ନୂଆଦିଲ୍ଲୀ,୧୩ ।୧୧: ଅଲ ଇଣ୍ଡିଆ ଇନଷ୍ଟିଚ୍ୟୁଟ ଅଫ ମେଡିକାଲ ସାଇନସେସ(ଏମ୍ସ), ଦିଲ୍ଲୀର ପୂର୍ବତନ ନିର୍ଦ୍ଦେଶକ ଡାକ୍ତର ରଣଦୀପ ଗୁଲେରିଆ ୫ ମାସ ପୂର୍ବରୁ ସ୍ୱେଚ୍ଛାକୃତ ଅବସର(ଭିଆରଏସ) ନେଇଛନ୍ତି । ସେ ପ୍ରାୟ ୩୦ ବର୍ଷଧରି ଏମ୍ସରେ ସେବା ଯୋଗାଇ ଆସିଥିଲେ ।
ଏଥର ତାଙ୍କୁ ନିର୍ଦ୍ଦେଶକ ଭାବେ କାମ କରିବାର ସୁଯୋଗ ମିଳିଥିଲା । ଦୁଇଥର ତାଙ୍କର କାର୍ଯ୍ୟକାଳକୁ ବଢାଇ ଦିଆଯାଇଥିଲା । ପଦରୁ ହଟିବା ପରେ ସେ ଭିଆରଏସ ପାଇଁ ଆବେଦନ କରିଥିଲେ । ଏବେ ତାଙ୍କର ଆବେଦନକୁ ମଞ୍ଜୁର କରାଯାଇଛି । ଡାକ୍ତର ଗୁଲେରିଆ ଆସନ୍ତା ବର୍ଷ ଏପ୍ରିଲରେ ଅବସର ନେଇଥାଆନ୍ତେ ।
ସୂଚନାଯୋଗ୍ୟ, କରୋନା ମହାମାରୀ ସମୟରେ ଡାକ୍ତର ଗୁଲେରିଆ ସରକାରଙ୍କ ସହ ମିଶି ସଚେତନତା ଅଭିଯାନ ଚଲାଇଥିଲେ । ଗୁଲେରିଆ ଏମ୍ସରେ ୧୯୯୨ରେ ଚିକିତ୍ସା ବିଭାଗରେ ସହାୟକ ପ୍ରଫେସର ଭାବେ କାମ କରିଥିଲେ । ୨୦୧୧ରେ ସେ ପଲ୍ମନରୀ, କ୍ରଟିକାଲ କ୍ରେୟାର ଓ ସ୍ଲିପ ଚିକିତ୍ସା ବିଭାଗ ଗଠନ କରିଥିଲେ ।
୨୮ ମାର୍ଚ୍ଚ, ୨୦୧୭ରେ ପାଞ୍ଚ ବର୍ଷ କାର୍ଯ୍ୟକାଳ ପାଇଁ ଏମ୍ସର ନିର୍ଦ୍ଦେଶକ ଭାବେ ଦାୟିତ୍ୱ ଗ୍ରହଣ କରିବା ପୂର୍ବରୁ ସେ ବିଭାଗୀୟ ମୁଖ୍ୟ ଭାବେ କାମ କରିଥିଲେ । ମାର୍ଚ୍ଚ ୨୪ରେ ତାଙ୍କର କାର୍ଯ୍ୟକାଳ ଶେଷ ହେଉଥିବା ବେଳେ ଏହାକୁ ୩ ମାସ ବୃଦ୍ଧି କରାଯାଇଥିଲା । ଏହା ଶେଷ ହେବା ପରେ ତାଙ୍କୁ ଆଉ ୩ ମାସ ପାଇଁ ସେବା ବୃଦ୍ଧି କରାଯାଇଥିଲା ।