ନୂଆଦିଲ୍ଲୀ,୨୧।୨: ୨୦୧୯ ଅଗଷ୍ଟରେ ଭାରତୀୟ ଟିମ୍ର ପୂର୍ବ ଅଧିନାୟକ ତଥା ଅଭିଜ୍ଞ ଉଇକେଟକିପର ମହେନ୍ଦ୍ର ସିଂହ ଧୋନୀ ଅନ୍ତରାଷ୍ଟ୍ରୀୟ କ୍ରିକେଟରୁ ସନ୍ୟାସ ନେଇଥିଲେ। ନ୍ୟୁଜିଲାଣ୍ଡ ବିପକ୍ଷରେ ସେ ନିଜର ଶେଷ ମ୍ୟାଚ୍ ଖେଳିଥିଲେ।
ଏହାପରେ ଧୋନୀ ଅନେକ ଦିନ ଧରି ପଡ଼ିଆରୁ ଦୂରରେ ରହିଥିଲେ। ହେଲେ ସେ ୨୦୨୦ ଅକ୍ଟୋବରରେ ହେବାକୁ ଥିବା ଟି୨୦ ବିଶ୍ୱକପ୍ରେ ଖେଳିବେ ଏବଂ ପରେ ସନ୍ୟାସ ନେବେ ବୋଲି କୁହାଯାଉଥିଲା। କରୋନା ଯୋଗୁ ବିଶ୍ୱକପ୍ର ଆୟୋଜନ ହୋଇପାରି ନ ଥିଲା। ଏହା ମଧ୍ୟରେ ଧୋନୀ ସମସ୍ତଙ୍କୁ ଚମକାଇ ଆଇପିଏଲ୍ ପୂର୍ବରୁ ଅନ୍ତରାଷ୍ଟ୍ରୀୟ କ୍ରିକେଟ ଖେଳିବେ ନାହିଁ ବୋଲି ଘୋଷଣା କରିଥିଲେ। ଏବେ ପୂର୍ବ ଚୟନକର୍ତ୍ତା ସରନଦୀପ ସିଂହ ଧୋନୀଙ୍କୁ ନେଇ ବଡ଼ ଖୁଲାସା କରିଛନ୍ତି। ମହାମାରୀ ଯଦି ହୋଇନ ଥାନ୍ତା ତେବେ ଧୋନୀ ଟି୨୦ ବିଶ୍ୱକପ୍ ଖେଳିଥାନ୍ତେ ବୋଲି ସେ କହିଛନ୍ତି।
ସ୍ପୋଟର୍ସକିଡା ସହ କଥାବାର୍ତ୍ତାରେ ସରନଦୀପ କହିଛନ୍ତି ଯଦି କରୋନା ମହାମାରୀ ଆସି ନ ଥାନ୍ତା ତେବେ ଧୋନୀ ନିଶ୍ଚିତ ଖେଳିଥାନ୍ତି। ସେ ଟି୨୦ ବିଶ୍ୱକପ୍ ନିହାତି ଖେଳିବା ଦରକାର ବୋଲି ଆମେ ମଧ୍ୟ ଭାବୁଥିଲୁ। ସେ ଫିଟ୍ ଥିଲେ। ତାଙ୍କର ନଖେଳିବାର କୌଣସି କାରଣ ନ ଥିଲା। ଆମେ ସବୁବେଳେ ଖେଳାଳିଙ୍କ ଫିଟ୍ନେସ୍କୁ ଦେଖିଥାଏ। ଜଣେ ଖେଳାଳି କେବେ ପର୍ଯ୍ୟନ୍ତ ଖେଳିପାରିବ ସେନେଇ ନଜର ରଖୁ। ମାହି ସବୁଠାରୁ ଅଧିକ ଫିଟ୍ ଥିଲେ। ସେ କେବେହେଲେ ଅଭ୍ୟାସ ବନ୍ଦ କରୁ ନ ଥିଲେ। ସେ ଆଘାତ ଲାଗିବା କାରଣରୁ ମ୍ୟାଚ୍ ନ ଖେଳିବା ପରିସ୍ଥିତି କେବେ ବି ଉପୁଜି ନ ଥିଲା। ଏଥିଯୋଗୁ ସମସ୍ତେ ତାଙ୍କୁ ବେଶୀ ସମ୍ମାନ ଦେଉଥିଲେ। ଜଣେ ଖେଳାଳି ଏବଂ ଅଧିନାୟକ ଭାବେ ଭାରତୀୟ ଦଳ ପାଇଁ ଧୋନୀ ଯାହା ହାସଲ କରିଥିଲେ, ସେଥିପାଇଁ ଟି୨୦ ବିଶ୍ୱକପ୍ରେ ଖେଳିବାକୁ ସେ ହକ୍ଦାର ଥିଲେ ବୋଲି ସେ କହିଛନ୍ତି।