କ୍ୱିଭ୍,୯ା୩: ରୁଷିଆ ଆକ୍ରମଣରୁ ରକ୍ଷା ପାଇବା ପାଇଁ ଲୋକମାନେ ୟୁକ୍ରେନ ଛାଡ଼ି ଚାଲି ଆସୁଛନ୍ତି। ଏପର୍ଯ୍ୟନ୍ତ ୨ ଲକ୍ଷରୁ ଅଧିକ ଲୋକ ବାସହୀନ ହୋଇପଡ଼ିଛନ୍ତି। ଲକ୍ଷ ଲକ୍ଷ ଲୋକ ଅନ୍ୟ ଦେଶରେ ଶରଣାର୍ଥୀ ହୋଇଛନ୍ତି। ଏହି ସମୟରେ, ପୂର୍ବତନ ମିସ୍ ୟୁକ୍ରେନ ଭେରୋନିକା ଡିଡୁସେଙ୍କୋ ମଧ୍ୟ ନିଜ ଦେଶ ଛାଡ଼ିବାକୁ ବାଧ୍ୟ ହୋଇଛନ୍ତି। ଭେରୋନିକା ବର୍ତ୍ତମାନ ଆମେରିକାରେ ଅଛନ୍ତି ଏବଂ ଏକ ସାମ୍ବାଦିକ ସମ୍ମିଳନୀରେ ନିଜର ଯନ୍ତ୍ରଣା ପ୍ରକାଶ କରିଥିବାବେଳେ ସେ ସାହାଯ୍ୟ ପାଇଁ ଅନ୍ୟ ଦେଶକୁ ନିବେଦନ କରିଛନ୍ତି।
ମିସ୍ ୟୁକ୍ରେନ ୨୦୧୮ ଭେରୋନିକା ଡିଡୁସେଙ୍କୋ କହିଛନ୍ତି ଯେ, ଆକ୍ରମଣର ପ୍ରଥମ ଦିନରେ ସେ ଏବଂ ତାଙ୍କ ୭ ବର୍ଷର ପୁଅ ଏୟାର ରେଡ୍ ସାଇରନ ଏବଂ ବିସ୍ଫୋରଣର ଶବ୍ଦରେ ଉଠିପଡ଼ିଲେ। ଏହା ପରେ ସେ ସଙ୍ଗେ ସଙ୍ଗେ ଘର ଖାଲି କରିଦେଲେ ଏବଂ ହଜାର ହଜାର ଲୋକଙ୍କ ସହ ଚାଲିଚାଲି ୟୁକ୍ରେନ ସୀମାକୁ ଗଲେ। ସେ କହିଛନ୍ତି, ଏପରି କୌଣସି ସ୍ଥାନ ନ ଥିଲା ଯେଉଁଠାରେ ସାଇରନ, ରକେଟ କିମ୍ବା ବୋମା ବିସ୍ଫୋରଣ ଶୁଣାଯାଇ ନ ଥିଲା। ଏହା ଅତ୍ୟନ୍ତ ଭୟାନକ ଦୃଶ୍ୟ ଥିଲା।
ଭେରୋନିକା ତାଙ୍କ ପୁଅ ସହିତ ମୋଲଡୋଭାରେ ପହଞ୍ଚିଲେ, ଏବଂ ସେଠାରୁ ସ୍ବିଜରଲ୍ୟାଣ୍ଡର ଜେନେଭାକୁ। ପୁଅକୁ ଜେନେଭାରେ ଛାଡ଼ି ଭେରୋନିକା ମହିଳା ଅଧିକାର ଆଟର୍ଣ୍ଣି ଗ୍ଲୋରିଆ ଆଲରେଡଙ୍କ ସହ ଏକ ସାମ୍ବାଦିକ ସମ୍ମିଳନୀ ପାଇଁ ଆମେରିକା ଆସିଥିଲେ। ଭେରୋନିକା କହିଛନ୍ତି ଯେ ସେ ପୁଅକୁ ଜେନେଭାରେ ଛାଡି ଏହି ସାମ୍ବାଦିକ ସମ୍ମିଳନୀରେ ଯୋଗଦେବା ପାଇଁ ଯନ୍ତ୍ରଣାଦାୟକ ନିଷ୍ପତ୍ତି ନେଇଛନ୍ତି। କାରଣ ବିଶ୍ୱ ମହିଳା ଦିବସରେ ସେ ନିଜ ମାତୃଭୂମିର ସାମ୍ପ୍ରତିକ ଅବସ୍ଥା ବିଷୟରେ କହିବା ଆବଶ୍ୟକ ବୋଲି ମନେ କରିଥିଲେ।