ନୂଆଦିଲ୍ଲୀ,୧୧।୫: ପୂର୍ବତନ କେନ୍ଦ୍ର ଯୋଗାଯୋଗ ମନ୍ତ୍ରୀ ପଣ୍ଡିତ ସୁଖ ରାମଙ୍କ ପରଲୋକ ଘଟିଛି। ମୃତ୍ୟୁ ବେଳକୁ ତାଙ୍କୁ ୯୪ବର୍ଷ ହୋଇଥିଲା। ମଙ୍ଗଳବାର ରାତିରେ ବ୍ରେନ୍ ଷ୍ଟ୍ରୋକ୍ ହେବାରୁ ତାଙ୍କର ନିଧନ ଘଟିଛି। ଏନେଇ ସୁଖ ରାମଙ୍କ ନାତି ମଙ୍ଗଳବାର ରାତିରେ ଟୁଇଟ କରି ସୂଚନା ଦେଇଛନ୍ତି। ସୋମବାର ହୃଦ୍ଘାତ ହେବାରୁ ସୁଖ ରାମଙ୍କ ଅବସ୍ଥା ଗୁରୁତର ହୋଇଥିଲା। ଗୁରୁତର ଅବସ୍ଥାରେ ତାଙ୍କୁ ଦିଲ୍ଲୀ ସ୍ଥିତ ଏମ୍ସ ହସ୍ପିଟାଲର ଭେଣ୍ଟିଲେଟରକୁ ସ୍ଥାନାନ୍ତର କରାଯାଇଥିଲା। ମଙ୍ଗଳବାର ବିଳମ୍ବିତ ରାତିରେ ସୁଖରାମଙ୍କ ନାତି ଆଶ୍ରୟ ଶର୍ମା ଫେସବୁକରେ ପୋଷ୍ଟ କରି ଲେଖିଛନ୍ତି, ଶେଷ ବିଦାୟ ଦାଦାଜୀ। ଏବେ ଆଉ ତମ ଫୋନର ଶବ୍ଦ କେବେ ବି ବାଜିବ ନାହିଁ ବୋଲି କହି ଶୋକ ପ୍ରକାଶ କରିଛନ୍ତି ଆଶ୍ରୟ ଶର୍ମା। ସୂଚନାଯୋଗ୍ୟ, ମେ’୪ରେ ମନାଲିରେ ସୁଖ ରାମଙ୍କ ବ୍ରେନ୍ ଷ୍ଟ୍ରୋକ୍ ହୋଇଥିଲା। ଏହାପରେ ତାଙ୍କୁ ମାଣ୍ଡି ହସ୍ପିଟାଲରେ ଭର୍ତ୍ତି କରାଯାଇଥିଲା। ଶନିବାର ସ୍ବାସ୍ଥ୍ୟାବସ୍ଥା ଖରାପ୍ ହେବାରୁ ତାଙ୍କୁ ହେଲିକପ୍ଟର ଯୋଗେ ଦିଲ୍ଲୀ ଏମ୍ସକୁ ଅଣାଯାଇଥିଲା। ସୂଚନା ମୁତାବକ, ପଣ୍ଡିତ ସୁଖ ରାମ ୧୯୯୩ରୁ ୧୯୯୬ ପର୍ଯ୍ୟନ୍ତ ଯୋଗାଯୋଗ ଏବଂ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ରୀ ଭାବେ କାର୍ଯ୍ୟ କରିଥିଲେ। ସେ ହିମାଚଳ ପ୍ରଦେଶର ମାଣ୍ଡି ନିର୍ବାଚନମଣ୍ଡଳୀରୁ ଲୋକସଭା ସଦସ୍ୟ ଥିଲେ ଏବଂ ୫ ଥର ବିଧାନସଭା ନିର୍ବାଚନରେ ଏବଂ ଲୋକସଭା ନିର୍ବାଚନରେ ୩ଥର ଜିତିଥିଲେ। ୧୯୯୬ରେ ସେ କେନ୍ଦ୍ର ଯୋଗାଯୋଗ ମନ୍ତ୍ରୀ ଥିବା ବେଳେ ୨୦୧୧ରେ ତାଙ୍କୁ ଦୁର୍ନୀତି ଅଭିଯୋଗରେ ୫ବର୍ଷ କାରାଦଣ୍ଡରେ ଦଣ୍ଡିତ କରାଯାଇଥିଲା।
