ନାକଟିଦେଉଳ,୨୩ା୪(ଡି.ଏନ.ଏ.): ଜଣେ ନାବାଳିକାଙ୍କୁ ବଳାତ୍କାର କରିବା ଅଭିଯୋଗରେ ନାକଟିଦେଉଳ ପୋଲିସ ଏହି ବ୍ଲକ ଅନ୍ତର୍ଗତ ସାହେବୀ ପଞ୍ଚାୟତର ପୂର୍ବତନ ସରପଞ୍ଚ ବିରଞ୍ଚି ବେହେରା(୫୪)ଙ୍କୁ ଗିରଫ କରିଛି।
ସୂଚନା ଅନୁସାରେ, ଗତବର୍ଷ ବିରଞ୍ଚିଙ୍କ ସ୍ତ୍ରୀ ପୁରୀରୁ ଫେରୁଥିବା ବେଳେ ଦୁର୍ଘଟଣାରେ ଆହତ ହୋଇଥିଲେ। ତାଙ୍କୁ ସେବା କରିବାକୁ ବିରଞ୍ଚତ୍ ଜଣେ ନାବାଳିକାଙ୍କୁ ଆଣି ଘରେ ରଖିଥିଲେ। ହେଲେ ବିବାହର ଦୀର୍ଘବର୍ଷ ପରେ ମଧ୍ୟ ବିରଞ୍ଚିଙ୍କ କୌଣସି ସନ୍ତାନ ନ ହେବାରୁ ନାବାଳିକାଙ୍କ ବାପା ସହିତ କଥାବାର୍ତ୍ତା କରି ତାଙ୍କୁ ସ୍ତ୍ରୀ ଭାବେ ରଖିଥିଲେ। ପ୍ରାୟ ୧ବର୍ଷ ହେବ ବିରଞ୍ଚି ନାବାଳିକାଙ୍କୁ ବଳାତ୍କାର କରିଆସୁଥିଲେ। ଏପରି କି ନାବାଳିକାଙ୍କୁ ପରିବାର ଲୋକଙ୍କ ସହ କଥା କରାଇ ଦେଉ ନ ଥିଲେ। ଗତ ୧୯ ତାରିଖରେ ନାବାଳିକା ଜଣକ କୌଶଳ କ୍ରମେ ଖସିଆସି ପରିବାର ଲୋକଙ୍କୁ ସବୁକଥା କହି କେଉଁ ଆଡ଼େ ଚାଲିଯାଇଥିଲେ। ଏ ନେଇ ୨୦ତାରିଖରେ ନାବାଳିକାଙ୍କ ବାପା ନାକଟିଦେଉଳ ଥାନାରେ ଅଭିଯୋଗ କରିଥିଲେ। ପୋଲିସ ଏକ ମାମଲା(ନଂ.୮୩/୨୨) ରୁଜୁକରି ତଦନ୍ତ ଆରମ୍ଭ କରିଥିଲା। ତଦନ୍ତ ପରେ ପୋଲିସ କିଶିଣ୍ଡା ଥାନା ଅଞ୍ଚଳରେ ରହିଥିବା ସମ୍ପର୍କୀୟଙ୍କ ଘରୁ ନାବାଳିକାଙ୍କୁ ଉଦ୍ଧାର କରିବା ସହ ଅଭିଯୁକ୍ତ ବିରଞ୍ଚିଙ୍କୁ ଗିରଫ କରିଛି। ଶନିବାର ତାଙ୍କୁ କୋର୍ଟ ଚାଲାଣ କରାଯିବ ବୋଲି ଥାନାଧିକାରୀ ବିଭୂତି ଭୂଷଣ ଦଳାଇ କହିଛନ୍ତି। ସୂଚନାଯୋଗ୍ୟ, ବିରଞ୍ଚତ୍ ୨୦୧୨ରୁ ୨୦୧୭ ପର୍ଯ୍ୟନ୍ତ ସାହେବୀ ପଞ୍ଚାୟତର ସରପଞ୍ଚ ଥିଲେ।
