ନୟାଗଡ଼ ଅଫିସ,୨।୧୦: ନୟାଗଡ଼ ଜିଲା ଦଶପଲ୍ଲା ବ୍ଲକ କୁଲୁରୁକୁମ୍ପା ପଞ୍ଚାୟତ ଟାଙ୍ଗନାଡି ଗାଁରେ ପଦା ହୋଇଥିବା ୪ଜଙ୍ଗଲକୁ ଗ୍ରାମବାସୀ ଠେଙ୍ଗାପାଳିରେ ସୁରକ୍ଷା ଦେଇ ସବୁଜିମା କରାଇ ପାରିଛନ୍ତି। ତେବେ ଜୀବନଜୀବିକା ପ୍ରଭାବିତ ପରେ ଆଦିବାସୀମାନେ ମେଳି ହୋଇ ଏଭଳି କାମ କରିବାକୁ ଆଗେଇ ଆସିଥିଲେ। ନିଜ ପାଇଁ କରୁ କରୁ ଏବେ ୪୫ ଏକର ଜଙ୍ଗଲ ସୁରକ୍ଷିତ ହୋଇପାରିଛି। ଏହି ଜଙ୍ଗଲରେ ଶାଳ, ପିଆଶାଳ, ଅସନ, ବାନ୍ଧଣ, ବାଉଁଶ, କୁସୁମ ଆଦି ମୂଲ୍ୟବାନ ଗଛ ଦେଖିବାକୁ ମିଳୁଛି। ଏହି ଜଙ୍ଗଲ ଏବେ ଆଦିବାସୀଙ୍କୁ ବଞ୍ଚିବାର ରାହା ଯୋଗାଇଛି।
ଟାଙ୍ଗନାଡି ଗାଁର ତାବଳି ପାହାଡ, ଚରିଆବଣ, ଭାଲୁ ମୁଣ୍ଡିଆ, ବିଲୁଆପଡା ଜଙ୍ଗଲ ୨ ହଜାର ମସିହା ବେଳକୁ ପଦା ହୋଇଯାଇଥିଲା। ଏଥିଯୋଗୁ ଆଦିବାସୀମାନେ ଜିବୀକା ନିର୍ବାହ କରିବା କଷ୍ଟକର ହୋଇପଡିଲା। ସେମାନେ ଆଉ ଜଙ୍ଗଲରୁ ଶାଳ ଓ ଶିଆଳି ପତ୍ର ପାଇଲେ ନାହିଁ। ଫୁଲ ଝାଡୁ ବି କରିପାରିଲେ ନାହିଁ। ଏପରି କି ବଣ ଫଳମୂଳ ପାଇଲେ ନାହିଁ। ଫଳରେ ଜୀବନ ଧାରଣ କରିରହିବା କଷ୍ଟକର ହୋଇ ପଡିଲା। ଜଙ୍ଗଲ ଜଗିବା ପାଇଁ ସେମାନେ ଆଗ୍ରହ ପ୍ରକାଶ କରୁଥିଲେ ମଧ୍ୟ କାଠ ମାଫିଆମାନେ ସେମାନଙ୍କୁ ହଇରାଣ କରୁଥିଲେ। ବିଭିନ୍ନ ସମୟରେ ସେମାନଙ୍କର ମଧ୍ୟରେ ବିବାଦ ସୃଷ୍ଟି କରୁଥିଲେ। ତେବେ ୨୦୦୩ ରେ ମହିଳାପୁରୁଷ ଆଦିବାସୀ ଏକଜୁଟ ହୋଇ ଠେଙ୍ଗାପାଳିରେ ଜଙ୍ଗଲ ଜଗିବା ଆରମ୍ଭ କଲେ। କାଠମାଫିଆଙ୍କୁ ଟାର୍ଗେଟ କରି ସେମାନଙ୍କ କାର୍ଯ୍ୟରେ ରୋକ୍ ଲଗାଇଲେ। ପଦା ହୋଇଥିବା ଜଙ୍ଗଲ ଧୀରେ ଧୀରେ ଘଞ୍ଚ ହେବାରେ ଲାଗିଲା। ସୁରକ୍ଷାର ୭ ବର୍ଷ ପରେ ସେମାନଙ୍କ ଜୀବନ ଜୀବିକା ପୁଣି ଜଙ୍ଗଲ ପୂରଣ କଲା। ଜଙ୍ଗଲରୁ ଶାଳ ଓ ଶିଆଳି ପତ୍ର ଆଣି ଖଲି ତିଆରି କଲେ। ଫୁଲ ଝାଡୁ ମଧ୍ୟ ତିଆରି କଲେ। ପାଣିଆଳୁ, ମସିହା, କଡବା, ଟୁଙ୍ଗା ଆଦି ଫଳମୂଳ ସଂଗ୍ରହ କରି ଖାଇବା ସହ ବିକ୍ରି କରି ଗୁଜୁରାଣ ମେଣ୍ଟାଇଲେ। ଏବେ ସେମାନେ ଆଦିବାସୀଙ୍କ ଗୋଷ୍ଠୀ ଜଙ୍ଗଲ ସମ୍ବଳ ଅଧିକାରରେ ଜଙ୍ଗଲ ପଟ୍ଟା ପାଇବା ପାଇଁ ସରକାରଙ୍କ ନିକଟରେ ଆବେଦନ କରିବାକୁ ନିଷ୍ପତ୍ତି ନେଇଛନ୍ତି। ଏ ନେଇ ଗାଁର ପଦ୍ମ ଚରଣ ମାଝି, ନିରୁପମା ମାଝି, ମନୋରଞ୍ଜନ ବେହେରା କୁହନ୍ତି, ଆଦିବାସୀଙ୍କ ଏକତା ଜଙ୍ଗଲକୁ ସୁରକ୍ଷା କରିପାରିଲା। ଜଙ୍ଗଲ ସୃଷ୍ଟି ପରେ ସେମାନଙ୍କ ଜୀବନଜୀବିକାରେ ଆଉ ଅସୁବିଧା ହେଉନି। ଗାଁର ୨୭ ପରିବାର ସଦସ୍ୟ ଜଙ୍ଗଲ ଉପରେ ନିର୍ଭର କରି ଚଳୁଛନ୍ତି। ତେବେ ସରକାର ଆମକୁ ଜଙ୍ଗଲ ଜମି ପଟ୍ଟା ଯୋଗାଇ ଦିଅନ୍ତୁ ବୋଲି କହିଛନ୍ତି।
ଲୋକନାଥ ମିଶ୍ର