ନୂଆଦିଲ୍ଲୀ,୫।୬: ଆଣ୍ଟିଲିଆ ମାମଲାରେ ଗିରଫ ହୋଇଥିବା ପୂର୍ବତନ ପୋଲିସ ଅଧିକାରୀ ତଥା ଏନକାଉଣ୍ଟର ବିଶେଷଜ୍ଞ ପ୍ରଦୀପ ଶର୍ମାଙ୍କୁ ଆଶ୍ୱସ୍ତି ମିଳିଛି। ସୂଚନାନୁସାରେ, ସୁପ୍ରିମକୋର୍ଟ ପ୍ରଦୀପ ଶର୍ମାଙ୍କୁ ୩ ସପ୍ତାହ ପାଇଁ ମଧ୍ୟବର୍ତ୍ତୀକାଳୀନ ଜାମିନ ପ୍ରଦାନ କରିଛନ୍ତି। ତାଙ୍କର ଅସୁସ୍ଥ ସ୍ତ୍ରୀଙ୍କୁ ଭେଟିବା ପାଇଁ ଏହି ମଧ୍ୟବର୍ତ୍ତୀକାଳୀନ ଜାମିନ ଦିଆଯାଇଛି। ଜାମିନ ଆବେଦନକୁ ଏନ୍ଆଇଏ କୋର୍ଟ ଏବଂ ବମ୍ବେ ହାଇକୋର୍ଟ ଜାମିନ ଆବେଦନ ଖାରଜ କରିଦେଇଥିଲେ।
ଜଷ୍ଟିସ ରେବତୀ ମୋହିତେ ଡେରେ ଏବଂ ଜଷ୍ଟିସ ଆର.ଏନ ଲଡ୍ଡାଙ୍କର ଏକ ବେଞ୍ଜ ପ୍ରଦୀପ ଶର୍ମାଙ୍କୁ ଜାମିନ ଦେବାକୁ ମନା କରିଦେଇଥିଲେ। ଗତ ବର୍ଷ ଫେବୃୟାରୀ ୨୦୨୨ର ସ୍ବତନ୍ତ୍ର ଏନଆଇଏ କୋର୍ଟର ଆଦେଶକୁ ଚ୍ୟାଲେଞ୍ଜ କରି ପ୍ରଦୀପ ଶର୍ମା ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ। ଜାତୀୟ ଅନୁସନ୍ଧାନ ଏଜେନ୍ସି (ଏନଆଇଏ) ଆଣ୍ଟିଲିଆ ମାମଲାର ଯାଞ୍ଚ କରି ଅଭିଯୋଗ କରିଛି ଯେ, ଶର୍ମା ହିରେନଙ୍କୁ ହତ୍ୟା କରିବାରେ ତାଙ୍କ ସହଯୋଗୀ ସଚିନ ୱାଜେଙ୍କୁ ସାହାଯ୍ୟ କରିଛନ୍ତି। ୨୦୨୧ ଫେବୃୟାରୀ ୨୫ରେ ଶିଳ୍ପପତି ମୁକେଶ ଅମ୍ବାନୀଙ୍କ ବାସଭବନ ନିକଟରେ ବିସ୍ଫୋରଣ ଭର୍ତ୍ତି ‘ଏସ୍ୟୁଭି’ ଗାଡି ରଖିବା ଏବଂ ପରେ ପରେ ଥାନେର କାର୍ ଆକ୍ସେସରିଜ ଦୋକାନର ମାଲିକ ମନସୁଖ ହିରେନଙ୍କୁ ହତ୍ୟା କରାଯିବା ମାମଲା ସହିତ ସମ୍ପୃକ୍ତି ଥିବା ଅଭିଯୋଗରେ ପ୍ରଦୀପ ଶର୍ମାଙ୍କୁ ଗିରଫ କରାଯାଇଥିଲା।