ବ୍ରହ୍ମପୁର ଅଫିସ,୨୮ା୩: ବ୍ରହ୍ମପୁର ସହରରେ ପୌର ନିର୍ବାଚନ ପରବର୍ତ୍ତୀ ହିଂସା ଓ ଜଣେ କର୍ପୋରେଟରଙ୍କୁ ହତ୍ୟା ଧମକ ଘଟଣାରେ ଗୋଷାଣୀନୂଆଗାଁ ପୋଲିସ ୫ ଅଭିଯୁକ୍ତଙ୍କୁ ଗିରଫ କରିଛି। ସେମାନେ ହେଲେ ପ୍ରେମନଗର ଫର୍ଚ୍ୟୁନ ଶଙ୍କର ପ୍ୟାଲେସରେ ରହୁଥିବା ଶିବା ଓରଫ କୁମାର ଅଭିଷେକ ବେହେରା(୧୯), ବିଜିପୁର ଲକ୍ଷ୍ମୀସାହିରେ ରହୁଥିବା ସାଗର ପାତ୍ର(୨୯), ହାଉସିଂ ବୋର୍ଡ ବିମଳାନଗରରେ ରହୁଥିବା ଅରୁଣ ଓରଫ ସରୋଜ କୁମାର ବେହେରା, ଜଗନ୍ନାଥ ବିହାରରେ ରହୁଥିବା ସିତୁନ ସାହୁ(୨୧) ଓ ବାଲାଜୀପେଣ୍ଠ ସାହିରେ ରହୁଥିବା ସନ୍ତୁ ଓରଫ ସନ୍ତୋଷ କୁମାର ସାହୁ(୨୯)।
ଘଟଣାରେ ବ୍ୟବହୃତ ସ୍କୋଡା କାର୍ (ଓଆର୍ ୦୨ ବି ଡବ୍ଲ୍ୟୁ ୦୦୨୪)କୁ ପୋଲିସ ଶିବାଙ୍କଠାରୁ ଜବତ କରିଛି। ମାମଲା ନଂ. ୪୬/୨୨ରେ ଗିରଫ ଉପରୋକ୍ତ ୫ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି ବୋଲି ଏକ ପ୍ରେସ୍ ବିବୃତିରେ ବ୍ରହ୍ମପୁର ଏସ୍ଡିପିଓ ବିଷ୍ଣୁପ୍ରସାଦ ପତି ସୂଚନା ଦେଇଛନ୍ତି। ପରେ ଅଭିଯୁକ୍ତମାନଙ୍କୁ ବିଚାରବିଭାଗୀୟ ହାଜତକୁ ପଠାଇ ଦିଆଯାଇଥିବା ପୋଲିସ କହିଛି।
ପ୍ରକାଶ ଯେ, ହାଉସିଂ ବୋର୍ଡ ବ୍ରିଟ୍ କଲୋନିରେ ରହୁଥିବା ବୀରେନ ପଟ୍ଟନାୟକ ବିଏମ୍ସିର ଜଣେ ପୂର୍ବତନ କର୍ପୋରେଟର ଥିବା ବେଳେ ସେ ଚଳିତ ଥର ୱାର୍ଡ ନମ୍ବର ୧୨ରୁ ସ୍ବାଧୀନ ପ୍ରାର୍ଥୀ ଭାବେ ନିର୍ବାଚନ ଲଢ଼ିଥିଲେ। ସେହିପରି ତାଙ୍କ ସ୍ତ୍ରୀ ସସ୍ମିତା ଦାସ ଭାଜପାରୁ ଟିକେଟ ପାଇ ବିଏମ୍ସିର ୧୪ ନମ୍ବର ୱାର୍ଡର କର୍ପୋରେଟର ପ୍ରାର୍ଥୀ ଭାବେ ନିର୍ବାଚନ ଲଢ଼ିଥିଲେ। ଉଭୟ ବୀରେନ ଓ ତାଙ୍କ ସ୍ତ୍ରୀ ଉକ୍ତ ନିର୍ବାଚନରେ ପରାଜିତ ହୋଇଥିଲେ। ଗତ ୨୬ତାରିଖ ବିଳମ୍ବିତ ରାତି ପ୍ରାୟ ୩ଟାରେ ଏକ କାର୍ ବୀରେନଙ୍କ ଘର ସମ୍ମୁଖରେ ପହଞ୍ଚିଥିଲା। ଗାଡ଼ି ଭିତରୁ ୭/୮ ଜଣ ଯୁବକ ବନ୍ଧୁକ ଓ ବିଭିନ୍ନ ମାରଣାସ୍ତ୍ର ଧରି ବୀରେନ ଓ ତାଙ୍କ ସ୍ତ୍ରୀଙ୍କୁ ଜୀବନରେ ମାରିଦେବାକୁ ଧମକ ଦେଇଥିଲେ। ଏନେଇ ଥାନାରେ ଅଭିଯୋଗ ହୋଇଥିଲା।
ଫଟୋ-ବିଏମ-୨୮-୭-ଗିରଫ ୫ ଅଭିଯୁକ୍ତ।