ଠାକୁରମୁଣ୍ଡା,୪।୪ (ଡି.ଏନ୍.ଏ.): ମୟୂରଭଞ୍ଜ ଜିଲା କରଞ୍ଜିଆ ବନଖଣ୍ଡ ଠାକୁରମୁଣ୍ଡା ରେଞ୍ଜ ଅନ୍ତର୍ଗତ କେନ୍ଦୁମୁଣ୍ଡି ସଂରକ୍ଷିତ ଜଙ୍ଗଲ (୨) ଭିତରୁ ୬ ଶିକାରୀଙ୍କୁ ଗିରଫ କରାଯାଇଛି। ଏହା ସହ କୁଟୁରା ମାଂସ ଜବତ ହୋଇଛି। କୁଟୁରା ଶିକାର କରି ଜଙ୍ଗଲ ଭିତରେ ମାଂସ ଭାଗବାଣ୍ଟ କରୁଥିବା ସମୟରେ ଶନିବାର ରାତିରେ ବନକର୍ମଚାରୀ ୬ ଜଣ ଶିକାରୀଙ୍କୁ ଗିରଫ କରିଛନ୍ତି। ସେମାନଙ୍କ ନିକଟରୁ ୧୨ କେଜି ମାଂସ ସହ ବ୍ୟବହୃତ ଧନୁ ଓ ତୀର ଜବତ ହୋଇଛି। ସଂରକ୍ଷିତ ଜଙ୍ଗଲ ଭିତରେ ଶିକାର ଚାଲିଥିବା ନେଇ କୌଣସି ସୂତ୍ରରୁ ଖବରପାଇ ଠାକୁରମୁଣ୍ଡା ରେଞ୍ଜ ଅଧିକାରୀ କିଶୋର କୁମାର ପାଣିଗ୍ରାହୀଙ୍କ ନେତୃତ୍ୱରେ ଫରେଷ୍ଟର ନଳିନୀ ମହାନ୍ତ ସମେତ ବନକର୍ମଚାରୀମାନେ ରାତିରେ ଚଢ଼ାଉ କରିଥିଲେ।