରୀ ଓ ୧୦ଟି ଗାଡ଼ିକୁ ନିୟୋଜିତ କରାଯାଇଥିବା କହିଛନ୍ତି।