ନୂଆଦିଲ୍ଲୀ,୨୯ା୮: ଜାଲିଆତି ଅଭିଯୋଗରେ ରୁଷିଆର ପୂର୍ବତନ ପ୍ରତିରକ୍ଷା ମନ୍ତ୍ରୀ ପାଭେଲ ପୋପୋଭ୍ଙ୍କୁ ଗୁରୁବାର ଗିରଫ କରାଯାଇଛି। ସେ ଦୋଷୀସାବ୍ୟସ୍ତ ହେଲେ ୧୦ ବର୍ଷ ଜେଲରେ ରହିପାରନ୍ତି ବୋଲି ରୁଷିଆ ସରକାରୀ ନ୍ୟୁଜ୍ ଏଜେନ୍ସି ପକ୍ଷରୁ କୁହାଯାଇଛି। ଗତ କିଛିମାସ ମଧ୍ୟରେ ଜାଲିଆତି, ଲାଞ୍ଚ କାରବାର ଏବଂ କ୍ଷମତାର ଦୁରୁପଯୋଗ ଅଭିଯୋଗରେ ଗିରଫ ହେବାରେ ପୋପୋଭ ହେଉଛନ୍ତି ରୁଷିଆର ଅଷ୍ଟମ ଶୀର୍ଷ ସାମରିକ ଅଧିକାରୀ। ଗତ ଏପ୍ରିଲରେ ଲାଞ୍ଚ ମାମଲାରେ ଉପପ୍ରତିରକ୍ଷା ମନ୍ତ୍ରୀ ଟିମୁର ଇଭାନୋଭଙ୍କୁ ଗିରଫ କରାଯିବା ସହ ପଦବୀରୁ ବହିଷ୍କୃତ କରାଯାଇଥିଲା। ରାଷ୍ଟ୍ରପତି ଭ୍ଲାଡିମିର ପୁଟିନ୍ ଦୀର୍ଘଦିନର ପ୍ରତିରକ୍ଷା ମନ୍ତ୍ରୀ ସର୍ଗେଇ ଶୋଇଗୁଙ୍କୁ ହଟାଇ ତାଙ୍କ ସ୍ଥାନରେ ଅର୍ଥନୀତିଜ୍ଞ ଆଣ୍ଡ୍ରେଇ ବେଲୁସୋଭ୍ଙ୍କୁ ଦାୟିତ୍ୱ ଦେବା ପରେ ଟିମୁର ଗିରଫ ହୋଇଥିଲେ।
ରୁଷିଆର ମିଲିଟାରୀ ଡିସ୍ନିଲ୍ୟାଣ୍ଡ ଭାବେ ଜଣାଶୁଣା ମସ୍କୋର ବିସ୍ତୃତ ପାଟ୍ରିଅଟ୍ ପାର୍କର ବ୍ୟବସାୟିକ କାରବାରରେ ଜାଲିଆତି ନେଇ ପୋପୋଭଙ୍କ ନାଁରେ ମାମଲା ରୁଜୁ ହୋଇଛି। ରୁଷିଆର ଯୁବପିଢ଼ିଙ୍କୁ ଦେଶପ୍ରେମ ପ୍ରତି ଅନୁପ୍ରାଣିତ କରିବା ଉଦ୍ଦେଶ୍ୟରେ ପୂର୍ବତନ ପ୍ରତିରକ୍ଷା ମନ୍ତ୍ରୀ ସର୍ଗେଇ ଶୋଇଗୁଙ୍କର ଏହା ପୋଷ୍ୟ ପ୍ରକଳ୍ପ ଥିଲା। ସୋଭିଏତ ଏବଂ ରୁଷିଆର ଅସ୍ତ୍ରଶସ୍ତ୍ର ସେଠାରେ ପ୍ରଦର୍ଶିତ ହୋଇଥାଏ। ସେଠାରେ ଫାୟାରିଂ ରେଞ୍ଜ, ଏୟାରବେସ୍, ମ୍ୟୁଜିୟମ, କନ୍ଫେରେନ୍ସ ସେଣ୍ଟର ଏବଂ ରୁଷିଆ ସଶସ୍ତ୍ର ବଳର କାଥେଡ୍ରାଲ ରହିଛି। ଉକ୍ତ ଚର୍ଚ୍ଚର ମୁଖ୍ୟ ପ୍ରତିମା ନିର୍ମାଣ ଲାଗି ପୁଟିନ୍ ବ୍ୟକ୍ତିଗତ ଭାବେ ଅର୍ଥ ଦେଇଥିଲେ।
