କଟକ ଅଫିସ,୧୬।୧: କଟକ ଚଣ୍ଡୀମନ୍ଦିର ନିକଟରେ ଭିକ୍ଷାବୃତ୍ତି କରୁଥିବା ଜଣେ ପୂର୍ବତନ ହୋମଗାର୍ଡଙ୍କୁ ଶୁକ୍ରବାର ସେଲ୍ଟର ଛକସ୍ଥିତ ସିଏମ୍ସି ଅର୍ବାନ ସେଲ୍ଟର ହୋମ୍ରେ ପ୍ରଶାସନ ପକ୍ଷରୁ ଥଇଥାନ କରାଯାଇଛି। ମିଳିଥିବା ସୂଚନା ଅନୁଯାୟୀ, ପୂର୍ବତନ ହୋମଗାର୍ଡ ବିନୋଦ ବିହାରୀ ପତି, ତାଙ୍କ ସ୍ତ୍ରୀ ଉର୍ମିଳାରାଣୀ ସପରିବାରେ କଟକ ଚଣ୍ଡୀମନ୍ଦିର ନିକଟରେ କିଛିଦିନ ହେବ ଭିକ୍ଷାବୃତ୍ତି କରୁଥିଲେ। ଏହି ଘଟଣା ଆଇନଜୀବୀ ଅଶୋକ କୁମାର ସ୍ବାଇଁଙ୍କ ଦୃଷ୍ଟିଗୋଚର ହୋଇଥିଲା। ସେ ଜିଲା ଓ ପୋଲିସ ପ୍ରଶାସନର ସହାୟତାରେ ଅର୍ବାନ ସେଲ୍ଟର ହୋମ୍ରେ ସେମାନଙ୍କୁ ଥଇଥାନ କରାଇଛନ୍ତି। ଏହି ସେଲ୍ଟର ହୋମକୁ ଯିବାକୁ ବିନୋଦ ରାଜି ହୋଇଥିଲେ ମଧ୍ୟ ତାଙ୍କ ସ୍ତ୍ରୀ ରାଜି ହୋଇ ନ ଥିଲେ। ପରେ କ୍ୟାଣ୍ଟନମେଣ୍ଟ ଓ ମଙ୍ଗଳାବାଗ ପୋଲିସ ଅଧିକାରୀଙ୍କ ଉପସ୍ଥିତିରେ ୪ଟି ପିସିଆର୍ ଭ୍ୟାନ୍ରେ ସେମାନଙ୍କୁ ସେଲ୍ଟର ହୋମକୁ ନିଆଯାଇଥିଲା।
ସୂଚନାଯୋଗ୍ୟ, ବିନୋଦ ଦିଗପହଣ୍ଡି ଥାନାରେ ହୋମଗାର୍ଡ ଭାବେ କାର୍ଯ୍ୟରତ ଥିବାବେଳେ କୌଣସି କାରଣବଶତଃ ତାଙ୍କୁ ଚାକିରି ହରାଇବାକୁ ପଡ଼ିଥିଲା। ପରେ ସେ କଟକ ଆସି ବିଭିନ୍ନ ସ୍ଥାନରେ ରହିଥିଲେ ମଧ୍ୟ ଅନେକ ଅସୁବିଧାର ସମ୍ମୁଖୀନ ହୋଇଥିଲେ। ତେବେ କୌଣସି ଉପାୟ ନ ପାଇ ସେ ଭିକ୍ଷାବୃତ୍ତିକୁ ଆପଣାଇଥିଲେ। ତାଙ୍କର ୩ ଝିଅ ଓ ଗୋଟିଏ ପୁଅ ଅଛନ୍ତି। ବଡ଼ ଝିଅ ୧୪ ବର୍ଷର ହୋଇଥିବାବେଳେ ପୁଅଟି ୩ ମାସର ବୋଲି ଜଣାପଡିଛି।