ସୋନପୁର,୧୭।୪(ନି.ପ୍ର.): ମହିଳାଙ୍କ ଋଣ ଟଙ୍କା ଆତ୍ମସାତ କରିବା ଅଭିଯୋଗରେ ନିଉ ଅପର୍ଚୁନିଟି କନ୍ସଲଟାନ୍ସି ପ୍ରାଇଭେଟ୍ ଲିମିଟେଡ୍ ସୋନପୁର ଶାଖାର ପ୍ରାକ୍ତନ ପରିଚାଳକ ବିଭୁ ରଞ୍ଜନ ଦେହୁରୀ(୩୧)ଙ୍କୁ ସୋନପୁର ପୋଲିସ ଗିରଫ କରି ରବିବାର କୋର୍ଟ ଚାଲାଣ କରିଛି । ବିଭୁ ରଞ୍ଜନଙ୍କ ଘର ସୁବର୍ଣ୍ଣପୁର ଜିଲା ଉଲୁଣ୍ଡା ଥାନା ଅଇଁଳାଛାଟ ଅଞ୍ଚଳରେ । ନିଉ ଅପର୍ଚୁନିଟି କନ୍ସଲଟାନ୍ସି ପ୍ରାଇଭେଟ୍ ଲିମିଟେଡ ନାମକ ଅର୍ଥ ଲଗାଣକାରୀ ସଂସ୍ଥାର ମୁଖ୍ୟାଳୟ ମୁମ୍ବାଇରେ ଥିବା ବେଳେ ସୁବର୍ଣ୍ଣପୁର ଜିଲା ବୀରମହାରାଜପୁର ଅଞ୍ଚଳରେ ଏହାର ଶାଖା କାର୍ଯ୍ୟାଳୟ ଥିଲା । ଏହି ସଂସ୍ଥା ମହିଳାଙ୍କୁ ଗ୍ରୁପ୍ ଜରିଆରେ ଋଣ ପ୍ରଦାନ କରି ସୁଧ ସହିତ ଆଦାୟ କରୁଥିଲା । ସଂସ୍ଥାର ଶାଖା କାର୍ଯ୍ୟାଳୟ ପରବର୍ତ୍ତୀ ସମୟରେ ବୀରମହାରାଜପୁରରୁ ସୋନପୁର ସହରକୁ ଉଠି ଆସିଥିଲା। ଗ୍ରାମାଞ୍ଚଳର ନିରୀହ ମହିଳାମାନେ ୩ ରୁ ୪ ଜଣିଆ ଗୋଷ୍ଠୀ କରି ଏହି ଅଣ ବ୍ୟାଙ୍କିଙ୍ଗ୍ ସଂସ୍ଥାରୁ ୩୦ ରୁ ୩୫ ହଜାର ଟଙ୍କା ଲେଖାଏ ଋଣ ନେଇଥିଲେ। ଠିକ୍ ସମୟରେ ଋଣ ପରିଶୋଧ ମଧ୍ୟ କରୁଥିଲେ । ତେବେ ଶାଖା ପରିଚାଳକ ବିଭୁ ରଞ୍ଜନ କାଗଜପତ୍ର ନେଇ ଋଣ ମଞ୍ଜୁର କରିଥିଲେ ମଧ୍ୟ ୩୪ ଜଣ ମହିଳାଙ୍କୁ ଟଙ୍କା ପ୍ରଦାନ ନ କରି ନିଜେ ୧୦ଲକ୍ଷ ୪୬ହଜାର ୧୦୧ଟଙ୍କା ଆତ୍ମସାତ କରିଥିଲେ। ସେହିଭଳି ୧୨ଜଣ ମହିଳା ଋଣ ପରିଶୋଧ କରିଥିବା ୧ଲକ୍ଷ ୭୯ହଜାର ୫୦୬ଟଙ୍କାକୁ ଆତ୍ମସାତ କରିଥିଲେ ବୋଲି ସୁବର୍ଣ୍ଣପୁର ଏସ୍ପି ଅମରେଶ କୁମାର ପଣ୍ଡା ରବିବାର ସୋନପୁର ଥାନା ପରିସରରେ ଆୟୋଜିତ ଏକ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି । ଏପରିକି ମହିଳା ଗ୍ରାହକଙ୍କ ଏଟିଏମ୍ କାର୍ଡ ରଖି ବିଭୁ ରଞ୍ଜନ ନିଜେ ଟଙ୍କା ଉଠାଇ ନେଉଥିଲେ। ଏ ସମ୍ପର୍କରେ ଜଣାପଡିବା ପରେ ନିଉ ଅପର୍ଚୁନିଟି କନ୍ସଲଟାନ୍ସି ପ୍ରାଇଭେଟ୍ ଲିମିଟେଡର ଆଞ୍ଚଳିକ ପରିଚାଳକ ଖୋର୍ଦ୍ଧା ଜିଲା ବୋଲଗଡ ଥାନା କୁଶପଲ୍ଲା ଅଞ୍ଚଳର ବିପିନ କୁମାର ସାହୁ ସୋନପୁର ଥାନାରେ ଲିଖିତ ଅଭିଯୋଗ କରିଥିଲେ । ସାହୁ ଗତ ମାର୍ଚ୍ଚ ୩ ତାରିଖରେ ଅଭିଯୋଗ କରିଥିଲେ ଯେ, ମୋଟ ୧୨ଲକ୍ଷ ୨୫ହଜାର ୬୦୭ଟଙ୍କା ପ୍ରାକ୍ତନ ପରିଚାଳକ ଦେହୁରୀ ଆତ୍ମସାତ କରିଛନ୍ତି। ସୋନପୁର ଥାନାରେ ୪୭/୨୩ ମୂଳେ ଏକ ମାମଲା ରୁଜୁ ହୋଇଥିଲା । ସୋନପୁର ଆଇଆଇସି କୃଷ୍ଣଚନ୍ଦ୍ର ମେହେର ମାମଲାର ତଦନ୍ତ ଜାରି ରଖିଥିଲେ । ତେବେ ଅଭିଯୁକ୍ତ ବିଭୁ ରଞ୍ଜନ ଫେରାର ହୋଇ ଯାଇଥିଲେ । ଶେଷରେ ତାଙ୍କୁ ଧରିବାରେ ପୋଲିସ ସଫଳ ହୋଇଛି । ଏହା ପୋଲିସ ପାଇଁ ବଡ ସଫଳତା । ତେବେ ମହିଳାମାନେ ଅଣ ବ୍ୟାଙ୍କିଙ୍ଗ୍ ସଂସ୍ଥାରୁ ଟଙ୍କା ଋଣ ନେବା ଓ ଋଣ ପରିଶୋଧ କରିବା ସମୟରେ ରସିଦ୍ ଓ ଅନ୍ୟାନ୍ୟ କାଗଜପତ୍ର ଭଲ ଭାବେ ଯାଞ୍ଚ କରିବାକୁ ଏସ୍ପି ପଣ୍ଡା ପରାମର୍ଶ ଦେଇଛନ୍ତି । ଏହି ଖବରଦାତା ସମ୍ମିଳନୀରେ ସୋନପୁର ଏସ୍ଡିପିଓ ପୁଷ୍ପାଞ୍ଜଳି ନିଙ୍ଗୀ ଓ ସୋନପୁର ଆଇଆଇସି କୃଷ୍ଣଚନ୍ଦ୍ର ମେହେର ଉପସ୍ଥିତ ଥିଲେ ।