ନୂଆଦିଲ୍ଲୀ,୨୧।୨: କପିଲ ଦେବଙ୍କଠାରୁ ଆରମ୍ଭ କରି ଏମଏସ ଧୋନୀ ଏବଂ ମିତାଲି ରାଜଙ୍କ ଭଳି କିମ୍ବଦନ୍ତୀ କ୍ରିକେଟରଙ୍କ ଜୀବନୀ ଉପରେ ଚଳଚ୍ଚିତ୍ର ନିର୍ମାଣ ହୋଇଛି। ଏବେ ଏହି ତାଲିକାରେ ପୂର୍ବତନ ଭାରତୀୟ କ୍ରିକେଟ ଦଳର ଅଧିନାୟକ ସୌରଭ ଗାଙ୍ଗୁଲିଙ୍କ ନାମ ମଧ୍ୟ ଯୋଡି ହେବାକୁ ଯାଉଛି। ଗଣମାଧ୍ୟମ ସହିତ କଥାବାର୍ତ୍ତା ସମୟରେ, ଗାଙ୍ଗୁଲି ନିଜେ ନିଶ୍ଚିତ କରିଛନ୍ତି ଯେ ତାଙ୍କ ଜୀବନୀ ଉପରେ ଏକ ବାୟୋପିକ ନିର୍ମିତ ହେବାକୁ ଯାଉଛି ଏବଂ ରାଜକୁମାର ରାଓ ତାଙ୍କ ଭୂମିକାରେ ଅଭିନୟ କରିବେ। ସୌରଭ ଗାଙ୍ଗୁଲିଙ୍କ ଭୂମିକା ପାଇଁ ଆୟୁଷ୍ମାନ ଖୁରାନା, ରଣବୀର କପୁର ଏବଂ ପ୍ରୋସେନଜିତ ଚାଟାର୍ଜୀଙ୍କ ଭଳି ନାମ ଚର୍ଚ୍ଚାରେ ଥିଲା।
ଏକ ସାକ୍ଷାତକାରରେ ସୌରଭ ଗାଙ୍ଗୁଲି ତାଙ୍କ ବାୟୋପିକ ନିଶ୍ଚିତ କରି କହିଛନ୍ତି, ଯେପର୍ଯ୍ୟନ୍ତ ମୁଁ ଶୁଣିଛି , ରାଜକୁମାର ରାଓ ମୁଖ୍ୟ ଭୂମିକାରେ ଅଭିନୟ କରିବେ, କିନ୍ତୁ ତାରିଖକୁ ନେଇ କିଛି ସମସ୍ୟା ଅଛି। ତେଣୁ ଫିଲ୍ମଟି ପରଦାକୁ ଆସିବାକୁ ଗୋଟିଏ ବର୍ଷରୁ ଅଧିକ ସମୟ ଲାଗିପାରେ।
ସୌରଭ ଗାଙ୍ଗୁଲି ଭାରତୀୟ ଦଳର ସବୁଠାରୁ ସଫଳ ଅଧିନାୟକମାନଙ୍କ ମଧ୍ୟରୁ ଜଣେ। ତାଙ୍କ ଅଧିନାୟକତ୍ୱରେ, ଟିମ ଇଣ୍ଡିଆ ୨୦୦୨ ଆଇସିସି ଚାମ୍ପିଅନ୍ସ ଟ୍ରଫିର ମିଳିତ ବିଜେତା ହୋଇଥିଲା ଏବଂ ତାଙ୍କ ଅଧୀନରେ ଭାରତ ୨୦୦୩ ବିଶ୍ୱକପର ଫାଇନାଲରେ ପହଞ୍ଚିଥିଲା। ଗାଙ୍ଗୁଲି ଦିନିକିଆ କ୍ରିକେଟ ଇତିହାସରେ ନବମ ସର୍ବାଧିକ ରନ ସ୍କୋରର ମଧ୍ୟ। ସେ ତାଙ୍କ ଦିନିକିଆ କ୍ୟାରିୟରରେ ୧୧,୩୬୩ ରନ କରିଥିଲେ। ଅନ୍ତର୍ଜାତୀୟ କ୍ୟାରିୟରରେ ମୋଟ ରନ ବିଷୟରେ କହିବାକୁ ଗଲେ, ଗାଙ୍ଗୁଲି ତାଙ୍କ କ୍ୟାରିୟରରେ ୧୮,୫୭୫ ରନ କରିଛନ୍ତି।