ପାଟଣା,୨୫ା୬(ବୀରକିଶୋର ଦାଶ): କେନ୍ଦୁଝର ଜିଲା ପାଟଣା ନିର୍ବାଚନ ମଣ୍ଡଳୀର ପୂର୍ବତନ ବିଧାୟକ ତଥା ଜିଲା ଯୋଜନା କମିଟି ଅଧ୍ୟକ୍ଷ ହୃଶୀକେଷ ନାଏକ ବିଜେଡି ଛାଡ଼ିଥିବା କହିଛନ୍ତି। ତାଙ୍କୁ ଦଳ ଅଣଦେଖା କରିବାରୁ ସେ ବିଜେଡି ସୁପ୍ରିମୋଙ୍କୁ ପୋଷ୍ଟାଲ ଯୋଗେ ରେଜେଷ୍ଟ୍ରି କରି ଇସ୍ତଫା ଦେଇଥିବା କହିଛନ୍ତି। ୨୦୨୦ ସାଧାରଣ ନିର୍ବାଚନରେ ତାଙ୍କୁ ଦଳ ତରଫରୁ ଏମ୍ପି ଟିକେଟ ଦିଆ ଯିବାର ପ୍ରତିଶ୍ରୁତି ପରେ ଟିକେଟ ଦିଆଯାଇ ନ ଥିଲା। ଏହାପରେ ତାଙ୍କୁ ରାଜ୍ୟସଭାକୁ ପଠାଯିବାର ପ୍ରତିଶ୍ରୁତି ଦିଆଯାଇଥିଲା ବୋଲି ସେ କହିଛନ୍ତି। ହେଲେ ଦଳ ତାଙ୍କୁ ବିଭିନ୍ନ ଦଳୀୟ କାର୍ଯ୍ୟକ୍ରମରେ ଅଲୋଡ଼ା କରିବାରୁ ସେ ଦଳରେ ମୁଁ ଆଉ ରହି କ’ଣ କରିବି ବୋଲି କ୍ଷୋଭର ସହ କହିଛନ୍ତି। ପୂର୍ବରୁ ସେ ଭାଜପାରେ ଯୋଗ ଦେବେ ବୋଲି କଳ୍ପନା ଜଳ୍ପନା ହେଉଥିଲା। ତେବେ ଏବେ ସେ କୌଣସି ଦଳରେ ଯୋଗ ଦେବାର ନିଷ୍ପତ୍ତି ନେଇନାହାନ୍ତି ବୋଲି କହିଛନ୍ତି। ରାଜନୀତିରୁ ସନ୍ନ୍ୟାସ ନେଉଛନ୍ତି କି ବୋଲି ପ୍ରଶ୍ନ କରିବାରୁ ମୁଁ ଏବେ ବି ସକ୍ରିୟ ରାଜନୀତିରେ ଅଛି ବୋଲି କହିଛନ୍ତି। ତେବେ ନିର୍ବାଚନ ସାଧାରଣ ବର୍ଷକ ପୂର୍ବରୁ ପାଟଣା ରାଜନୀତିରେ ବିଜେଡି ଓ ଭାଜପା ପକ୍ଷରୁ ରାଜନୈତିକ ଗତିବିଧିରେ ତତ୍ପରତା ପ୍ରକାଶ ପାଇଛି।
ସୂଚନାଯୋଗ୍ୟ, ଶିକ୍ଷକତା ଛାଡ଼ି ଶ୍ରୀ ନାଏକ ୧୯୮୦ରେ ଲୋକ ଦଳ ଟିକେଟରୁ ପାଟଣା ବିଧାୟକ ହୋଇଥିଲେ। ୧୯ ୮୫ ଓ ୯୫ରେ ୨ ଥର କଂଗ୍ରେସ ଟିକେଟରୁ ପାଟଣା ନିର୍ବାଚନ ମଣ୍ଡଳୀର ବିଧାୟକ ଭାବେ ନିର୍ବାଚିତ ହୋଇଥିଲେ। ଏହାପରେ ସେ ୨୦୦୪ରେ କଂଗ୍ରେସରୁ ଟିକେଟ ନ ପାଇ ସ୍ବାଧୀନ ଭାବେ ଲଢ଼ି ପରାଜୟ ବରଣ କରିଥିଲେ। ୨୦୦୬ରେ ବିଧିବଦ୍ଧ ଭାବେ ବିଜେଡିରେ ଯୋଗ ଦେବା ପରେ କ୍ରମାଗତ ୨୦୦୯ ଓ ୨୦୧୪ରେ ବିଜେଡି ଟିକେଟରୁ ପାଟଣା ନିର୍ବାଚନ ମଣ୍ଡଳୀ ନିର୍ବାଚନ ଜିତି ବିଧାୟକ ହୋଇଥିଲେ। ୨୦୧୯ ସାଧାରଣ ନିର୍ବାଚନରେ ତାଙ୍କ ଜାଗାରେ ଦଳରେ ତତ୍କାଳୀନ ପାଟଣା ବ୍ଲକ ଅଧ୍ୟକ୍ଷ ତଥା ଯୁବନେତା ଜଗନ୍ନାଥ ନାଏକଧ୍ଙ୍କୁ ବିଜେଡି ଟିକେଟ ଦେଇଥିଲା। ଜଗନ୍ନାଥ ବିଧାୟକ ଭାବେ ନିର୍ବାଚିତ ହୋଇ ଜିଲା ଯୋଜନା କମିଟି ଅଧ୍ୟକ୍ଷ ଭଳି ଗୁରୁଦାୟିତ୍ୱରେ ରହିବା ପରେ ହୃଷୀକେଶଙ୍କ ପତିଆରା କମିବାରେ ଲାଗିଥିଲା। ଏହାପରେ ହୃଷୀକେଶଙ୍କୁ ଗତ ୪ ବର୍ଷ ଭିତରେ ବିଜେଡିର କୌଣସି ଦଳୀୟ କାର୍ଯ୍ୟକ୍ରମରେ ଯୋଗଦେବାର ଦେଖାଯାଇନାହିଁ।