ନୂଆଦିଲ୍ଲୀ,୫।୭: ଇଂଲଣ୍ଡ କ୍ରିକେଟ ଟିମ୍ର ପୂର୍ବତନ ଅଧିନାୟକ ନାସିର ହୁସେନ ଭାରତୀୟ ଟିମ୍ର ପୂର୍ବ ଅଧିନାୟକ ସୌରଭ ଗାଙ୍ଗୁଲିଙ୍କ ବିଷୟରେ ଏକ ମଜାଦାର କଥା କହିଛନ୍ତ। ଏହା ଏବେ ଚର୍ଚ୍ଚାକୁ ଆସିଛି।
ଷ୍ଟାର ସ୍ପୋଟ୍ସର ଏକ ଶୋ’ରେ ହୁସେନ କହିଛନ୍ତି, ଉଭୟ ଟିମ୍ ଖେଳିବା ସମୟରେ ଅନେକ ସ୍ମରଣୀୟ ମୂହୁର୍ତ୍ତ ରହିଛି। ସ୍ବଭାବରେ ଗାଙ୍ଗୁଲୀ ବିନମ୍ର ଥିଲେ। ଭାରତୀୟ ଟିମ୍କୁ ସେ ଶକ୍ତିଶାଳୀ ଦଳରେ ପରିଣତ କରିଥିଲେ। ଏଣୁ ତାଙ୍କ ଦଳ ସହ ଖେଳିବା, କୌଣସି ଯୁଦ୍ଧ ଲଢ଼ିବାଠାରୁ କମ୍ ନ ଥିଲା। ହେଲେ ଗାଙ୍ଗୁଲି ସବୁବେଳେ ତାଙ୍କୁ ଟସ୍ ପାଇଁ ଅପେକ୍ଷା କରାଉଥିବା ଯୋଗୁ ସେ ତାଙ୍କୁ ଘୃଣା କରୁଥିଲେ। ଏବେ ସେ ଦଶ ବର୍ଷରୁ ଅଧିକ ସମୟ ଧରି ଗାଙ୍ଗୁଲୀଙ୍କ ସହ କମେଣ୍ଟ୍ରି କରୁଛନ୍ତି। ଗାଙ୍ଗୁଲୀ ଜଣେ ସୁନ୍ଦର ମଣିଷ। ଶାନ୍ତ ରୁହନ୍ତି। ହେଲେ ଏବେ ବି କମେଣ୍ଟ୍ରି କରିବାକୁ ବିଳମ୍ବ କରୁଛନ୍ତି ବୋଲି ସେ କହିଛନ୍ତି।
ଗାଙ୍ଗୁଲି ଭାରତୀୟ ପ୍ରଶଂସକଙ୍କ ମନୋସ୍ଥିତିକୁ ବୁଝିଥିଲେ। ସେ କ୍ରିକେଟକୁ କେବଳ ଏକ ଖେଳ ବୋଲି ଭାବୁ ନ ଥିଲେ। ସେ ନିଜେ ଶକ୍ତିଶାଳୀ ଥିଲେ। ସେଭଳି ଟିମ୍ ସଦସ୍ୟଙ୍କୁ ଚୟନ କରୁଥିଲେ। ଖେଳ ସମୟରେ ଯୁଦ୍ଧ ଲଢ଼ିବା ଭଳି ଲାଗୁଥିଲା। ହେଲେ ମ୍ୟାଚ୍ ଶେଷ ହେବା ପରେ ସେ ବେଶ୍ ଭଲରେ ମିଶୁଥିଲେ ବୋଲି ହୁସେନ୍ କହିଛନ୍ତି।