ନୂଆଦିଲ୍ଲୀ,୧୩।୧୦: ପୂର୍ବତନ ପ୍ରଧାନମନ୍ତ୍ରୀ ଡ. ମନମୋହନ ସିଂଙ୍କୁ ବୁଧବାର ସନ୍ଧ୍ୟାରେ ଏମ୍ସରେ ଭର୍ତ୍ତି କରାଯାଇଛି। ଏହି ଖବର ପ୍ରସାରିତ ହେବା ପରେ ପଞ୍ଜାବ ମୁଖ୍ୟମନ୍ତ୍ରୀ ଚରଣଜିତ ସିଂ ଚାନ୍ନି, ପୂର୍ବତନ କର୍ନାଟକ ମୁଖ୍ୟମନ୍ତ୍ରୀ ସିଦ୍ଦରାମାୟାଙ୍କ ଭଳି ବରିଷ୍ଠ କଂଗ୍ରେସ ନେତାମାନେ ସୋସିଆଲ ମିଡିଆରେ ଆରୋଗ୍ୟ କାମନା କରିଥିଲେ। ଫଳରେ ମନମୋହନ ସିଂଙ୍କ ସ୍ବାସ୍ଥ୍ୟବସ୍ଥା ଗୁରୁତର ଥିବା ଭୁଲ ଖବର ପ୍ରସାରିତ ହୋଇଥିଲା। ତେବେ ଏହା ଉପରେ କଂଗ୍ରେସ ପକ୍ଷରୁ ଅପଡେଟ୍ ଦେଇଛନ୍ତି ଏଆଇସିସିର ଯୋଗାଯୋଗ ଦାୟିତ୍ୱରେ ଥିବା ସଚିବ ପ୍ରଣବ ଝା।
ଜ୍ୱର ଓ ଦୁର୍ବଳତା ଭଳି ସାଧାରଣ କାରଣରୁ ପୂର୍ବତନ ପ୍ରଧାନମନ୍ତ୍ରୀଙ୍କୁ ହସ୍ପିଟାଲରେ ଭର୍ତ୍ତି କରାଯାଇଛି। କିନ୍ତୁ ଚିନ୍ତା କରିବାର କିଛି କାରଣ ନାହିଁ। ଏବେ ସେ ସମ୍ପୂର୍ଣ୍ଣ ଠିକ୍ ଅଛନ୍ତି। ସେ ରୁଟିନ ଚେକ୍ ଅପ୍ ପାଇଁ ଛନ୍ତି। ଦରକାର ପଡ଼ିଲେ, ଆମେ ଆହୁରି ଅପଡେଟ୍ କରିବୁ। ଚିନ୍ତା ପ୍ରକଟ କରିବା ପାଇଁ ଆମ ବନ୍ଧୁମାନଙ୍କୁ ଧନ୍ୟବାଦ୍ ବୋଲି ଟୁଇଟ୍ କରି ଲେଖିଛନ୍ତି ପ୍ରଣବ।
ଚଳିତ ବର୍ଷ, ୮୮ ବର୍ଷୀୟ କଂଗ୍ରେସ ଭେଟେରାନଓ ରାଜ୍ୟସଭା ସଦସ୍ୟ କୋଭିଡ୍-୧୯ରେ ସଂକ୍ରମିତ ହୋଇ ହସ୍ପିଟାଲରେ ଭର୍ତ୍ତି ହୋଇଥିଲେ।