ଫୁଲବାଣୀ ଅଫିସ, ୩୦।୬: ଆୟ ବହିର୍ଭୂତ ସମ୍ପତ୍ତି ଠୁଳ ମାମଲାର ବିଚାର କରି ଫୁଲବାଣୀ ସ୍ବତନ୍ତ୍ର ଭିଜିଲାନ୍ସ ଜଜ୍ ସନ୍ତୋଷ କୁମାର ଜେନା ଜଣେ ପୂର୍ବତନ ରେଞ୍ଜର ଏବଂ ସ୍ତ୍ରୀଙ୍କୁ ୩ ବର୍ଷ ଲେଖାଏ ଜେଲ ଦଣ୍ଡାଦେଶ ଦେଇଛନ୍ତି। ଏଥିସହ ଉଭୟଙ୍କୁ ୧ ଲକ୍ଷ ଟଙ୍କା ଜରିମାନା କରାଯାଇଛି। ଜରିମାନା ଅନାଦାୟ ଅଧିକ ୬ ମାସ ଜେଲ ଭୋଗିବାକୁ ବିଚାରପତି ରାୟରେ ଉଲ୍ଲେଖ କରିଛନ୍ତି। ଅଭିଯୁକ୍ତ ଦମ୍ପତି ହେଲେ ବୌଦ୍ଧ ଜିଲା ପୁରୁଣାକଟକର ପୂର୍ବତନ ରେଞ୍ଜର ଦିଲୀପ କୁମାର ଦିଗାଲ ଓ ତାଙ୍କ ସ୍ତ୍ରୀ ସୂଜାତା ନାୟକ।
ପ୍ରକାଶ ଯେ, କନ୍ଧମାଳ ଜିଲା ଟିକାବାଲି ଥାନା ବ୍ରେକା ଗ୍ରାମରେ ଦିଲୀପଙ୍କ ଘର। ସେ ପୁରୁଣାକଟକରେ ରେଞ୍ଜର ଭାବେ କାର୍ଯ୍ୟରତ ଥିଲେ । ୨୦୧୧ରେ ତାଙ୍କ ନାମରେ ଆୟ ବହିର୍ଭୂତ ସମ୍ପତ୍ତି ଠୁଳ କରିବା ନେଇ ବ୍ରହ୍ମପୁର ଭିଜିଲାନ୍ସରେ ଅଭିଯୋଗ ହୋଇଥିଲା। ସେପ୍ଟେମ୍ବର ୨୩ରେ ଭିଜିଲାନ୍ସ ବିଭାଗ ଏ ନେଇ ୪୨/୧୧ରେ ମାମଲା ରୁଜୁ କରିଥିଲା। ତଦନ୍ତ ବେଳେ ଦିଲୀପ ନିଜ ଆୟ ଠାରୁ ୪୫ ଲକ୍ଷରୁ ଊର୍ଦ୍ଧ୍ୱ ଟଙ୍କାର ସ୍ଥାବର ଏବଂ ଅସ୍ଥାବର ସମ୍ପତ୍ତି ଠୁଳ କରିଥିବା ସ୍ପଷ୍ଟ ହୋଇଥିଲା। ସେଥିରେ ଫୁଲବାଣୀ କବରଖାନା ସାହିରେ ୨ ମହଲା କୋଠା ଏବଂ ଭୁବନେଶ୍ୱର ନିଳାଦ୍ରୀ ବିହାରରେ ୩ ମହଲା ବିଶିଷ୍ଟ କୋଠା ରହିଛି। ଏହି ମାମଲାରେ ମୋଟ ୪୫ ଜଣଙ୍କ ସାକ୍ଷ୍ୟ ପ୍ରମାଣକୁ ଆଧାର କରି ବିଚାରପତି ଉପରୋକ୍ତ ଦଣ୍ଡାଦେଶ ଶୁଣାଇଛନ୍ତି। ସରକାରଙ୍କ ପକ୍ଷରୁ ସ୍ବତନ୍ତ୍ର ପିପି ଭି.ଭି. ରାମଦାସ ମାମଲା ପରିଚାଳନା କରୁଥିଲେ।