ମୁମ୍ବାଇ, ୨୪।୯: ଅଷ୍ଟ୍ରେଲିଆର ପୂର୍ବତନ କିମ୍ବଦନ୍ତୀ କ୍ରିକେଟର୍ ତଥା ଜଣାଶୁଣା ଭାଷ୍ୟକାର ଡିନ୍ ଜୋନ୍ସଙ୍କ ଗୁରୁବାର ସକାଳେ ପରଲୋକ ଘଟିଛି। ନିଜ ସମୟର ଜଣେ ଷ୍ଟାଇଲିସ ବ୍ୟାଟ୍ସମ୍ୟାନ ଥିବା ଜୋନ୍ସ ହାର୍ଟ ଆଟାକ୍ରେ ମୃତ୍ୟୁବରଣ କରିଛନ୍ତି। ଆଇପିଏଲ୍-୧୩ ଲାଗି ଭାଷ୍ୟକାର ଦାୟିତ୍ୱ ତୁଲାଇବା ପାଇଁ ସେ ମୁମ୍ବାଇରେ ଅବସ୍ଥାପିତ ଥିଲେ।
ବର୍ଷୀୟ ଜୋନ୍ସ କ୍ରିକେଟ୍ରୁ ଅବସର ନେବାପରେ ଭାଷ୍ୟକାର ଭାବେ ବେଶ୍ ପରିଚୟ ସୃଷ୍ଟି କରିଥିଲେ। ଚଳିତ ଆଇପିଏଲ୍ରେ ଭାଷ୍ୟକାର ଦାୟିତ୍ୱ ତୁଲାଇବା ପାଇଁ ଜୋନ୍ସ ମୁମ୍ବାଇରେ ଅବସ୍ଥାପିତ ଥିଲେ। ସେ ଷ୍ଟାର୍ ସ୍ପୋଟର୍ସ ଚ୍ୟାନେଲ ଭାଷ୍ୟକାର ଟିମ୍ରେ ସାମିଲ ଥିଲେ। ଗୁରୁବାର ସକାଳେ ଜୋନ୍ସ ରହୁଥିବା ହୋଟେଲରେ ସାଥୀ ଭାଷ୍ୟକାର ବ୍ରେଟ୍ ଲି ଓ ନିଖିଳ ଚୋପ୍ରାଙ୍କ ସହ ବ୍ରେକ୍ ଫାଷ୍ଟ କରୁଥିଲେ। କିନ୍ତୁ ହଠାତ୍ ସେ ହାର୍ଟ ଆଟାକ୍ର ସମ୍ମୁଖୀନ ହୋଇଥିଲେ। ଏହି ସମୟରେ ବ୍ରେଟ୍ ଲି ତାଙ୍କୁ ସିପିଆର୍ ଦେବାକୁ ଚେଷ୍ଟା କରିଥିଲେ ମଧ୍ୟ ତାହା ବୃଥା ଯାଇଥିଲା।
୧୯୮୪ରୁ ୧୯୯୪ ମଧ୍ୟରେ ଅଷ୍ଟ୍ରେଲିଆ କ୍ରିକେଟ୍ ଦଳର ଜଣେ ପ୍ରମୁଖ ସଦସ୍ୟ ରହିଥିଲେ। ସେ ଅଷ୍ଟ୍ରେଲିଆ ପାଇଁ ୫୨ ଟେଷ୍ଟ ଓ ୧୧୪ ଦିନିକିଆ ମ୍ୟାଚ୍ ଖେଳିଛନ୍ତି। ୫୨ ଟେଷ୍ଟରୁ ସେ ୧୧ ଶତକ ସହାୟତାରେ ୩,୬୩୧ ରନ୍ ସଂଗ୍ରହ କରିଛନ୍ତି। ସେହିଭଳି ୭ ଶତକ ସହାୟତାରେ ସେ ଦିନିକିଆରେ ୬,୦୬୮ ରନ୍ କରିଛନ୍ତି। ସେ ୧୯୮୭ ବିଶ୍ୱକପ୍ ବିଜୟୀ ଅଷ୍ଟ୍ରେଲିଆ ଦଳର ଜଣେ ପ୍ରମୁଖ ସଦସ୍ୟ ରହିଥିଲେ। ସେହିଭଳି ୧୯୮୬ରେ ଭାରତ ବିପକ୍ଷ ଏକ ଟେଷ୍ଟ ମ୍ୟାଚ୍ରେ ସେ ଦ୍ୱିଶତକୀୟ ଇନିଂସ ଖେଳିଥିଲେ।