ବେଙ୍ଗାଲୁରୁ, ୧୯।୮: ରବିବାର ପୂର୍ବତନ ଭାରତୀୟ କ୍ରିକେଟର୍ ଚେତନ ଚୌହାନଙ୍କ ବିୟୋଗ ଘଟିଥିଲା। ଏହାର ୪ଦିନ ନ ବିତୁଣୁ ଆଉ ଜଣେ କ୍ରିକେଟର୍ ମୃତ୍ୟୁବରଣ କରିଛନ୍ତି। ସେ ହେଉଛନ୍ତି ଗୋପାଳସ୍ବାମୀ କସ୍ତୁରୀରଙ୍ଗମ। ବୁଧବାର ହାର୍ଟ ଆଟାକ୍ରେ ୮୯ ବୟସରେ ଗୋପାଳସ୍ବାମୀ ଇହଲୀଳା ସମ୍ବରଣ କରିଛନ୍ତି। ଏହି ଡାହାଣହାତୀ ଦ୍ରୁତ ବୋଲର କୌଣସି ଅନ୍ତର୍ଜାତୀୟ ମ୍ୟାଚ୍ ଖେଳି ନ ଥିଲେ ମଧ୍ୟ ଦେଶ ସ୍ବାଧୀନତା ପରେ ଘରୋଇ କ୍ରିକେଟ୍ରେ ବେଶ୍ ସକ୍ରିୟ ଥିଲେ। ସେତେବେଳେ ସେ ମହୀଶୂର ଟିମ୍ ପକ୍ଷରୁ ରଣ୍ଜୀ ଟ୍ରଫି ମ୍ୟାଚ୍ ଖେଳିଥିଲେ। ୧୯୪୮ରୁ ୧୯୬୩ ପର୍ଯ୍ୟନ୍ତ ସେ ୩୬ ପ୍ରଥମ ଶ୍ରେଣୀ ମ୍ୟାଚ୍ ଖେଳି ୯୪ ଉଇକେଟ୍ ହାସଲ କରିଥିଲେ। ୧୯୫୨ରେ ଓ୍ବେଷ୍ଟଇଣ୍ଡିଜ ଗସ୍ତ ଲାଗି ଭାରତୀୟ ଦଳରେ ସାମିଲ ହୋଇଥିଲେ ମଧ୍ୟ ବ୍ୟକ୍ତିଗତ କାରଣ ଦର୍ଶାଇ ଗୋପାଳସ୍ବାମୀ ଏହି ଗସ୍ତରୁ ଓହରି ଯାଇଥିଲେ। କ୍ରିକେଟ୍ରୁ ସନ୍ନ୍ୟାସ ଗ୍ରହଣ କରିସାରିବା ପରେ ସେ ବିସିସିଆଇ ପିଚ୍ କ୍ୟୁରେଟର୍ ଭାବେ ବହୁବର୍ଷ କାର୍ଯ୍ୟ କରିଥିଲେ। ଏପରିକି ବିସିସିଆଇର ଗ୍ରାଉଣ୍ଡ୍ ଓ ଉଇକେଟ୍ କମିଟିର ଅଧ୍ୟକ୍ଷ ଭାବେ ମଧ୍ୟ ସେ ଦ୍ୱାୟିତ୍ୱ ତୁଲାଇଥିଲେ। ସେହିଭଳି ଗୋପାଳସ୍ବାମୀ କର୍ନାଟକ ଷ୍ଟେଟ୍ କ୍ରିକେଟ୍ ଆସୋସିଏଶନ (କେଏସ୍ସିଏ)ର ଉପସଭାପତି ମଧ୍ୟ ରହିଥିଲେ। ଗୋପାଳସ୍ବାମୀଙ୍କ ପୁଅ କେ. ଶ୍ରୀରାମ ମଧ୍ୟ ବର୍ତ୍ତମାନ ବିସିସିଆଇର ପିଚ୍ କ୍ୟୁରେଟର୍ ରହିଛନ୍ତି।
