କୋଲକାତା,୫।୭: ପଶ୍ଚିମ ବଙ୍ଗରେ ନିଜର ଅସ୍ତିତ୍ୱ ହରାଉଥିବା କଂଗ୍ରେସକୁ ଆଉ ଏକ ଝଟ୍କା ଲାଗିଛି। ପୂର୍ବତନ ରାଷ୍ଟ୍ରପତି ତଥା ସ୍ବର୍ଗତ ନେତା ପ୍ରଣବ ମୁଖାର୍ଜୀଙ୍କ ପୁଅ ଅଭିଜିତ ମୁଖାର୍ଜୀ ଶାସକ ଦଳ ତୃଣମୂଳ କଂଗ୍ରେସ (ଟିଏମ୍ସି)ରେ ସାମିଲ ହୋଇଛନ୍ତି। ସୋମବାର କୋଲକାତାରେ ଟିଏମ୍ସି କାର୍ଯ୍ୟାଳୟରେ ଆୟୋଜିତ ହୋଇଥିବା ଏକ କାର୍ଯ୍ୟକ୍ରମରେ ଟିଏମ୍ସି ନେତା ପାର୍ଥ ଚାଟାର୍ଜୀଙ୍କ ଉପସ୍ଥିତିରେ ଅଭିଜିତ ଦଳର ସଦସ୍ୟତା ଗ୍ରହଣ କରିଛନ୍ତି। ଏହି ସମୟରେ ସନ୍ଦୀପ ବନ୍ଦୋପାଧ୍ୟାୟ ତାଙ୍କୁ ଉତ୍ତରୀୟ ଦେଇ ସ୍ବାଗତ ଜଣାଇଥିଲେ। ସୂଚନାଯୋଗ୍ୟ, ପିତାଙ୍କ ଆସନ ଜାଙ୍ଗିପୁରରୁ ଅଭିଜିତ ୨ଥର ଲୋକ ସଭା ଏମ୍ପି ହୋଇଥିଲେ। କିନ୍ତୁ କଂଗ୍ରେସରୁ ଟିକେଟ ପାଇ ସାଧାରଣ ନିର୍ବାଚନରେ ସେ ଏଠାରୁ ହାରି ଯାଇଥିଲେ। ଯଦିଓ ଅଭିଜିତ ରାଜନୀତିରେ ଏକ ବଡ଼ ଚେହେରା ନୁହଁନ୍ତି ତଥାପି ସେ ଟିଏମ୍ସିରେ ସାମିଲ ହେବା କଂଗ୍ରେସ ପାଇଁ ଏକ ବଡ଼ ଝଟ୍କା ବୋଲି କୁହାଯାଉଛି। ନିକଟରେ ଅନେକ ବଡ଼ ବଡ଼ ନେତା ମଧ୍ୟ କଂଗ୍ରେସର ହାତ ଛାଡ଼ିଛନ୍ତି।